Mu Kutule Limbuyoti ka Mulena ya Zamaiswa ki Moya wa Mulimu!

“Moya wa Muñaa Bupilo u ka ina fahalimwaa hae.”—ISA. 11:2.

1. Batu ba bañwi ba buleziñi ka za butata bo bu mwa lifasi?

KA SILIMO sa 2006, caziba wa tuto ya za lihalimu ya bizwa Stephen Hawking, naa buzize kuli: “Bakeñisa kuli mwa lifasi ku na ni butata bo butuna mwa litaba za linaha, buino bwa sicaba, ni miinelo ya lifasi-mubu, batu ba ka kona ku pila cwañi mwa lilimo ze 100 ze sa taha?” Taba ye ñwi ye mwa koranta ye bizwa New Statesman, ne i ize: “Ha lu si ka kona ku felisa bunjebwe kamba ku tahisa kozo mwa lifasi. Mane ku bonahala kuli lu tahisize feela butata. Haki kuli mwendi ha lu si ka lika. Lu likile lipuso za mifuta kaufela ze cwale ka lipuso za celelano ni lipuso za bulyangelino; lu tomile Kopano ya Bamacaba kuli lu tahise kozo ni buiketo mi lu likile ku panga lilwaniso za nyukilia kuli lu tibele lindwa. Lu lwanile lindwa ze ñata hahulu ka mulelo wa ku felisa lindwa mwa lifasi kono lu palezwi.”

2. Jehova u tuha a bonisa cwañi kuli puso ya hae ki ye lukile?

² Batanga ba Jehova ha ba komokiswi ki lipulelo ze cwalo. Bibele i lu bulelela kuli batu ne ba si ka bupiwa kuli ba kone ku izamaisa. (Jer. 10:23) Jehova ki yena feela Mulenaa luna ya swanela. Kacwalo, ki yena feela ya na ni swanelo ya ku lu tomela likuka ni ku lu bonisa mo lu swanela ku pilela. Hape ona cwale-cwale fa, u ka bonisa maata a hae ka ku felisa lipuso ze ba itomezi batu. Mi u ka yundisa batu kaufela ba ba hana puso ya hae ye lukile ili ba ba lata kuli batu ba zwelepili ku ba mwa butanga bwa sibi, bwa ku sa petahala, ni bwa ku zamaiswa ki Satani Diabulosi, ya li “mulimu wa lifasi le.”—2 Makor. 4:4.

3. Isaya naa polofitileñi ka za Mesia?

³ Mwa lifasi le linca la Paradaisi, Jehova u ka busa batu ka nzila ye lilato ka ku itusisa Mubuso wa Mesia. (Dan. 7:13, 14) Isaya naa polofitile cwana ka za Mulena wa Mubuso wo: “Mutai u ka mela fa lisina la Jese, lituhela li ka zwa fa mibisi ya hae, le li ka beya miselo. Moya wa Muñaa Bupilo u ka ina fahalimwaa hae: Moya wa butali ni wa ngana, Moya wa kelezo ni wa maata, Moya wa ku ziba ni wa ku saba Muñaa Bupilo.” (Isa. 11:1, 2) Moya wa Mulimu u tusize cwañi Jesu Kreste, yena ‘mutai o no ka mela fa lisina la Jese,’ kuli a kone ku busa batu? Puso ya hae i ka tisa limbuyoti lifi? Mi lu swanela ku ezañi kuli lu kutule limbuyoti zeo?

Mulimu ki Yena ya Konisa Jesu ku Busa

4-6. Ki zibo ifi ya na ni yona Jesu ye ka mu tusa ku ba Mulena ya butali, ya na ni mukekecima, ili ya li Muprisita yo Mutuna ni Muatuli?

⁴ Jehova u bata kuli batu ba ba busiwa ki yena ba be ba ba petehile mwatasaa zamaiso ya Mulena ya butali ni ya na ni mukekecima, ili ya li Muprisita yo Mutuna ni Muatuli. Kona libaka Mulimu ha naa ketile Jesu Kreste, mi naa mu file moya wa hae o kenile kuli a mu konise ku peta buikalabelo bwa butokwa hahulu bo. Ha mu nyakisise mabaka a mañwi a bonisa kuli Jesu u ka peta ka ku tala misebezi ya hae ya mu file Mulimu.

