Bibele ya Cincanga Bupilo Bwa Batu

Ki kabakalañi musali ya naa tuhezi ku tabela za bulapeli haa itusisa nako ya hae ye ñata cwale mwa ku tusa batu ba bañwi ku ituta ka za Mulimu? Ki nto mañi ye nee susuelize muuna ya naa lata lipapali za lindwa kuli cwale a late kozo? Muuna ya naa itusisanga maswe milyani, ku nwa maswe, ni ku lwananga mwa mikwakwa, naa konile cwañi ku cinca mupilelo wa hae? Ha mu ipalele ze ne ba bulezi.

LITABA ZA BONA KA BUKUSWANI

LIBIZO: PENELOPE TOPLICESCU

LILIMO ZA BUHULU: 40

NAHA KO NE BA PEPEZWI: AUSTRALIA

KWAMULAHO: NE BA TUHEZI KU TABELA ZA BULAPELI

BUPILO BWA KA BWA KWAMULAHO: Ne ni pepezwi mwa muleneñi wa Sydney, kwa Australia, kono ha ne ni sa zo kwanisa lilimo ze peli za ku pepwa, lubasi lwa ka lwa tutela kwa New Guinea. Ne lu pilile lilimo ze bato ba ze peli mwa muleneñi wa Rabaul mi hasamulaho lwa yo pila lilimo ze 8 mwa sooli sa Bougainville. Mwa mazazi ao, mwa New Guinea ne ku si na ma-TV, kacwalo na ni munyanaa ka wa mushimani ne lu yanga ku yo tapa mwa liwate ni ku bapalela mwa litente.

Ha ne ni li wa lilimo ze bato ba ze lishumi, na kalisa ku tabela za bulapeli. Bo ma ne ba lapela kwa Katolika, kacwalo ba akaleza kuli ni yange ni yo muñwi wa masisita ba ne ba pila mwa sibaka sa luna kuli lu yo ituta Bibele ni ba bañwi. Na kena mwa bulapeli bwa Katolika mi na kolobezwa inge ni na ni lilimo ze lishumi.

Kono ha se lu kutezi kwa Australia inze ni li mwa lilimo za ku nonoboka, na kalisa ku kakanya ze ne ni lutilwe ka za bulapeli. Ha ne ni li kwa sikolo sa sekondari, ne ni itutile tuto ya litaba za kwakale, mi na ni bo ndate ne lu ambolisananga hahulu ka za simuluho ya bulapeli ni ka za litaba ze mwa Bibele ze ne lu nga kuli ki matangu. Hamulaho wa nako, na hana bulapeli bwa Katolika.

Bashemi ba ka ne ba kauhani inze ni na ni lilimo ze 16. Bo ma ne ba sa pili hande, mi hamulaho wa nako na tuta kuli ni yo ina ni bo ndate ni musali ye ne ba bata ku nyala. Munyanaa ka yena a ina ni bo ma, mi ba tutela kwa sibaka se siñwi sa Australia. Ne ni ikutwile hahulu bulutu ka nako yeo. Ne ku ngile lilimo ze peli kuli ni kalise ku utwana hape ni bo ma. Na kalisa ku nwa, ku itusisa milyani ye kola, ni ku yanga kwa mikiti. Na tuhela ku yanga kwa sikolo, na fumana mubeleko, mi ha ne ni keni mwa lilimo za ma 20 za buhulu  na sinya bupilo bwa ka, ka ku pila bupilo bo bu maswe.

