Ki Kabakalañi ha lu Tokwa ‘ku Libelela’?

BALUTIWA ba Jesu ne ba mu buzize kuli a ba bulele ‘se ne si ka supa ku taha kwa hae, ni ku fela kwa lifasi.’ (Mat. 24:3) Lu bala za naa ba bulelezi mwa Mateu kauhanyo ya 24, mwa Mareka kauhanyo ya 13, ni mwa Luka kauhanyo ya 21. Naa ba taluselize lika ze ñata ka za sisupo mi ne ba ka iponela lika zeo hande. Mi a ekeza, a li: “Mu libelele.”—Mat. 24:42.

Kono ki kabakalañi Jesu ha naa bulezi kuli lu libelele, haiba sisupo ne si ka iponelwa hande? Libaka la pili kikuli ba bañwi ba kona ku yaululwa ki lika ze ñwi ni ku tuhela ku mamela sisupo mi kamukwaocwalo tumelo ya bona ya kona ku fokola. Libaka la bubeli kikuli haiba lika ze ñwi ze ama sisupo ha li ezahali mwa sibaka sa pila ku sona Mukreste, u kona ku ikutwa kuli lika zeo ha li mu ami. Mi cwale u kona ku nahana kuli “ñalelwa ye tuna” ya naa polofitile Jesu i sa li kwahule ni kuli ha tokwi ku zwelapili ku tona.—Mat. 24:21.

“Ha ba si ka Lemuha se Siñwi”

Jesu naa hupulisize balateleli ba hae ka za batu ba ne ba pila mwa linako za Nuwe. Batu ne ba iponela Nuwe inze a kutaza ni ku yaha aleka mi ne ba iponela lipulayano ze ne ezahala mwa lifasi. Kono ba bañata ne “ba si ka lemuha se siñwi.” (Mat. 24:37-39) Ni kacenu batu ha ba mamelangi litemuso. Ka mutala, batu ba bañata ha ba mamelangi lisupo za fa mikwakwa ze bonisa lubilo lo ba sa swaneli ku fitelela ha ba matisa mota. Ba muso hañata ba panganga miundo mwa mikwakwa ilikuli bamatisi ba limota ba si ke ba matisanga hahulu. Kamukwaoswana, Mukreste u kona ku bona sisupo sa mazazi a maungulelo kono u kona ku sa si mamela ka mupilelo wa hae. Nto yeo ne i ezahezi ku musizana wa libizo la Arielle ili ya pila kwa wiko wa Africa.

Arielle naa ikolanga ku buha mbola ya mazoho ya basali fa mazimumwangala. Ha ne ba keta sikwata sa babapali fa sikolo sa naa kena, takazo ya ku bapala papali yeo ne i mu libalisize kuli wa kona ku sinyehelwa ki bulikani bwa hae ni Mulimu. A ba mubapali wa mwa linwisezo. Ki nto mañi ye ne ezahezi? Arielle u talusa kuli: “Ba bañwi be ne ni li ni bona mwa sikwata ne ba na ni linyazi ze ne zubanga ni ku itusisa milyani ye kola. Ne ba ni sehanga kakuli ne ni shutana ni bona.” Arielle naa nahanile kuli ku tolanga ni batu bao ne ku si ka fosahala. Kono hamulaho wa nakonyana, papali yeo ya kalisa ku fokolisa bulikani bwa hae ni Jehova. U li: “Ne ni hupulanga feela papali ya mazoho. Ka nako ya mikopano ya Sikreste, muhupulo wa ka ne u banga kwa libapalelo la mbola isiñi mwa Ndu ya Mubuso.” Papali yeo ne i amile ni tulemeno twa hae twa Sikreste. Nto ye ne li ya butokwa cwale ne se li ku wina isike feela ku bapala. Naa itwaelisanga hahulu kakuli naa lata ku wina. Ku eza cwalo ne ku mu katalisanga. Mane naa tuhezi balikani ba hae kabakala ku lata hahulu papali yeo.

