Busepahali Bwa Mina bu Tabisa Pilu ya Jehova
Busepahali Bwa Mina bu Tabisa Pilu ya Jehova
“Mwan’aka u talife, mi u tabise pilu ya ka, mi ni ka kona ku alaba ya ni nyaza.”—LIPROV. 27:11.
1, 2. (a) Buka ya Jobo i talusa tamilikezo ifi ya Satani? (b) Ki lika mañi ze bonisa kuli Satani naa zwezipili ku nyaza Jehova hamulaho wa mazazi a Jobo?
JEHOVA naa tuhelezi Satani ku lika busepahali bwa Jobo, mutanga wa Mulimu ya lukile. Kabakaleo, Jobo a shwelwa ki limunanu za hae ni bana ba hae mi a kula butuku bwa litombo ze maswe-maswe. Kono Satani naa si ka kakanya feela busepahali bwa Jobo. Satani naa ipapatile kuli: “Litalo ka litalo! Mutu s’a sweli kaufela wa si fana, kuli a pilise bupilo bwa hae!” Tamilikezo yeo ne i zusize taba ye ne i sa ami feela Jobo mi mane hamulaho wa lifu la Jobo, Satani u zwezipili ku kakanya busepahali bwa batu.—Jobo 2:4.
2 Ibato ba lilimo ze 600 hamulaho wa miliko ya Jobo, Jehova naa susumelize Salumoni ku ñola kuli: “Mwan’aka u talife, mi u tabise pilu ya ka, mi ni ka kona ku alaba ya ni nyaza.” (Liprov. 27:11) Kaniti, Satani naa sa nyaza Jehova ka nako yeo. Hape, mwa pono ya naa boni muapositola Joani, Satani naa bonwi inze a tama batanga ba Mulimu litaba ha saa lelekilwe kwa lihalimu hamulahonyana wa ku tomiwa kwa Mubuso wa Mulimu ka 1914. Kacwalo, niheba kacenu, mwa mazazi a mafelelezo a lifasi le, le li maswe, Satani u sa kakanya busepahali bwa batanga ba Mulimu!—Sin. 12:10.
3. Ki lifi lituto za butokwa ze lu kona ku ituta mwa buka ya Jobo?
3 Cwale ha mu nyakisise lituto ze talu kwa lituto za butokwa ze lu ituta mwa buka ya Jobo. Tuto ya pili ki ya kuli, miliko ya Jobo i zibahaza sila luli sa batu ni ya tahisa kuli batu ba Mulimu ba lwaniswe. Sila seo ki Satani Diabulosi. Tuto ya bubeli ki ya kuli, ku ba ni bulikani bo butuna ni Mulimu ku ka lu tusa ku tiiseza mwa busepahali bwa luna niha lu tahelwa ki miliko ifi kamba ifi. Mi tuto ya bulalu ki ya kuli, haiba lu welwa ki miliko ni ku likiwa ka nzila ye ñwi, Mulimu u ka lu tusa ku itiisa inge mwa naa tuselize Jobo. Kacenu, Jehova u lu tusa ka Linzwi la hae, kopano ya hae, ni moya wa hae o kenile.
Mu Hupulange Sila Luli
4. Ki mañi ya tahisize miinelo ye li teñi mwa lifasi?
4 Batu ba bañata ha ba lumeli kuli Satani u teñi. Kacwalo, niha ba kona ku sabiswa ki ze sweli ku ezahala mwa lifasi, ha ba zibi kuli Satani Diabulosi ki yena luli ya tahisa miinelo yeo. Ki niti, batu ka sibili ki bona ba ba tahisa buñata bwa manyando aa li teñi. Bashemi ba luna ba pili, bo Adama ni Eva, ne ba iketezi ku fetuhela Mubupi wa bona. Mi ku zwa nako yeo, masika aa tatami a iketezi nzila ye maswe-maswe. Nihakulicwalo, Diabulosi ki yena ya naa pumile Eva kuli a ipangule ku Mulimu. Ki yena ya tahisize miinelo ye maswe mwa lifasi le la zamaisa, la batu ba ba si ka peteha, ba ba ya kwa ku shwa. Kabakala kuli Satani ki “mulimu wa lifasi le,” batu ba bonisa mikwa ye swana ni yaa bonisa yena—ili buikuhumuso, likañi, muna, mukwañuli, bupumi, ni buipanguli. (2 Makor. 4:4; 1 Tim. 2:14; 3:6; mu bale Jakobo 3:14, 15.) Mikwa yeo i tisize lindwa, sitoyo, buputeleli, ni mifilifili ye ama lipuso za batu ni bulapeli, mi lika zeo li ekelize hahulu kwa manyando a batu.