Ha ne ni kwanisize lilimo ze 25, na kalisa ku nahana ka za Bibele hape. Na fumana mubeleko o munca mi na kopana ni Liene, kalibe yo munde ya naa kutekanga muzamaisi wa hae, nihaike kuli muzamaisi yo naa mu shwaulanga maswe. Ha ne ni mu buzize libaka ha naa sa alabangi muzamaisi wa hae ka kashwau, naa talusize kuli naa sweli ku ituta Bibele ni Lipaki za Jehova ni kuli naa ikataza ku sebelisa likuka za Bibele mwa bupilo bwa hae. Liene a kala ku ituta Bibele ni na. Kabakala ku sa utwisisa sa naa talusa, ne ni nahana kuli naa talusa kuli ne ni kona ku ituta litaba kaufela za naa ziba ka za Bibele mwa hora i liñwi. Mwa nako yeo ya busihu, Liene naa tandile lihora ze talu inzaa alaba lipuzo za ka ka za Bibele. Nto ye nee ni tabisize hahulu kikuli likalabo kaufela za naa ni file ne li zwa mwa Bibele.

Ni hupula zazi leo, ha ni kutela kwandu busihu hamulaho wa ku ambolisana ni Liene, ne ni bifezi Mulimu kabakala ku sa ni tusa ku ituta niti kale lani. Ne ni ziba kuli Lipaki li na ni muzamao o munde mi ne ni ikutwile kuli ne ni sa koni ku cinca mikwa ya ka kakuli ne se ni sinyize kale nako ye ñata. Hape ne ni ikutwile kuli ne ni si ke naa kona ku yanga fa ndu ni ndu inze ni kutaza sina mo ne li ezezanga Lipaki. Ne ni zwezipili ku ituta Bibele ni Lipaki, kono ili ka mulelo wa ku bata mafosisa mwa mulutelo wa zona ilikuli ni fumane fa ku tuhelela ku itutanga ni zona. Zazi le liñwi ne ni lemuhile kuli ha ni na ku fumana mafosisa mwa mulutelo wa zona.

MO NE I CINCELIZE BUPILO BWA KA BIBELE: Ha ne ni nze ni ituta hahulu ka za likuka za Bibele za muzamao, lizwalo la ka ne li nze li ni kataza hahulu. Kuli lizwalo la ka li tuhele ku ni kataza, na tuhela ku itusisanga milyani ye kola. Kono cwale ha ne ni ile kwa naha ye ñwi ka nakonyana, naa kalisa ku yanga kwa mikiti ni ku nwa. Ne ku bonahala inge kuli nako kaufela ha ne ni likanga ku pila ka ku ya ka likuka za Bibele, ne ni kutelanga mwamulaho. Ne ni lapelanga ku Jehova inze ni ikutwa ku swaba, kono nihakulicwalo ne ni sa ikutwanga bumaswe.

Ha ne ni itutile ka za Mulena Davida mwa naa foselize ni Bati-Sheba ni mo Jehova naa ba boniselize sishemo, ne ni tusehile. Davida naa bonisize bundume ka ku itumelela bufosi bwa hae ha naa elezwa, mi naa si ka lika ku ikemela. Kono naa amuhezi ka buikokobezo kelezo ya naa filwe. (2 Samuele 12:1-13) Nako kaufela ye ne ni kutelanga mafosisa a ka, ne ni nahananga ka za likande leo mi ne ku ni belanga bunolo ku kupa Jehova kuli a ni swalele. Kacwalo na ikatulela ku lapelanga pili ni si ka wela kale mwa muliko ku fita ku no lapelanga hamulaho wa ku komiwa ki muliko, mi nto yeo ne i ni tusize hahulu kuli ni kone ku cinca mikwa ya ka.

MO NI TUSELIZWE: Ne ni na ni kacimacima. Kono liñolo la Maefese 4:29-31 ne li ni tusize ku bona butokwa bwa ku pima “ze baba kaufela, ni ku nyema, ni buhali.” Ha ne ni nze ni ikataza ku sa nyema-nyemanga, ne ni itutile ku ziba mwa ku itusiseza lulimi lwa ka. Hape, kelezo ya Jesu ya kuli “ha mu li Eni, i be Eni honacwalo,” ne i ni tusize ku talelezanga likatulo za ka.—Mateu 5:37, NW.