⁵ Jesu ki yena ya ziba hahulu Mulimu. Mwana  wa libanda u zibile Ndate ka nako ye telele ku fita mañi kamba mañi, mwendi ili ka lilimo ze eza libilioni ze ñata-ñata. Mwa nako yeo, Jesu naa zibile hande hahulu Jehova kuli mane u taluswa kuli ki yena “siswaniso sa Mulimu Ya sa bonwi.” (Makolo. 1:15) Jesu yena kasibili naa ize: “Ya ni boni, u boni Ndate.”—Joa. 14:9.

⁶ Jesu ki yena ya tatama Ndatahe kwa ku ziba lika kaufela ze bupilwe, hamohocwalo ni batu. Liñolo la Makolose 1:16, 17 li li: “Linto kamukana li ezizwe ka yena [Mwanaa Mulimu], ze kwa lihalimu, ni ze mwa lifasi, ze bonwa ni ze sa bonwi . . . Ki yena wa pili kwa linto kaufela, mi kaufela ha li yemi ki ka yena.” Mu nahane feela taba yeo! Jesu naa “sebeleza” Mulimu mwa ku bupa lika ze ñwi kaufela. Kabakaleo, wa utwisisa lika kaufela ze bupilwe, hamohocwalo ni booko bwa mutu bo bu makaza. Kaniti luli, Kreste ki yena butali!—Liprov. 8:12, 22, 30, 31.

7, 8. Moya wa Mulimu no tusize cwañi Jesu mwa musebezi wa hae?

⁷ Jesu naa tozizwe ka moya wa Mulimu o kenile. Jesu naa ize: “Moya wa Mulena u fahalimwaa ka, kakuli u ni tozize, kuli ni bulelele babotana Evangeli; u ni lumile ku folisa ba ba lobehile lipilu, ku zibisa ba ba hapilwe kuli ba lukuluhile, ni ba ba shwile meeto kuli ba filwe ku bona, ba ba nyandiswa, ni ba kutise ba lukuluhile, mi ni zibise mwaha wa Mulena, wa sishemo.” (Luka 4:18, 19) Ku bonahala kuli Jesu ha naa kolobezwa, moya o kenile ne u mu tusize ku lemuha lika za naa itutile pili a si ka taha kale fa lifasi, ku beya cwalo ni za naa bata Mulimu kuli a li pete mwa musebezi wa hae wa ku ba Mesia.—Isa. 42:1; mu bale Luka 3:21, 22; Joani 12:50.

⁸ Bakeñisa kuli Jesu naa tusizwe ki moya o kenile mi naa na ni mubili ni munahano ze petehile, naa bile mutu yo mutuna ka ku fitisisa ya kile a pila fa lifasi ni Muluti yo mutuna ka ku fitisisa. Mane be ne ba mu teelelize ne ba ‘komokile tuto ya hae.’ (Mat. 7:28) Ka mutala, Jesu naa talusanga ze tahisa butata bwa batu—ili sibi, ku sa petahala, ni ku sa ziba Mulimu. Hape naa kona ku bona ze mwa lipilu za batu ni ku ba eza ka ku ya ka mo ba inezi.—Mat. 9:4; Joa. 1:47.

