Baana-Bahulu—Kana mu ka Katulusa Batu ba ba “Katezi”?

Bo Angela, * ki likaizeli ba makwasha ba ba na ni lilimo ze fitelela 30. Baana-bahulu ba lukisize ku to ba potela, mi bo Angela ba ikalezwi. Ba ipuza kuli, ‘Baana-bahulu ba bata ku to ni bonelañi? Na ziba kuli se ni shutile mikopano i sikai, kono ni katalanga hahulu ha ni zwa kwa musebezi hamulaho wa ku babalela basupali.’ Kwandaa zeo, bo Angela ba bilaezwa ki bo maa bona ba ba kula.

Lu nge kuli mu ba bañwi ba baana-bahulu ba ba yo potela bo Angela, ne mu ka yo ba susueza cwañi? Pili mu si ka yo ba potela kale, ki lika mañi ze mu tokwa ku itukiseza ku eza kuli mu yo tusa mutu ya “katezi” sina bo Angela?—Jeremia 31:25.

MU NAHANISISE MUINELO WA LI KU ONA MUTU YO MU YO POTELA

Kaufelaa luna lwa katalanga fokuñwi bakeñisa musebezi wa luna kamba buikalabelo bo lu na ni bona mwa puteho. Ka mutala, mupolofita Daniele naa ‘katezi hahulu’ hamulaho wa ku bona pono ya naa si ka utwisisa. (Dan. 8:27, NW) Ki mañi ya naa tusize Daniele ku utwisisa pono yeo? Mulimu naa lumile lingeloi le li bizwa Gabriele ku to taluseza Daniele taluso ya pono yeo ni ku mu bulelela kuli Jehova naa utwile litapelo za hae. Lingeloi leo hape ne li bulelezi Daniele kuli na saa “latiwa hahulu” ki Jehova. (Dan. 9:21-23) Hasamulaho, lingeloi le liñwi la taha ku Daniele ni ku to mu susueza ka manzwi a swana.—Daniele 10:19.

Ni mina mwa kona ku eza nto ye swana ha mu potela mutu wa mwa puteho ya mina ya katezi kamba ya zwafile. Pili mu si ka potela kale mutu yo, mu nahanisise muinelo wa li ku ona. Ki butata mañi bwa kopana ni bona, mi butata bo bu kona ku mu zwafisa cwañi? Ki tufi tulemeno to tunde twa na ni tona? Bo Richard, ba se ba sebelize sina muuna-muhulu ka lilimo ze fitelela 20 ba bulela kuli, pili ba si ka yo potela kale mutu, ba  nahanisisanga tulemeno to tunde twa na ni tona mutu yo. Hape ba nahanisisanga muinelo wa li ku ona mutu yo. Ku eza cwalo ku ba tusanga ku yo tusa hande mutu yo. Haiba mina ni muuna-muhulu yo muñwi mu lela ku yo potela mutu yo muñwi, ne ku ka ba hande ha ne mu ka ikambota za muinelo wa li ku ona mutu ye mu yo potela pili mu si ka yo mu potela kale.

MU TUSE MUTU YE MU YO POTELA KULI A LUKULUHE

Fokuñwi muzwale kamba kaizeli ha koni ku lukuluha ku bulelela muuna-muhulu mwa ikutwela. Mu kona ku tusa cwañi mutu ya cwalo kuli a lukuluhe? Mwa kona ku kala ka ku menya kamba ku bulelela mutu yo manzwinyana a ka mu susueza. Bo Michael, ba se ba sebelize sina muuna-muhulu ka lilimo ze fitelela 40, ba kalanga ku bulela cwana ha ba potela mutu yo muñwi: “Tohonolo ye ñwi ya ku ba muuna-muhulu ki ku potelanga mizwale ni likaizeli mwa mandu a bona ni ku ba ziba hande. Kamukwaocwalo, ne ni nyolezwi ku mi potela luli.”

Kwa makalelo a poto ya mina, mwendi mwa kona ku lapela ni mutu yo. Ha mu nze mu lapela, mwa kona ku talusa tulemeno to tunde twa na ni tona mutu yo to tu cwale ka tumelo, lilato, kamba buitiiso. Kona mwa naa ezelize muapositola Paulusi ha naa lapelelanga mizwale ba hae. (1 Mates. 1:2, 3) Haiba mu lapela ni mutu yo ka nzila yeo, mina ni yena mu ka tusiwa ku ba ni mubonelo o swanela ka za poto yeo. Mi ze mu ka ambola li ka ba ze susueza. Tapelo ya mina hape ya kona ku omba-omba mutu yo. Muuna-muhulu ya yeziseli ili ya bizwa Ray u bulela kuli ka linako ze ñwi, kaufelaa luna lwa libalanga lika ze nde ze lu eza ha lu nze lu sebeleza Mulimu, mi kamukwaocwalo, lu ikutwanga hande hahulu haiba mutu yo muñwi a lu hupulisa ka za lika ze nde zeo.