Bo ma, ili bao pili ne ba ni lwanisanga bakeñisa kuli ne ni swalisana ni Lipaki, ne ba ni bulelezi hamulaho wa nako kuli ne ni ba tahiseza tabo. Mane ne ba ize, “Ni ziba kuli u bile musali yo munde, isi kabakala mo u huliselizwe kono kabakala ze u itutile ka za Jehova.” Ku utwa bo ma ha ba bulela manzwi ao ne ku ni nyakalalisize.

Cwale ni ikutwa kuli se ni pila bupilo bo bunde. Se ku fitile lilimo ze 9 cwale na ni bo muunaa ka inge lu itusisanga nako ya luna ye ñata ku luta batu Bibele. Ni yanga fa ndu fa ndu inze ni kutaza, mi cwale ni ikutwa kuli wo ki musebezi o munde ni ku fita.

 LITABA ZA BONA KA BUKUSWANI

LIBIZO: DENIS BUSIGIN

LILIMO ZA BUHULU: 30

NAHA KO NE BA PEPEZWI: RUSSIA

KWAMULAHO NE BA LATA HAHULU PAPALI YA LINDWA YA KARATE

BUPILO BWA KA BWA KWAMULAHO: Ne ni pepezwi mwa muleneñi wa Perm’ mi ne ni hulezi mwa muleneñi wa Furmanov, mo ku na ni batu ba ba bato eza 40,000, ili muleneñi o li bukaufi ni muleneñi wa Ivanovo, kwa Russia. Muleneñi wa Furmanov wa buheha mi u na ni likota ze nde ze ñata, ili ze tahisanga mubala wa ñandatalukeke ni wa bufubelu mwahalaa mbumbi ni maliha. Mwahalaa lilimo za bo ma-1980 ni ma-1990, bukebenga ne bu ekezehile mwa muleneñi wo. Lubasi lwa ka ne lu shebile. Ne ni pila ni bashemi ni munyanaa ka wa mushimani mwa ndu ye nee na ni musiyo u li muñwi, mi kacwalo ne lu sinana.

Ha ne ni na ni lilimo ze 7, na kalisa ku ituta papali ya karate. Ne ni lata hahulu papali yeo; ki yona nto ye ne ni ezanga hahulu mwa bupilo bwa ka. Nako kaufela ye ne ni sa patehangi ne ni banga kwa sibaka sa libapalelo, mi kacwalo balikani ba ka kaufela nee li babapali. Ha ne ni li wa lilimo ze 15, na fiwa lukanda lo lu fubelu lwa karate, mi hamulaho wa silimo na fiwa lukanda lo lu kunoñu. Ne ni li yo muñwi wa sikwata sa babapali ba karate be ne ba bapalile mwa likwinano za papali yeo za mwa Russia, ni ze mwahalaa linaha za mwa Europe ni Asia. Ne ku bonahala kuli lika ne li ka ba hande kwapili, kono ha ne ni na ni lilimo ze 17, bupilo bwa ka bwa cinca.

Na ni balikani ba ka ba bañwi ne lu ezize kezo ya bukebenga mi lwa tamiwa. Ne ni atulezwi ku pika lilimo ze peli mwa tolongo. Ku pila mwa tolongo ne ku li taata. Nihakulicwalo, ne ni boni Bibele lwa pili ha ne ni li mwa tolongo. Ne ni balile Genese, Lisamu, ni Testamente ye Nca. Mane ne ni petile tapelo ya Mulena mi ne ni i lapelanga nako kaufela busihu ha ne ni ya kwa ku lobala, ka ku nahana kuli ku eza cwalo mwendi ne ku ka ni tusa.