9. Sepo ya mina ku Mulena Jesu i tiiswa cwañi ha mu kengeyela bupilo bwa hae bwa fa lifasi?

⁹ Jesu naa kile a ba mutu. Za naa kopani ni zona Jesu sina mutu ni ku pila ni batu ba ba si ka petahala, ne li mu tusize hahulu kuli a kone ku ba Mulena. Muapositola Paulusi naa ñozi kuli: “Neli swanelo kuli [Jesu] a eziwe ya swana mwa litaba kaufela sina banyani ba hae, kuli a be muprisita yo mutuna ya lu utwela butuku ni ya sepahala mwa litaba za Mulimu, ku eza sebelezo ya tifo ya libi za sicaba. Kakuli sina ha naa likilwe ka butuku bwa utwile, u kona ku tusa ba ba likwa.” (Maheb. 2:17, 18) Bakeñisa kuli Jesu naa “likilwe,” wa kona ku utwela butuku batu ba ba likwa. Jesu ha naa eza musebezi wa hae wa fa lifasi, naa bonisize hande kuli u na ni mukekecima. Bakuli, lianga, be ne ba hatelelwa, mane nihaiba banana, ne ba ikutwa ku lukuluha ku mu atumela. (Mare. 5:22-24, 38-42; 10:14-16) Batu be ne ba ishuwa ni be ne ba bata ku ziba za Mulimu ne ba sutelezi ku yena. Kono  baikuhumusi, baipi, ni batu be ne ba si na “lilato la Mulimu” ne ba ba mu kendile, ku mu toya, ni ku mu lwanisa.—Joa. 5:40-42; 11:47-53.

10. Ki nzila ifi ye tuna ya naa bonisize ka yona Jesu kuli wa lu lata?

¹⁰ Jesu naa file bupilo bwa hae bakeñisa luna. Mwendi bupaki bo butuna ka ku fitisisa bo bu bonisa kuli Jesu ki yena mubusi ya swanela ki moya wa hae wa ku itatela ku lu shwela. (Mu bale Samu 40:6-10.) Kreste naa ize: “Ha ku na lilato le li fita la ya fa balikani ba hae bupilo bwa hae.” (Joa. 15:13) Jesu wa shutana ni babusi ba ba si ka petahala ba ba pilanga mwa mbombolelwa ka ku itusisa mali e ba fumana kwa batu be ba busa, kakuli yena naa file batu bupilo bwa hae.—Mat. 20:28.

Jesu U Filwe Maata A ku fa Batu Lituso ze Tiswa ki Tiululo

11. Ki kabakalañi ha lu kona ku sepa Jesu ka ku tala kuli ki Muliululi wa luna?

¹¹ Jesu wa swanela ku etelela mwa musebezi wa ku fa batu lituso ze tiswa ki sitabelo se si liulula kakuli ki yena Muprisita yo Mutuna. Mane Jesu ha naa eza musebezi wa hae wa fa lifasi, naa bonisize lika za ka eza sina Muliululi wa luna ka nako ya puso ya hae ya lilimo ze sikiti, ili ze lu kona ku ikola haiba lu sepahala. Naa folisize bakuli ni lianga, ku zusa bafu, ku fepa undi-wa-nyangela, mi mane naa kona ku kuzisa moya. (Mat. 8:26; 14:14-21; Luka 7:14, 15) Naa ezize lika zeo, isi kuli a kanyiseze batu maata a hae, kono ili kuli a bonise mukekecima ni lilato za hae. Naa bulelezi mutu wa mbingwa ya naa mu kupile kuli a mu folise kuli: “Na lata.” (Mare. 1:40, 41) Jesu u ka bonisa mukekecima o swana wo kwa batu kaufela mwa lifasi ka nako ya puso ya hae ya lilimo ze sikiti.

12. Liñolo la Isaya 11:9 li ka talelezwa cwañi?

¹² Kreste ni ba ba ka busa ni yena, ba ka zwisezapili musebezi wa ku luta batu ka za Mulimu ili wa naa kalisize Jesu lilimo ze bato eza 2,000 kwamulaho. Manzwi a kwa Isaya 11:9 a ka talelezwa, a li: “Lifasi li ka tala zibo ya Muñaa Bupilo, sina mezi mwa kwahelezi liwate.” Ze ñwi za lituto zeo ze ka zwa ku Mulimu ze ba ka fiwa batu ki za mwa ku babalelela lifasi ni libupiwa ze ñata-ñata ze ku lona, sina mwa naa bulelezwi Adama kuli a eze musebezi wo. Kwa mafelelezo a lilimo ze 1,000, mulelo wa Mulimu o bulezwi kwa Genese 1:28 u ka be u talelelizwe, mi mulelo wa sitabelo se si liulula u ka be u petahalile.

