Musipili O Mutelele O Ne U Tahisize Mupuzo

KWA Democratic Republic of Congo ku futuka piho ya basali ba babeli, bo mutu ni munyan’a hae ba ne ba zamaile musipili o mutelele mwa sibaka m’o ndwa i kolota, kuli ba yo fumaneha kwa Mukopano wa Sikiliti wa “Mu Kanyise Mulimu,” o ne u ezelizwe kwa Lisala. Kwand’a litaelo za kwa moya ni sango sa Sikreste ze ne ba sepa kuli ne ba ka yo ikola kwa mukopano, ne ba libelela hape ku yo bonana ni bayemeli ba ofisi ya mutai wa Lipaki za Jehova o kwa Kinshasa. Kabakala ndwa ye kolota mwa naha, ne se ku fitile lilimo ba sa boni ya zwelela kwa mutai, mi ne ba bata kuli ye i be kolo ya ku eza cwalo.

Basali ba babeli bao ba fuluha mukolo ku zwa habo bona kwa Basankusu ku ya kwa Lisala, ili musipili o eza likilomita ze 300, mwa mushitu, ni ku fuluha mwa linuka ze peli. Musipili w’o ne u ba ngezi liviki ze talu. Sibeli sa bona ba mwa sebelezo ya ka nako kaufela, yo muñwi s’a bile mwa sebelezo yeo ka lilimo ze talu, yo muñwi ze 19. Kacwalo, nako ye ne ba li mwa musipili w’o, hape ne ba nze ba hasanya taba ye nde ya Mubuso. Ne ba tandile lihora ze 110 inze ba kutaza ku be ne ba fumana mwa nzila, mi ne ba file matrakiti a 200 ni limagazini ze 30.

Ne ba na ni ku fuluha mwa linuka mo ku tezi likubu ni likwena. Ne ba sa koni ku fuluha busihu kakuli ku eza cwalo ku kona ku tahisa kozi. Hape ne ba fitile fa libaka ze ñata fo ne ba secizwe ki masole.

Nihaike musipili w’o ne li o mutelele mi ili o katalisa, likaizeli bao ne ba tabile kuli ne ba u zamaile. Sibeli sa bona ne ba tabile ni ku itebuha hahulu-hulu kuli ne ba bile teñi kwa mukopano o ne u ezelizwe kwa Lisala. Lipilu za bona ne li cisehela hahulu-hulu niti, mi ne ba susuelizwe ki sango sa mizwale ni likaizeli b’a 7,000 ba ne ba bile teñi. Hamulaho wa mukopano, ba talimana hape ni musipili wa ku kutela kwahae, mi ha ba yo fita ba yo fumana kuli mabasi a bona n’a iketile.