Lipuzo ze Zwa Kwa Babali

Kana ku na ni sepo ya kuli mbututu ye shwezi mwa mba ya maa yona i ka zuswa kwa bafu?

Ba ba si ka ipumana mwa butata bwa ku sinyehelwa ki mulwalo ka nzila ye, ku kana kwa ba bela taata ku utwisisa mo ba ikutwela ba ba kile ba ipumana mwa butata bo. Bashemi ba bañwi ba tomohanga hahulu pilu kabakala ku shwelwa ki mwana ka nzila yeo. Me yo muñwi naa sinyehezwi ki milwalo ye ketalizoho. Kwa nalulelule, na ikutwile kuli u fuyauzwi ha naa konile ku hulisa bana ba babeli ba bashimani ba ba ikanguzi. Niteñi, naa sa hupula bana kaufela ba naa shwezwi. Mwa bupilo bwa hae kaufela, naa ziba fo ne ba ka fita bana ba hae kambe ne ba pilile. Kana Bakreste ba ba shwezwi ki bana ka nzila ye cwalo ba na ni libaka la ku sepa kuli limbututu za bona li ka zuha kwa bafu?

Kalabo ye bunolo kwa puzo yeo kikuli ha lu zibi. Bibele ha i buleli ka ku nonga ka za zuho ya limbututu ze shwezi mwa mba kamba ze fitelezi. Kono Linzwi la Mulimu li na ni likuka ze ama puzo yeo ili ze kona ku lu omba-omba.

Ha lu nyakisiseñi lipuzo ze peli ze swana. Puzo ya pili ki ya kuli, mwa meeto a Jehova, bupilo bwa mutu bu kalanga lili—fa ku itwala kamba ku pepiwa? Puzo ya bubeli ki ya kuli, Jehova u nga cwañi mbututu ye si ka pepwa kale—kuli ki mutu sakata kamba ki sikoto feela sa liselusi se si mwa mba ya musali? Likuka za Bibele li fa likalabo ze utwahala kwa lipuzo zeo ze peli.

Mulao wa Mushe u bonisa hande kuli bupilo ha bu kalisi mutu ha pepiwa kono bu kalisanga nako ya ku pepwa isi ka fita kale. Ka mukwa ufi? Ne u bonisize kuli ku bulaya mbututu ye si ka pepwa ku kona ku tahisa koto ya lifu. Mu lemuhe se u bulela Mulao wo: “U ka lifa bupilo ka bupilo.” * (Ex. 21:22, 23). Kacwalo, mwana ya si ka pepiwa kale ya sa li mwa mba wa pila mi ki mutu luli. Ku utwisisa buniti bwa taba ya kuli mwana ya si ka pepiwa kale ya sa li mwa mba ki mutu ya pila ku tusize Bakreste ba bañata ku tokolomoha mukwa wa ku sulula mba, mi ba lemuha kuli ku eza cwalo ki sibi se situna ku Mulimu.

Kaniti, mbututu ye sa li mwa mba ya pila, kono bupilo bwa mbututu ki bwa butokwa cwañi ku Jehova? Mulao o bonisizwe fahalimu ne u tokwa kuli mutu yo muhulu a bulaiwe bakeñisa ku tahisa lifu la mwana ya sa li mwa mba. Kacwalo ku si na ku kakanya, bupilo bwa mwana ya sa li mwa mba ki bwa butokwa hahulu mwa meeto a Mulimu. Hape, litimana ze ñata li bonisa kuli Jehova u nga mbututu ye sa li mwa mba kuli ki mutu luli. Ka mutala, Mulena Davida naa susumelizwe ki moya ku bulela ka za Jehova kuli: “Ki Wena . . . ya ni ezize mwa mba ya boma. . . . Meto a hao a ni boni, ha ne ni li nto ye si ka petahala, mi mwa buka ya hao, lilama za ka kaufela ne li ñozwi ha ne li nze li bupiwa ka zazi ni zazi, nako ye ne ku si na niheba li li liñwi la zona.”—Samu 139:13-16; Jobo 31:14, 15.

Jehova hape wa bona kuli limbututu ze sa li mwa mba li na ni mikwa ya zona mi li kona ku ba ni tuso ye tuna kwapili. Rebeka musalaa Isaka ha naa itwezi mambile, Jehova naa polofitile ka za bashimani ba babeli ba ne ba wiliya-wiliya mwa mba ya hae, ili ku bonisa kuli naa zibile kale mikwa ya bona ye nee ka ama batu ba bañata kwapili.—Gen. 25:22, 23; Maro. 9:10-13.