Jesu U Filwe Maata A ku ba Muatuli

13. Jesu naa bonisize cwañi kuli wa lata ku luka?

¹³ Kreste ki “yena ya beilwe ki Mulimu ku ba Muatuli wa ba ba pila ni ba ba shwile.”  (Lik. 10:42) Kacwalo, kwa lu omba-omba ku ziba kuli Jesu ha konwi ku shongiwa, ni kuli ku luka ni busepahali li swana sina lukanda lo lu tamilwe mwa teka ya hae! (Isa. 11:5) Naa bonisize kuli u toile bulyangelino, buipi, ni likezo ze ñwi ze maswe, mi naa nyazize batu be ne ba si na taba ni batu be ne ba nyanda. (Mat. 23:1-8, 25-28; Mare. 3:5) Hape Jesu naa bonisize kuli naa sa pumiwi ki ponahalo ya fande, “kakuli naa ziba se si li teñi ku mutu.”—Joa. 2:25.

14. Jesu u bonisa cwañi kuli wa lata ku luka kacenu, mi ki lipuzo lifi ze lu swanela ku ipuza?

¹⁴ Jesu u zwelapili ku bonisa lilato la hae la ku lata ku luka ka ku okamela musebezi wa ku kutaza ni ku lu luta batu ili o eziwa hahulu kacenu. Ha ku na mutu kamba mubuso wa butu kamba mudimona ya kona ku palelwisa musebezi wo ku petiwa ka mwa latela Mulimu. Kacwalo, lwa kona ku ba ni sepo ye tezi ya kuli ndwa ya Armagedoni ha se i lwanilwe, ku luka kwa Mulimu ku ka be ku tuzi. (Mu bale Isaya 11:4; Mateu 16:27.) Mu ipuze kuli: ‘Kana ni nganga batu be ni katana ha ni kutaza sina Jesu mwa naa ngela batu ba naa kutazanga? Kana na sebeleza Jehova ka mo ni konela kaufela nihaike kuli mapongo kamba miinelo ye ni li ku yona, li ni palelwisa ku peta ze ñata?’

15. Ki nto mañi ye lu swanela ku hupula ili ye kona ku lu tusa ku sebeleza Mulimu ka mo lu konela kaufela?

¹⁵ Ku hupula kuli musebezi wa ku kutaza ki wa Mulimu ku ka lu tusa ku mu sebeleza ka moyo wa luna kaufela. Ki yena ya naa laezi kuli u ezwe; u u zamaisa ka Mwanaa hae; mi u fa ku ba ba u eza maata ka moya wa hae o kenile. Kana mwa itebuha tohonolo ye mu na ni yona ya ku sebeza hamoho ni Mulimu ni Mwanaa hae ya zamaiswa ki moya wa hae? Jehova ki yena feela ya kona ku susumeza batu ba ba fitelela 7,000,000—ili bao buñata bwa bona ba ngiwa kuli ki “ba ba si ka ituta, ili batu feela”—kuli ba bulelele batu ba bañwi taba ya Mubuso mwa linaha ze 236.—Lik. 4:13.

Mu Ipumanele Mbuyoti ka Kreste!

16. Liñolo la Genese 22:18 li bonisañi ka za mbuyoti ya Mulimu?

¹⁶ Jehova naa bulelezi Abrahama kuli: “Macaba kamukana a lifasi a ka fiwa mbuyoti ka lusika lwa hao, kakuli u utwile linzwi la ka.” (Gen. 22:18) Taba yeo i bonisa kuli batu ba ba itebuha tohonolo ya ku sebeleza Mulimu ni Mwanaa hae ba kona ku ba ni sepo ya ku fiwa limbuyoti ze ka tiswa ki Peu ya li Mesia. Mi ba patehile mwa sebelezo ya bona inze ba hupula limbuyoti zeo.

17, 18. Ki sepiso ifi ya Jehova ye lu bala kwa Deuteronoma 28:2, mi sepiso yeo i lu ama cwañi?

¹⁷ Mulimu naa kile a bulelela baikulu ba Abrahama, sona sicaba sa Isilaele, kuli: “Limbuyoti ze kaufela [ze bulezwi mwa bulikani bwa Mulao] li ka ba fahalimu a hao, li fiwe wena, ha u ka na u utwa linzwi la Muñaa Bupilo Mulimu wa hao.” (Deut. 28:2) Manzwi ao a sa kona ku sebeza ni kwa batanga ba Mulimu kacenu. Haiba mwa bata ku fuyolwa ki Jehova, mu zwelepili ku “utwa linzwi” la hae. Mi limbuyoti za hae ‘li ka ba fahalimu a mina mi li ka fiwa mina.’ Kono ku utwa linzwi la Mulimu ku talusañi?