Ne ni lukuluzwi ka 2000, kono ne ni sa zibi ze ne ni bata ku eza mwa bupilo bwa ka mi ne ni ikutwa kuli ne ni sa zibi ze ne ni pilela. Na kalisa ku itusisa milyani ye kola. Ibato ba ka yona nako yeo, bo ma ba timela. Nee li bona be ne ni lata hahulu, mi lifu la bona ne li ni lobile hahulu pilu. Kono ne ni konile ku tuhela ku itusisanga milyani ye kola mi ne ni kalisize ku yanga kwa libapalelo hape. Hape na tutela kwa muleneñi wa Ivanovo. Teñi ko na fumana mubeleko mwa sintolo sa lico. Mutusi wa muzamaisi wa sintolo seo nee li yo muñwi wa Lipaki za Jehova. Musali yo a ni taluseza litaba ze ñwi ze mwa Bibele mi a lukisa kuli Paki yo muñwi a itutange Bibele ni na.

MO NE I CINCELIZE BUPILO BWA KA BIBELE: Ha ne ni nze ni ituta Bibele, ne ni susumelizwe hahulu ku ituta kuli Mulimu u ka fetula lifasi ku ba paradaisi, mi ne ni bata ku eza ze tokwahala kuli ite ni pile mwa Paradaisi yeo. Mi na lemuha kuli Jehova Mulimu u na ni likuka ze pahami za bata kuli batu ba pile ka zona. Mwa bupilo bwa ka, ne ni nahananga feela ka za ka. Kono na ituta kuli Jehova naa bata kuli ni nahanange ni za ba bañwi ni ku ba ni mikwa ye ne ni si na, ye cwale ka musa ni lilato la ku lata kozo.

Ha ne ni kalisize ku nahanisisa za ni ezelize Jehova kaufela—ze cwale ka ku fa Mwanaa hae sina sitabelo sa libi za ka—na eza licinceho mwa bupilo bwa ka kabakala buitumelo kwa lilato la hae. Ka mutala, kwa liñolo la Samu 11:5, ne ni itutile kuli Jehova u toile situhu. Kacwalo na tuhela ku  buhanga mafilimu a fa TV a bonisa lindwa ni sitoyo. Mi ne ni ikatalize ku tuhela ku bapala lipapali za lindwa. Tuto ye kwa liñolo la 1 Makorinte 15:33 ne i ni tusize ku lemuha kuli batu be ni itama silikani ni bona baa kona ku ni tusa ku eza ze nde kamba ku ni sinya. Taba ye bonisa buniti bwa tuto yeo ki ya kuli ne ni lengilwe mwa tolongo. Kacwalo na tuhela ku eza silikani ni batu be ne ba lata hahulu lipapali za lindwa.

MO NI TUSELIZWE: Ku swalisana ni Lipaki za Jehova ni ku ituta Bibele ku ni tusize ku ba mutu ya sepahala. Ka mutala, kwa liñolo la Maheberu 13:5, ne ni itutile kuli ni tokwa ku kolwa ka se ni na ni sona ni ku sa lata sifumu. Ku sebelisa kelezo ye ku ni tusize ku tuhela ku bulelanga buhata ni ku uzwa.

Ni tabelanga ku ba ni balikani. Kwamulaho, ne ni bonanga bulikani ha bu sinyeha kabakala mukwañuli kamba ku saba ba bañwi. Lipaki za Jehova ha li si ka petahala, kono ni itutile kuli li mamela likuka za Mulimu mi li latelela likelezo za hae ha li sebelisana ni batu ba bañwi. Mi cwale se ni ipumanezi balikani ba niti ba ba li Lipaki.

Ha ni zibi mo ne bu ka bela bupilo bwa ka kabe ne ni si ka ituta ku pila ka likuka za Bibele. Mwendi ne ni ka lengiwa hape mwa tolongo kamba ku tisa butata kwa batu ba bañwi ni ku ba nyandisa. Kono cwale ni na ni musali yo munde ni bana ba bashimani ba babeli, mi sina lubasi, lu fumana tabo mwa ku tusa batu ba bañwi ku ituta niti ka za Mulimu.