Kono kwa ezahala nto ye ñwi ye ne mu nahanisisize ka za muinelo wa naa li ku ona muta ba  sikwata se siñwi ne ba filwe ku lahela mbola fakaufi ni linwisezo. Arielle naa itukiselize ku taka mbola yeo. U li: “Ha ni yo kumbuluka, ki kale ni lapela ku Jehova kuli a ni tuse ku taka mbola yeo!” Taba yeo ne i mu lemusize ka mo papali yeo ne se i sinyelize bulikani bwa hae ni Jehova. Naa ezize cwañi ka za muinelo wo?

Naa ize: “Ne ni buhile DVD ya Young People Ask—What Will I Do With My Life? * Na i buha hape mi na iseza hahulu pilu ku ze ne ni buha.” Arielle naa ziba kuli naa na ni butata bo bu swana ni bwa naa na ni bona mutangana André ya bonisizwe mwa DVD yeo. Naa nahanisisize kelezo ya naa filwe André ki muuna-muhulu. Muuna-muhulu yo naa bulelezi André kuli a bale liñolo la Mafilipi 3:8 ni ku li nahanisisa. Arielle ni yena a eza cwalo. Naa ize ku nahanisisa liñolo leo ne ku mu tusize ku zwa mwa sikwata seo.

Arielle naa ezize cinceho ye tuna. Naa tuhezi moya wa hae wa ku lata ku wina, mi cwale naa sa ikutwangi ku katala. Naa tabile hahulu mi naa ikutwile ku ba bukaufi ni mizwale ni likaizeli ba hae. Misebezi ya puteho ne i bile ya butokwa hahulu ku yena. U li: “Ne ni kalisize hape ku teelezanga ka tokomelo ha ni li kwa mikopano mi ne ni ikolanga yona. Ne ni kalisize ku eza hande musebezi wa ku kutaza. Mi cwale ni ezanga bupaina bwa ku tusa.”

Haiba lika ze yaulula li mi palelwisa ku mamela sisupo sa naa bulezi Jesu, mu tokwa ku nga muhato sina mwa naa ezelize Arielle. Mwa kona ku lika ku eza lika ze latelela. Mu eze patisiso mwa Watch Tower Publications Index. Index i swana sina mapa ye mi bonisa ko ku na ni maluo a patilwe. I mi bonisa ko mu kona ku fumana likelezo ze nde ni litaba za batu ba ba kile ba ba mwa miinelo ye swana ni ya mina. Mu ka tusiwa hahulu ki mikopano haiba mu itukisezanga yona ni ku ñola lisupo. Mi ku inela kwa lipula za kwapili, ku ka mi tusa luli. Mu itahanelange ku alaba mubuleli ha buza puzo. Mu zwelepili ku tona ka ku bapanyanga lika ze ezahala mwa lifasi kacenu ni sisupo sa naa bulezi Jesu hamohocwalo ni bupolofita bo buñwi bo bu bulela za “mazazi a maungulelo.”—2 Tim. 3:1-5; 2 Pit. 3:3, 4; Sin. 6:1-8.

“Mu Itukise”

Sisupo sa mazazi a maungulelo sa iponelwa “mwa lifasi kaufela.” (Mat. 24:7, 14) Batu ba bañata-ñata kacenu ba nyandiswa ki matuku a yambukela, matala, lizikinyeho, ni likezahalo ze ñwi ze ne polofitilwe mwa Bibele. Kono batu ba bañwi ba bañata ba pila mwa libaka mo ku na ni kozo. Haiba ha mu si ka ezahalelwa kale ki lika ze ñwi za naa polofitile Jesu, kana mwa swanela ku nahana kuli ñalelwa ye tuna i sa li kwahule? Ku nahana cwalo ki ku tokwa butali.