Taba ya Joani Mukolobezi ni yona ki taba ye tabisa. Taba ya Evangeli i balwa kuli: “Cwale Elizabeta h’a utwa tumeliso ya Maria, mwana a zikinyeha mwa mba ya hae; mi Elizabeta a tala Moya o Kenile.” (Luka 1:41) Mualafi Luka ha naa talusa kezahalo yeo, naa itusisize linzwi la Sigerike le li kona ku talusa mbututu ye sa li mwa mba kamba ye pepilwe. Naa itusisize linzwi le li swana kwa ku talusa Jesu ha naa li mbututu ye lobalizwe mwa sicelo.—Luka 2:12, 16; 18:15.

Ka ku ya ka litaba ze ni litimana ze lu nyakisisize,  kana Bibele ya bonisa kuli mbututu ye sa li mwa mba ni ye sa zo buyela lwa pili hamulaho wa ku pepwa za shutana hahulu? Ha ku bonahali cwalo. Mi taba yeo i lumelelana ni ze fumanwi ki ba sayansi ba miteñi ye. Ka mutala, ba batisisi ba litaba ba itutile kuli mbututu ye mwa mba ya kona ku lemuha ze ezahala kwande mi ya kona ku eza se siñwi. Kacwalo, ha ku komokisi ku bona me ya itwezi haa latanga hahulu mbututu ya hae ye sa hula mwa mba ya hae.

Limbututu li pepiwanga hamulaho wa linako ze shutana ze li tandile mwa mba inze li hula. Mu nyakisise mutala wo: Me yo muñwi u pepa mbututu ye pila ye si ka kola, mi i shwa hamulaho wa mazazi a sikai. Me yo muñwi yena u pepa mbututu ye kolile, kono yona mbututu yeo i shwa i si ka pepiwa kale. Kana me ya bulezwi pili wa kona ku sepa kuli mbututu ya hae i ka zusiwa ka libaka feela la kuli ne i pepilwe inze i si ka kola kale, ni kuli me wa bubeli haa na sepo ya ku zusiwa kwa mbututu ya hae?

Ka bukuswani, ze i luta Bibele za utwahala, za kuli bupilo bu kala ka nako ya itwala musali ni kuli Jehova u nga mbututu ye sa li mwa mba kuli ki ya butokwa mi ki mutu luli. Bakeñisa litaba za niti zeo ze mwa Mañolo, batu ba bañwi ba kona ku ikutwa kuli ku bulela kuli ha ku na sepo ya kuli mbututu ye shwezi mwa mba i ka zuswa kwa bafu ki ku lwanisa litaba zeo. Mane ba kona ku ikutwa kuli ku bulela cwalo ku kakanyisa mubonelo wa luna o tomile fa Mañolo wa ku sa sulula mba, ili o tomile luli fa litaba zeo za niti tota.

Kwamulaho, magazini ye i kile ya ba ni lipuzo za butokwa ze bonahala ku kakanya zuho ya limbututu ze nee shwile li si ka pepiwa kale. Ka mutala, kana Mulimu u ka kutisa nihaiba mbututu ye si ka kwanelela ku bupiwa mwa mba ya musali mwa Paradaisi? Kono ku nyakisisa taba ye ni ku i nahanisisa ni ku lapela ku tahisize kuli Sitopa se si Etelela si lumele kuli litaba ze cwalo ha li na taba ni sepo ya zuho. Jesu naa bulezi kuli: “Ku Mulimu linto kaufela za konahala.” (Mare. 10:27) Ze nee ezahezi ku Jesu ne li bonisize buniti bwa manzwi ao; bupilo bwa hae ne bu shimbululezwi mwa mba ya mwalyanjo ku zwa kwa lihalimu—ili nto ye sa konahali ni hanyinyani mwa meeto a batu.

Kono kana fo, ku talusa kuli Bibele i luta kuli limbututu ze shwa li si ka pepwa kale li ka zuswa? Sisupo fa ki sa kuli Bibele ha i fi kalabo ya nongile kwa puzo yeo, kacwalo ha ku na tuso ya kuli batu ba ñañelele ku bulela kuli limbututu zeo li ka zusiwa. Taba yeo i kona ku zusa lipuzo ze ñata hahulu, se shutana-shutana. Kono ku bonahala kuli ki hande ku sa kabangisa ka ze lu nahana kuli li ka ezahala. Se lu ziba ki se: Jehova Mulimu ki yena ya ziba ze ka ezahala, yena ya tezi makeke ni musa. (Samu 86:15) Ku si na ku kakanya, takazo ya hae ye tuna ki ku felisa lifu ka zuho. (Jobo 14:14, 15) Lwa kona ku sepa kuli kamita u ezanga ze lukile. U ka felisa lika kaufela ze lu utwisize butuku kabakala bupilo bwa mwa lifasi le, le li maswe haa nze a laela Mwanaa hae ka lilato kuli “a felise misebezi ya Diabulosi.”—1 Joa. 3:8.

[Litaluso za kwatasi]

[Siswaniso se si fa likepe 13]

Jehova u ka felisa lika kaufela ze lu utwisa butuku