MU ITUSISE BIBELE KWA KU SUSUEZA

Sina Paulusi, mwa kona ku fa “mpo ya moya” ka ku bala taba ye ñwi ya mwa Bibele, nihaiba feela timana i liñwi. (Maro. 1:11) Ka mutala, muzwale yo muñwi ya lembwalile a kana a ikutwa ku sa ba wa butokwa. Mwa kona ku bala  ni yena litaba za walisamu ya naa ikutwile inge “swaki ya litalo ye kokonyanezi mwa musi.” Ku si na taba kuli naa ikutwile cwalo, walisamu naa bulezi kuli: “Nihakulicwalo ha ni libali litaelo za hao.” (Samu 119:83, 176) Ha se mu talusize ka bukuswani liñolo leo, mwa kona ku taluseza muzwale yo kuli mu na ni buikolwiso bwa kuli ni yena ha si ka ‘libala’ milao ya Mulimu.

Mu kona ku itusisa cwañi Bibele kuli mu susueze kaizeli ya fokozi kwa moya? Mwendi mwa kona ku mu susueza ka ku itusisa swanisezo ya sheleñi ya drakima ye ne latehile. (Luka 15:8-10) Ku bonahala kuli sheleñi yeo ne i banga kalulo ya sifaha se ne si pangilwe fa tusheleñi twa muwayawaya to tuñata twa silivera. Ha mu nze mu nyakisisa swanisezo yeo ni kaizeli yo, mwa kona ku mu tusa ku utwisisa kuli ni yena ki yo muñwi wa batu ba butokwa mwa puteho ya Sikreste. Mwa kona ku mu tusa ku lemuha kuli ki yo muñwi wa lingunyana za Jehova mi hape mwa kona ku bulelela kaizeli yo kuli Jehova u mu tokomela hahulu.

Hañata mizwale ni likaizeli ba luna ba tabelanga ku ambola ka za mañolo e ba balile. Ka libaka leo, ni bona mu ba fe sibaka sa ku bulela! Ha se mu balile timana ye ñwi ni muzwale kamba kaizeli yo, mwa kona ku keta linzwi kamba pulelo ye ñwi ye mwa timana mo, ni ku mu kupa kuli a taluse se siñwi fa linzwi kamba pulelo yeo. Ka mutala, hamulaho wa ku bala liñolo la 2 Makorinte 4:16, mwa kona ku mu buza kuli, “Ki lifi linzila za mi ‘uncafalize’ Jehova, kamba za mi tiisize ka zona?” Ku buza puzo yeo ku kona ku tahisa kuli mu “susuezane.”—Maro. 1:12.

Hape mwa kona ku susueza muzwale wa mina ka ku buisana ni yena likande la mutu yo muñwi wa mwa Bibele ya naa bile mwa muinelo o swana ni wa li ku ona. Mutu yo muñwi ya lembwalile u kona ku ikutwa mwa naa ikutwezi Anna kamba Epafrodite. Anna ni Epafrodite ne ba ikutwile ku lembwala ka linako ze ñwi kono ne ba saa li ba butokwa mwa meeto a Mulimu. (1 Sam. 1:9-11, 20; Mafil. 2:25-30) Mwa Bibele, ku na ni mitala ye minde ye miñata ye mu kona ku itusisa.

MU ZWELEPILI KU IYAKATWA MUTU YO

Hasamulaho wa ku potela muzwale kamba kaizeli, mu zwelepili ku iyakatwa yena. (Lik. 15:36) Ka mutala, hamulaho wa ku pota, mwa kona ku lumelelana ku sebeza ni muzwale kamba kaizeli yo mwa sebelezo ya mwa simu. Bo Bernard, baana-bahulu ba ba yeziseli, ba buzanga cwana ka maseme ha ba kopana ni mutu ye ba sa zo potela, “Kana nto yani ye ne lu ambozi i mi tusize?” Ka ku eza cwalo, mu ka lemuha haiba ku na ni ze mu tokwa ku eza hape kuli mu mu tuse.

Mizwale ni likaizeli ba luna sihulu ba tokwa kuli lu ba babalele, lu ba utwisise, ni ku ba lata. (1 Mates. 5:11) Kamukwaocwalo, pili mu si ka yo potela kale muzwale wa mina, mu nahanisise muinelo wa li ku ona. Mu kupe Mulimu kuli a mi tuse. Mu kete ka tokomelo mañolo e mu ka yo itusisa. Ha mu ka eza cwalo, mu ka fumana nzila ye nde ye mu ka wetulusa ka yona mutu ya “katezi”!

[Litaluso za kwatasi]

[Siswaniso se si fa likepe 29]

Pili mu si ka yo potela kale muzwale wa mina, mu nahanisise muinelo wa li ku ona

[Maswaniso a fa likepe 30]

Hañata mizwale ni likaizeli ba luna ba tabelanga ku ambola ka za mañolo e ba balile

[Siswaniso se si fa likepe 31]

Hasamulaho wa ku potela muzwale kamba kaizeli, mu zwelepili ku iyakatwa yena