“Ni Sihole Kono Isiñi Ku Ya Ku Ile”

Taba ye Kandekilwe ki bo Sara van der Monde

Hañata batu ba ni buzanga kuli: “Bo Sara, kiñi ha mu bonahalanga ku ba ni tabo nako kaufela?” Ni ba bulelelanga kuli ni na ni sepo ye ipitezi. Ni bulelanga kuli: “Ka nako ya cwale ni sihole kono isiñi ku ya ku ile!”

NE NI pepezwi mwa Paris, ili kwa France, ka 1974. Ne ku na ni butata ha ni pepiwa, mi hasamulaho na fumanwa ni butuku bo bu tiswa ki ku sinyeha kwa booko (cerebral palsy). Ne ni sa koni ku zamaya hande, mi batu ne ba sa utwisisangi ze ne ni bulelanga. Hape na ba ni butuku bwa kanono mi ne ni kula-kulanga.

Ha ne ni na ni lilimo ze peli za buhulu, lubasi lwa hesu lwa tutela kwa Melbourne, mwa Australia. Hamulaho wa lilimo ze peli, bo ndate ba yubeka bo ma ni na. Yeo ki yona nako ye ni hupula ye ne ni ikutwile kuli Mulimu ki Mulikanaa ka. Bo ma ne li Lipaki za Jehova, mi ne ba yanga ni na kwa mikopano ya Sikreste. Ha ne ni banga kwa mikopano yeo, ne ni itutile kuli Mulimu naa ni lata ni ku ni tokomela. Zibo yeo ni lilato le ne ba ni bonisa bo ma, ne li ni tusize kuli ni ikutwe ku ba mwa buiketo ku si na taba ni kuli muinelo wa luna ne u cincize.

Bo ma hape ne ba ni lutile mwa ku lapelela ku Jehova. Mane ni ikutwanga kuli ku bunolo ku lapela ku fita ku bulela. Ha ni lapela ha ni tokwangi ku tumusa manzwi, kono manzwi a itahelanga feela mwa pilu. Mi bakeñisa kuli batu ha ba utwisisangi hande ze ni bulela, kwa ni tiisanga ku ziba kuli Jehova wa utwisisa lika kaufela ze ni bulela ha ni lapelela mwa pilu kamba ha ni lapela ka ku sa bulela hande.—Samu 65:2.

Mo ne ni Itiiselize Mwa Butata

Ha ne ni na ni lilimo liketalizoho, ne ni sa koni ku zamaya ni sa itusisi lisipi za ku beya kwa mahutu. Niha ne ni itusisanga lisipi zeo, ne ni sa koni ku zamaya hande. Ha ne ni na ni lilimo ze 11, ne se ni sa koni ku zamaya. Hasamulaho, ne ni palelwanga ku pahama fa mumbeta ni ku zwa fateñi. Ne ni itusisanga mushini ku ni inisa mwa sipula sa ka sa mawili se si na ni injini, ili se ni sikululanga ka ku itusisa mukoboco.

Fokuñwi na zwafanga kabakala buanga bwa ka. Kono ni hupulanga ze lu bulelanga mwa lubasi lwa hesu. Lu bulelanga kuli ha lu swaneli ku bilaela ka za lika ze lu sa koni ku eza, kono lu swanela ku zwelapili ku eza lika ze lu kona. Taba yeo i ni tusize ku eza lika ze cwale ka ku zulamanga lipizi, ku zamaisa sisepe, ku fuluha mukolo, ku yaha munganda,  mane nihaiba ku matisa mota! Ni lata ku eza misebezi ya bukwala ye cwale ka ku penda, ku luka, ku kabisa liapalo ni lika ze ñwi, ni ku bupa lika fa lizupa.

Batu ba bañwi ne ba bulezi kuli ha ni koni ku ikezeza keto ya ku lapela Mulimu bakeñisa buanga bwa ka. Ha ne ni na ni lilimo ze 18, bo muluti ba ka ba ni bulelela kuli ni tute fa lapa ilikuli ni si ke na yanga kwa bulapeli bwa bo ma. Mane bo muluti bao ba bulela kuli ba ka ni tusa ku fumana kwa ku ina. Kono na ba taluseza kuli ha ni na ku zwa mwa bulapeli bwa ka mi ha ni na ku tuta fa lapa ku fitela ni kona ku iponela.

Nakonyana feela ku zwa fo, na kolobezwa mi na ba yo muñwi wa Lipaki za Jehova. Hamulaho wa lilimo ze peli, na tutela mwa ndu ye nyinyani. Ni tabile ku ina mwa ndu yeo kakuli ni fiwa tuso ye ni tokwa mi hape ni fumana tukuluho ye ne ni bata.

Nto ye ne ni si ka Libelela

Mwa bupilo bwa ka, ni talimani ni miinelo ye ne likile tumelo ya ka. Ka zazi le liñwi, ne ni komokile hahulu muta mutu ye ne ni kenanga ni yena sikolo ili ya naa li sianga, naa ni bulelezi kuli lu nyalane. Sapili ne ni ikutwile hande. Na lata ku nyalwa sina mo li latela likalibe ze ñata. Kono ha ku na mutu ya kona ku bulela kuli batu ba ka ba ni tabo mwa linyalo kabaka feela la kuli kaufelaa bona ki lianga. Mi mane mutangana yo naa sa lapeli Jehova. Ze lu lumela, misebezi ya luna, ni milelo ya luna ne li shutanela kwahule. Kamukwaocwalo, ne lu si ke lwa kona ku pila hamoho ka tabo. Ni bata ku mamela taelo ya Mulimu ya kuli ni nyalwe feela ki mutu ya sebeleza Jehova. (1 Makor. 7:39) Kabakaleo, na bulelela mutangana yo ka musa kuli ha ku konahali kuli lu nyalane.

Ni la kacenu le, ni ikutwa kuli ne ni ezize keto ye nde. Mi ni na ni buikolwiso bwa kuli ni ka ba ni tabo mwa lifasi le linca la lu sepisize Mulimu. (Samu 145:16; 2 Pit. 3:13) Ka nako ya cwale, ni ka tundamena ku sepahala ku Jehova ni ku pila ka ku lumelelana ni muinelo o ni li ku ona.

Ni nyolezwi ku bona zazi le ni ka tula ku zwa mwa sipula sa ka ni ku mata ka lubilo lo lu komokisa. Ka zazi leo, ni ka bulela ka tabo kuli: “Ne ni banga sianga, kono cwale ni ikanguzi mi ni ka ikangula ku ya ku ile!”