5. Lu bata ku itusisa cwañi zibo ya butokwa ye lu na ni?
5 Yeo luli ki zibo ya butokwa ye lu na ni yona luna batanga ba Jehova! Kaniti, lwa ziba ya tahisize miinelo ye sweli ku sinyeha mwa lifasi. Kacwalo, kana ha lu ikutwi ku susumezwa ku yanga mwa simu ilikuli lu tuse batu ku ziba mutu ya li sila luli? Mi kana ha lu ikutwi ku ba ni tabo kabakala ku yema kwa lineku la Mulimu wa niti, yena Jehova, ni ku taluseza ba bañwi mwa ka sinyeza Satani ni ku felisa manyando a batu?
6, 7. (a) Ki mañi ya tisa kuli balapeli ba niti ba nyandiswe? (b) Lu kona ku likanyisa cwañi mutala wa Elihu?
6 Satani ki yena ya tahisize matata a mañata a lifasi mi ki yena ya tisa kuli batu ba Mulimu ba lwaniswe. U tukufalezwi ku lu lika. Jesu Kreste naa bulelezi muapositola Pitrosi kuli: “Simoni, Simoni, bona, Satani u mi kupile kuli a mi uluse sina buloto.” (Luka 22:31) Ka ku swana, mañi ni mañi wa luna ya hata mwa naa hatile Jesu u ka tahelwa ki miliko ka nzila ye ñwi. Pitrosi naa bapisize Diabulosi ni “tau ye lila ye bata ye i ka ca.” Mi Paulusi naa bulezi kuli: “Batu kaufela ba ba lata ku pila ka bulumeli bo bu li teñi ku Jesu Kreste, ba ka nyandiswa.”—1 Pit. 5:8; 2 Tim. 3:12.
7 Lu kona ku bonisa cwañi ka likezo za luna kuli lwa ziba sila luli muta mulumeli yo muñwi a welwa ki ziyezi? Ku fita ku siloka mulumeli yo, lu lukela ku likanyisa Elihu, ya naa bulezi ni Jobo sina mulikani wa niti. Lu lukela ku tusa mulumeli yo ya tahezwi ki ziyezi mwa ndwa ya ku lwanisa sila sa luna kaufela, yena Satani. (Liprov. 3:27; 1 Mates. 5:25) Mulelo wa luna ki ku eza ka mo lu konela kaufela ku tusa mulumeli sina luna ku tiiseza mwa ku sepahala kwa hae, mi ka ku eza cwalo u tabisa pilu ya Jehova.
8. Ki kabakalañi Satani ha naa palezwi ku tuhelisa Jobo ku lumbeka Jehova?
8 Nto ya pili ya naa tahisize Satani kuli Jobo a latehelwe ki yona ki limunanu za hae. Limunanu zeo neeli za butokwa, mi mwendi ki zona za naa ipilisa ka zona. Kono Jobo hape naa itusisize zona mwa bulapeli. Ha se a kenisize bana ba hae, Jobo a “zuha isali kakusasa-sasa ku tahisa matabelo a ku cisa, a’ likana bana ba bashimani ba hae kaufela. Kakuli Jobo n’a li: Mwendi bana ba ka, ku na ni se ba fosize ka sona ni ku nyefula Mulimu mwa lipilu za bona. Jobo n’a twaezi ku eza cwalo ka nako ni nako.” (Jobo 1:4, 5) Kacwalo, Jobo naa cisezanga Jehova matabelo kamita. A sino tahelwa ki miliko, naa sa koni ku eza cwalo. Jobo naa si na “tutu” ya ku kuteka Jehova ka yona. (Liprov. 3:9) Kono naa kona ku kuteka Jehova ka milomo ya hae, mi naa ezize cwalo!