Ha mu nahane za naa polofitile Jesu ka za “mafu a maswe” ni “litala.” (Luka 21:11) Jesu naa si ka bulela kuli lika zeo ne li ka ezahala ka nako ye swana mwa mabaka kaufela. Kono naa bulezi kuli ne li ka ezahala mwa “mabaka a mañata.” Kabakaleo, ha lu swaneli ku libelela kuli lika zeo li ka ezahala kai ni kai ka nako ye swana. Jesu ha sa bulezi kuli ba bañwi ne ba ka nyanda kabakala matala, naa lemusize ba bañwi kuli ba swanela ku tokomela kuli ba si ke ba canga maswe. Naa ize: “Mu tokomele kuli lipilu za mina li si ke za sinyiwa ki ku ca maswe.” (Luka 21:34)  Kamukwaocwalo, Bakreste kaufela ha ba na ku ezahalelwa ki lika kaufela ze li sisupo. Kono Jesu naa ize: “Ha mu bona zeo li taha, mu zibe kuli mubuso wa Mulimu u fakaufi.” (Luka 21:31) Lika ze cwale ka mazimumwangala ni Intaneti, li lu tusa ku bona likalulo kaufela za sisupo ni ha li sa ezahali mwa sibaka se lu pila ku sona.

Hape mu hupule kuli Jehova u tomile kale ‘lizazi ni nako’ ye i ka kalisa ñalelwa ye tuna. (Mat. 24:36) Ha ku na nto ye ezahala fa lifasi ye kona ku cinca nako ni lizazi leo.

Jesu naa lemusize Bakreste ko ba li teñi kaufela kuli: “Mu itukise.” (Mat. 24:44) Lu swanela ku ba ba ba itukisize kamita. Kono niti kikuli ha lu koni ku ezanga misebezi ya puteho ka nako kaufela. Mi ha ku na ya ziba kuli ñalelwa ye tuna i ka lu fumana inze lu eza musebezi mañi. Mwendi ba bañwi ba ka fumanwa inze ba sebeza mwa simu kamba inze ba eza misebezi ya fa lapa. (Mat. 24:40, 41) Hakulicwalo, lu swanela ku ezañi kuli lu itukise?

Bo Emmanuel ni bakubona bo Victorine hamohocwalo ni bana ba bona ba basizana ba silezi ba pila mwa sibaka se siñwi sa mwa Africa ili ko ku sa ezahali lika kaufela ze li sisupo sa mazazi a maungulelo. Bakeñisa kuli ne ba bata ku ba ba ba itukiselize, ba lukisa kuli ba ikambotange za mwa Bibele ka zazi ni zazi. Bo Emmanuel ba li: “Ne kuli taata ku fumana nako ye swanela. Kono hamulaho lwa keta kuli lu itutange ka nako ya 06:00 ku isa 06:30 kakusasana. Hamulaho wa ku nyakisisa liñolo la zazi, ne lu itukisezanga maparagilafu a sikai mwa lihatiso ze itutiwa mwa sunda yeo kwa mikopano.” Kana ku eza cwalo ku ba tusize ku zwelapili ku tona? Eni! Bo Emmanuel ki baswalisanisi ba sitopa sa baana-bahulu mwa puteho. Hañata bo Victorine ba ezanga bupaina bwa ku tusa, mi ba tusize batu ba bañata ku ituta niti. Mi bana ba bona ba basizana ba eza hande hahulu mwa puteho.

Jesu u lu lemusa kuli: “Mu libelele, mu tone.” (Mare. 13:33) Mu si ke mwa tuhelela nto ifi kamba ifi ku mi lyanganisa kuli mu si ke mwa zwelapili ku tona. Kono mu utwe likelezo ze lu fiwanga kwa mikopano ni ze mwa lihatiso za luna, sina mwa naa ezelize Arielle. Mi mu likanyise lubasi lwa bo Emmanuel ka ku ezanga nto ye ñwi ka zazi ni zazi ili ye ka mi tusa ku itukisa ni ku zwelapili ku ‘libelela.’

[Litaluso za kwatasi]

[Siswaniso se si fa likepe 4]

Ku ikambota za mwa Bibele ku tusa bo Emmanuel ni lubasi lwa bona ku ‘itukisa’