¹⁸ Ku utwa Mulimu ku kopanyeleza ku mamela ze bulezwi mwa Linzwi la hae ni ku itebuha lico za moya za lu fa. (Mat. 24:45) Lu tokwa ku utwa Mulimu ni Mwanaa hae. Jesu naa ize: “Hasi batu kaufela ba ba li ku na: Mulena, Mulena, ba ba ka kena mwa mubuso wa kwa lihalimu; kono ku ka kena ya eza se si latwa ki Ndate ya kwa lihalimu.” (Mat. 7:21) Mi ku utwa Mulimu ku talusa ku ipeya ka ku lata kwatasaa puteho ya Sikreste ye tomilwe ki  Mulimu ili ye na ni maeluda ba ba ketilwe, bona baana ba ba li “limpo.”—Maef. 4:8.

19. Lu kona ku ipumanela cwañi mbuyoti?

¹⁹ Mwahalaa baana ba ba li “limpo” bao, ku na ni lilama za Sitopa se si Etelela, ili ba ba yemela puteho ya Sikreste mukatumbi. (Lik. 15:2, 6) Mane nto ye ñwi ya butokwa ye ka ama katulo ye lu ka fiwa ka nako ya ñalelwa ye tuna ye taha, ki mo lu ngela banyani ba Kreste ba swanisezo. (Mat. 25:34-40) Kacwalo, ye ñwi ya linzila ze lu kona ku ipumanela ka zona mbuyoti ki ka ku tusa batoziwa ba Mulimu ka busepahali.

20. (a) Ki ufi musebezi wa butokwa o ba na ni ona baana ba ba li “limpo”? (b) Lu kona ku bonisa cwañi kuli lwa itebuha mizwale bao?

²⁰ Baana ba ba li “limpo” bao hape ba kopanyeleza lilama za Tutengo Twa Mitai, baokameli ba maeto, ni maeluda ba puteho, ili bao kaufelaa bona ba ketilwe ki moya o kenile. (Lik. 20:28) Musebezi o mutuna wa mizwale bao ki ku yaha batu ba Mulimu “ku isa fo lu ka yo fitela kamukana fa buñwi bwa tumelo, ni bwa zibo ya Mwanaa Mulimu; mane lu yo ba baana ba ba petehile, lu fite fa tikanyo ya siyemo sa Kreste se si petehile.” (Maef. 4:13) Ki niti kuli mizwale bao ha ba si ka petahala sina luna. Nihakulicwalo, lu ipumanela mbuyoti ha lu ba utwa ni ha lu itebuha musebezi o ba eza wa ku lu lisa ka lilato.—Maheb. 13:7, 17.

21. Ki kabakalañi ha ku li kwa butokwa ku utwa Mwanaa Mulimu?

²¹ Hona fa, Kreste u ka yundisa lifasi le li maswe la Satani. Seo ha si ka ezahala, bupilo bwa luna bu ka itinga ku Jesu, kakuli u filwe maata ki Mulimu a kuli a ise “buñata bo butuna bwa batu” kwa “maweluwelu a mezi a bupilo.” (Sin. 7:9, 16, 17) Kacwalo, ha lu ezeñi ka mo lu konela kaufela kuli lu ipeye ka ku lata ni ka pilu ye na ni buitumelo, ku Mulena ya zamaiswa ki moya wa Jehova.

Mu Itutileñi Kwa Liñolo la . . .

• Isaya 11:1-5?

• Mareka 1:40, 41?

• Likezo 10:42?

• Genese 22:18?

[Lipuzo za Tuto]

[Siswaniso se si fa likepe 17]

Jesu naa bonisize mukekecima ha naa zusize mwanaa Jairusi wa musizana

[Maswaniso a fa likepe 18]

Jesu Kreste u sweli ku okamela musebezi wa ku kutaza o ezwa hahulu kacenu