Mu be ni Bulikani bo bu Tiile ni Jehova
9. Ki nto mañi ya butokwa ka ku fitisisa mwa bupilo bwa luna?
9 Ku be kuli lu bafumi kamba lu babotana, lu banana kamba lu supezi, lu ikanguzi kamba lwa kula, lwa kona ku ba ni bulikani bo bu tiile ni Jehova. Niha lu tahelwa ki miliko ifi kamba ifi, ku ba ni bulikani bo bu tiile ni Mulimu ku ka lu tusa ku tiiseza mwa busepahali bwa luna ni ku tabisa pilu ya Jehova. Niheba batu ba bañwi ba ne ba ziba hanyinyani niti ne ba bonisize bundume mi ne ba tiiselize mwa ku sepahala kwa bona.
10, 11. (a) Kaizeli yo muñwi naa itiisize cwañi kwa miliko ye nee mu tahezi kabakala busepahali bwa hae? (b) Ki kalabo mañi ye tiile ya naa file kaizeli yo ku Satani?
10 Mu nge mutala wa Kaizeli Valentina Garnovskaya, yo muñwi wa Lipaki za Jehova ba bañata mwa Russia ba ne ba tiiselize mwa busepahali bwa bona sina Jobo niha ne ba tahezwi ki miliko ye mituna. Ka 1945, kaizeli yo inze a na ni lilimo ze 20 za buhulu, muzwale yo muñwi a mu kutaza. Muzwale yo a mu potela habeli kuli a ambole ni yena ka za Bibele, kono cwale Valentina a tokwa ku bona muzwale yo hape. Nihakulicwalo, Valentina a kalisa ku kutaza ba ne ba pila bukaufi ni yena. Kabakaleo, a tamiwa mi a atulelwa ku pika lilimo ze 8 mwa munganda o muñwi. Ka 1953 a lukululwa mi honafo a kalisa ku kutaza hape. A tamiwa hape ni ku kenyiwa mwa tolongo, ka lilimo ze lishumi. Ha saa inzi lilimo li sikai mwa munganda o muñwi, a tutisezwa ku u sili. Mwa munganda wo ne ku na ni likaizeli ze ñwi ze nee na ni Bibele i liñwi. Zazi le liñwi, kaizeli yo muñwi a bonisa Valentina Bibele. Valentina a taba hahulu! Mu nahane feela, Bibele ye ñwi feela ya naa boni ki ya naa sweli muzwale ya naa mu kutalize ka 1945!
11 Ka 1967, Valentina a lukululwa mi cwale a bonahaza buineelo bwa hae ku Jehova ka ku kolobezwa mwa mezi. A itusisa tukuluho ya hae ka ku tukufalelwa bukombwa ku isa ka 1969. Kono ka silimo seo, a tamiwa hape, mi ka nako yeo a atulelwa ku pika lilimo ze talu mwa tolongo. Niteñi, Valentina naa zwezipili ku kutaza. Pili a si ka timela kale ka 2001, naa tusize batu ba 44 ku ituta niti. Naa pikile lilimo ze 21 mwa litolongo ni mwa minganda. Naa lata ku toboha lika kaufela, ku beya ni tukuluho ya hae, kuli a tiiseze mwa ku sepahala kwa hae. Ha naa li bukaufi ni ku timela, Valentina naa ize: “Ha ku na ndu ye ne ni na ni yona. Tutu ya ka kaufela ne i banga mwa mukotana u li muñwi, kono ne ni tabile mi ne ni kozwi ka ku sebeleza Jehova.” Kaniti, Valentina naa file kalabo ye tiile ku Satani, ya naa ipapatile kuli batu ha ba na ku zwelapili ku sepahala ku Mulimu ha ba tahelwa ki miliko! (Jobo 1:9-11) Lwa kona ku kolwa kuli Valentina naa tabisize pilu ya Jehova ni kuli Mulimu u nyolelwa ku mu zusa kwa bafu hamoho ni bote ba ba shwile inze ba sepahala.—Jobo 14:15.