LITABA ZA BONA KA BUKUSWANI

LIBIZO: JOSÉ CARLOS PEREIRA DA SILVA

LILIMO ZA BUHULU: 31

NAHA KO NE BA PEPEZWI: BRAZIL

KWAMULAHO NE BA LWANANGA MWA MIKWAKWA

BUPILO BWA KA BWA KWAMULAHO: Ne ni hulezi mwa sibaka se si masila sa mwa Americana, ili kwa São Paulo. Ne lu sa koni ku fumana mezi a kenile a ku nwa mi ne lu si na limbuzi ze kenile. Sibaka seo ne si zibahala kuli ki sa mifilifili ni bukebenga.

Ha ne ni hula, na ba wa lindwa. Ne ni lwananga mwa mikwakwa, mi kacwalo batu ba mwa silalanda ne ba ni saba. Ne ni bonahala ku ba ya sabisa kabakala muapalelo wa ka ni mo ne ni ezezanga batu ba bañwi. Ne ni nwanga hahulu, mi hañata ne ni kolwanga maswe ku fitela ni welela. Sina bahulwani ba ka ba bashimani, ne ni itusisanga milyani ye kola. Mane muhulwanaa ka yo muñwi naa shwile kabakala ku itusisa mulyani o kola ka ku tula tikanyo.

MO NE I CINCELIZE BUPILO BWA KA BIBELE: Ha ne ni kopani ni Lipaki za Jehova, za ni bonisa mwa Bibele kuli Mulimu u ka fetula lifasi kaufela ku ba paradaisi. (Luka 23:42, 43; Sinulo 21:3, 4) Hape ne ni itutile kuli ba ba shwile ha ku na se ba ziba, kacwalo Mulimu haa cisangi batu ba ba maswe mwa lihele. (Muekelesia 9:5, 6) Lituto zeo ne li ni tusize hahulu. Ze ne ni itutile ka za Mulimu ne li ni tahiselize takazo ye tuna ya ku cinca mupilelo wa ka. Kono ne ku si ko ku bunolo ku eza licinceho, ili ku tuhela ku itusisanga  milyani ye kola, ku nwa maswe, ku lwana, ni ku itusisa lipulelo ze maswe.

Nihakulicwalo, ne ni susuelizwe hahulu ki manzwi a muapositola Paulusi, a ñozwi kwa 1 Makorinte 6:9-11. Liñolo leo li bonisa kuli Bakreste ba mwa linako za baapositola ni bona ne ba banga ni mikwa ye maswe ye ne ni na ni yona. Kono litimana zeo hape li li: “Ba bañwi ku mina ki se ne mu li sona; kono mu tapisizwe, kono mu kenisizwe, kono mu beilwe ba ba lukile ka Libizo la Mulena Jesu Kreste, ni ka Moya wa Mulimu wa luna.” Manzwi ao naa ni file sepo ya kuli ni na ne ni ka kona ku eza licinceho ze swanela mwa bupilo bwa ka kuli ni tabise Mulimu.

Ha ne ni kalisize ku swalisana ni Lipaki za Jehova, na kolwa kuli ki bona balapeli ba niti. Lipaki zeo ne li ziba ka za bupilo bwa ka bwa kwamulaho bwa bulwani, kono za ni amuhela ka musa ni ka lilato.

MO NI TUSELIZWE: Kabe ne ni si ka ituta Bibele ni ku cinca mupilelo wa ka, ne ni ka be ni shwile ka nako ye. Kono ne ni konile ku tusa yo muñwi wa bahulwani ba ka ba bashimani ku ituta Bibele ni ku tuhela ku itusisanga milyani ye kola. Mi hape ni susuelize bahabo na ba bañwi ku kalisa ku ituta Bibele. Ni tabile hahulu kuli ni konile ku neela bupilo bwa ka kwa ku sebeleza Mulimu, ya lu tokomela hahulu!

[Manzwi a fa likepe 9]

“Na ikatulela ku lapelanga pili ni si ka wela kale mwa muliko ku fita ku no lapelanga hamulaho wa ku komiwa ki muliko, mi nto yeo ne i ni tusize hahulu kuli ni kone ku cinca mikwa ya ka”