12. Lilato li peta kalulo mañi mwa bulikani bwa luna ni Jehova?
12 Lu isweli bulikani ni Jehova kabakala kuli lwa mu lata. Lu tabela tulemeno twa Mulimu mi lu ikataza ku pila ka ku lumelelana ni milelo ya hae. Ka ku fapahana ni litamilikezo za Diabulosi, lu lata Jehova ka pilu ya luna kaufela. Lilato le li cwalo li lu tiisa ku tundamena ku sepahala mwa miliko. Jehova yena u ka “libelela nzila ya ba ba ketilwe ki Yena,” kamba ba ba sepahala ku yena.—Liprov. 2:8; Samu 97:10.
13. Jehova u nga cwañi ze lu mu ezeza?
13 Lilato ki lona le li tisa kuli lu lumbeke libizo la Jehova niha lu ikutwa kuli ha lu koni ku eza ze ñata. Wa lemuha milelo ya luna ye minde mi haa lu atuli haiba lu palelwa ku eza kaufela ze lu bata ku peta. Nto ya butokwa haki lika feela ze lu eza kono ni libaka le lu li ezeza. Nihaike Jobo naa swabile hahulu mi naa nyandile maswe, naa bulelezi ba ne ba mu tama litaba ka za lilato la hae la ku lata linzila za Jehova. (Mu bale Jobo 10:12; 28:28.) Mwa kauhanyo ya mafelelezo ya buka ya Jobo, Mulimu naa halifezi Elifazi, Bilidadi, ni Zofari kakuli ne ba si ka bulela niti. Ka nako ye swana, Jehova naa bonisize kuli naa katelwa Jobo ka ku mu talusa hane kuli “mutang’a ka” ni ka ku mu laela kuli a siulele lifosi zeo. (Jobo 42:7-9) Haike ni luna lu eze ka mukwa o cwalo o ka tisa kuli Jehova a lu shemube.
Jehova U Tiisa Batanga ba Hae ba ba Sepahala
14. Jehova naa tusize cwañi Jobo kuli a sikulule muhupulo wa hae?
14 Jobo naa tiiselize mwa ku sepahala kwa hae niha naa li ya si ka peteha. Fokuñwi, ha naa ziyelehanga hahulu, naa banga ni mubonelo o fosahezi. Ka mutala, naa ize ku Jehova: “Ni huweleza ku Wena kono ha u ni alabi . . . Ka lizoho la hao le li mata wa ni lwanisa ka tata.” Jobo hape naa isize hahulu pilu ya hae kwa ku itatula ha naa ize: “Ha ni na mulatu,” ni kuli, “ne ku si na se si maswe se ne ni ezize ka mazoho a ka, mi tapelo ya ka ne nz’e li ye kenile.” (Jobo 10:7; 16:17; 30:20, 21) Nihakulicwalo, Jehova naa tusize Jobo ka sishemo ka ku mu buzaka lipuzo ze nee tusize Jobo ku sa nahana feela za hae. Lipuzo zeo hape ne li tusize Jobo ku bona hande kuli Mulimu ki ya maata kaufela mi mutu haa koni ku likanyezwa ku yena. Jobo naa amuhezi likelezo zeo mi a sikulula muhupulo wa hae.—Mu bale Jobo 40:8; 42:2, 6.
15, 16. Jehova u tusa batanga ba hae kacenu ka linzila lifi?
15 Kacenu Jehova hape u zamaisa batanga ba hae ka musa ni ka ku ba eleza. Mi lu fumana lituso za butokwa. Ka mutala, Jesu Kreste naa file sitabelo se si liulula mi kacwalo a kwalula nzila ya swalelo ya libi. Kabakala sitabelo seo, lwa kona ku ba ni bulikani bo bu tiile ni Mulimu niha lu si ba ba petehile. (Jak. 4:8; 1 Joa. 2:1) Ha lu tahelwa ki miliko, hape lu lapelanga Mulimu kuli a lu tuse ni ku lu tiisa ka moya wa hae o kenile. Fahalimu a zeo, lu na ni Bibele ye kwanile, mi haiba lu i bala ni ku nahanisisa ze ku yona, lu itukiseza ku itiisa ku ze lu lika kabakala tumelo ya luna. Ku ituta Bibele ku lu tusa ku utwisisa taba ya bubusi bwa pupo kamukana ni ya busepahali bwa batu.
16 Hape, lu tusiwa hahulu kabakala ku swalisana ni mizwale mwa kopano ya mwa lifasi kaufela ya fa Jehova lico za kwa moya ka “mutanga ya sepahala, ya na ni kutwisiso.” (Mat. 24:45-47) Ku ye ñwi ni ye ñwi ya liputeho za Lipaki za Jehova ze bato eza 100,000 ku eziwanga mikopano ye lu luta ni ku lu tusa ku itiisa ku ze kona ku lika tumelo ya luna. Ka mutala, mu nyakisise za naa ipumani ku zona Paki wa musizana wa libizo la Sheila, wa kwa Germany.
17. Mu fe mutala o bonisa butali bwa ku kumalela litaelo ze fiwa ki kopano ya Jehova kacenu.
17 Zazi le liñwi Sheila inze a li kwa sikolo, mwa kilasi ya hae ne ku si na bo muluti ka nakonyana. Balikani ba hae ba lika ku itusisa silauliso se siñwi. Sheila a zwa mwa kilasi kapili-pili, mi naa tabile kuli naa ezize cwalo ha naa utwile ze nee ezahezi hasamulaho. Ha ne ba nze ba itusisa silauliso seo, baituti ba bañwi ne ba utwile maata a badimona mi ba saba mwa kilasi. Kono ki nto mañi ye nee tusize Sheila ku zwa mwa kilasi kapili-pili? Sheila u talusa kuli, “Pili taba yeo i si ka ezahala, kwa mukopano o muñwi wa kwa Ndu ya Mubuso ne lu ambozi ka za likozi za ku itusisa lilauliso. Kacwalo ne ni ziba ze ne ni lukela ku eza. Ne ni bata ku tabisa Jehova, sina Bibele mo i bulelela kwa Liproverbia 27:11.” Sheila naa ezize hande hahulu ku fumaneha kwa mukopano wo ni ku teeleza ka tokomelo ku ze nee bulelwa kwateñi!
18. Mina ka sibili mu ikatulezi ku ezañi?
18 Haike mañi ni mañi wa luna a ikatulele ku kumalela lituto ze lu fiwa ki kopano ya Mulimu. Ka ku yanga kamita kwa mikopano, ku bala Bibele, ku ituta lihatiso ze tomile fa Bibele, ku lapela, ni ku ina mwa siango sa Bakreste ba ba hulile kwa moya, lu fumana zamaiso ni tuso ye lu tokwa. Jehova u bata kuli lu tiiseze mwa busepahali bwa luna, mi u na ni sepo ya kuli lu ka zwelapili eza cwalo. Kaniti lu na ni tohonolo ye tuna ya ku lumbeka libizo la Jehova, ku tiiseza mwa ku sepahala, ni ku tabisa pilu ya Jehova!
Kana Mwa Hupula?
• Satani ki yena ya tahisize miinelo ni miliko mañi?
• Ki ifi nto ya butokwa ka ku fitisisa mwa bupilo bwa luna?
• Ki kabakalañi ha lu isweli bulikani ni Jehova?
• Ki lifi linzila ze ñwi zeo Jehova a lu tusa ka zona kacenu?
[Lipuzo za Tuto]
[Siswaniso se si fa likepe 8]
Kana mwa lata ku taluseza ba bañwi zibo ya butokwa ye mu na ni?
[Siswaniso se si fa likepe 9]
Lwa kona ku tusa mizwale ni likaizeli ba luna ku tiiseza mwa busepahali bwa bona
[Siswaniso se si fa likepe 10]
Valentina naa tabela ku toboha lika kaufela kuli a tiiseze mwa busepahali bwa hae