Bufumu bo bu Zwa ku Mulimu

HAIBA mwa sepahala ku Mulimu, kana u ka mi fuyola ka ku mi fa bufumu? Wa kona ku mi fa bona, kono mwendi haa na ku mi fa bufumu bo mu libelela ku fiwa. Ha mu nyakisise mutala wa Maria, mahe Jesu. Lingeloi le li bizwa Gabriele ne li bonahezi ku yena mi la mu bulelela kuli naa “filwe sishemo” ki Mulimu ni kuli naa ka pepa Mwanaa Mulimu. (Luka 1:28, 30-32) Kono naa si ka fuma. Maria ha naa tahisize sitabelo hamulaho wa ku pepwa kwa Jesu, naa tahisize sitabelo “sa maiba a mabeli, kamba sa tunkwilimba to tubeli,” ili sitabelo se ne ba fanga batu ba ba shebile ku Jehova.—Luka 2:24; Livitike 12:8.

Kana ku sheba kwa Maria ne ku talusa kuli naa si ka fuyolwa ki Mulimu? Batili, kakuli Maria ha naa izo potela Elizabeta wa habo yena, “Elizabeta a tala Moya o Kenile; a tumusa kwa linzwi, mi a li: [Maria] u fuyozwi mwahalaa basali, mi se si mwa mba ya hao, ni sona si fuyozwi.” (Luka 1:41, 42) Maria naa na ni tohonolo ya ku ba mahe Mwanaa Mulimu ya latwa.

Mane ni yena Jesu naa si mufumi. Naa pepezwi mwa sibaka se si shebile mi naa hulisizwe ki bashemi ba babotana, mi ni yena naa zwezipili ku ba mubotana mwa bupilo bwa hae kaufela fa lifasi. Nako ye ñwi naa taluselize muuna yo muñwi ya naa bata ku ba mulutiwa wa hae, kuli: “Bo-luwawa ba na ni misima, ni linyunywani za lihalimu li na ni liyaleto; kono Mwanaa mutu haa na mo a ka samela toho fateñi.” (Luka 9:57, 58) Kono ku taha kwa Jesu Kreste fa lifasi ne ku konisize balutiwa ba hae ku ba ni bufumu bo butuna. Muapositola Paulusi naa ñozi kuli: “U ikezize mubotana kabakala mina, kuli mu fume ka bubotana bwa hae.” (2 Makorinte 8:9) Ki bufumu bo bu cwañi bwa naa file Jesu kwa balutiwa ba hae? Mi ki bufumu bo bu cwañi bo lu na ni bona kacenu?

 Ki Bufumu bo bu Cwañi?

Hañata bufumu bwa lifasi bu palelwisanga batu ku ba ni tumelo, kakuli mutu ya fumile u kona ku sepa mali a hae ku fita ku sepa Mulimu. Jesu naa ize: “Ku ka ba taata hahulu ku ba mali ku kena mwa mubuso wa Mulimu!” (Mareka 10:23, NW) Kacwalo, ku bonahala kuli bufumu bwa naa file Jesu kwa balutiwa ba hae nee si bwa ku ba ni mali a mañata.

Mane Bakreste ba bañata ba mwa miteñi ya baapositola ne ba li babotana. Muuna ya naa pepilwe a li sihole ha naa kupile mali, Pitrosi naa mu alabile kuli: “Ha ni na silivera ni gauda; kono se ni na ni sona ni ku fa sona: ka Libizo la Jesu Kreste wa Nazareta, yema, u zamaye.”—Likezo 3:6.

Manzwi a mulutiwa Jakobo ni ona hape a bonisa kuli batu ba bañata ba ne ba li mwa puteho ya Bakreste nee li babotana. Naa ñozi kuli: “Banabahesu ba ba latiwa, a mu teeleze. Ha ni li, Mulimu u ketile babotana ba lifasi, kuli ba fume tumelo, mi ba ce sanda sa mubuso waa sepisize Mulimu ba ba mu lata?” (Jakobo 2:5) Hape, muapositola Paulusi naa bulezi kuli nee si ba bañata “ba ba na ni butali ka mukwa wa batu” kamba “ba ba maata” kamba “ba lusika lwa bulena” ba ne ba bizelizwe mwa puteho ya Sikreste.—1 Makorinte 1:26.

Haiba bufumu bwa naa file Jesu kwa balateleli ba hae nee si bwa ku ba ni mali a mañata, ki bufumu bo bu cwañi bwa naa ba file? Mwa liñolo la naa ñolezi puteho ya kwa Smirna, Jesu naa ize: “Ni ziba ñalelwa ya hao, ni bubotana bwa hao, (bo u mufumi).” (Sinulo 2:8, 9) Bakreste ba kwa Smirna niha ne ba li babotana, ne ba na ni bufumu bwa butokwa hahulu ku fita silivera kamba gauda. Ne ba fumile kabakala tumelo ya bona ni ku sepahala kwa bona ku Mulimu. Tumelo ki ya butokwa kakuli “hasi ya batu kamukana.” (2 Matesalonika 3:2) Mane Mulimu u nga batu ba ba si na tumelo kuli ki babotana.—Sinulo 3:17, 18.

 Bufumu bo bu Tiswa ki ku ba ni Tumelo

Kono tumelo ki ya butokwa cwañi? Ba ba na ni tumelo ku Mulimu ba tuswa ki “bufumu bwa musa wa hae, ni bwa buiswalo bwa hae, ni bwa pilu-telele ya hae.” (Maroma 2:4) Hape ba ‘swalelwa lifoso’ za bona kabakala kuli ba lumela sitabelo sa Jesu se si liulula. (Maefese 1:7) Hape ba na ni butali bo bu fiwa ki “linzwi la Kreste” ku ba ba na ni tumelo. (Makolose 3:16) Ha ba lapela ku Mulimu ka tumelo, “kozo ya Mulimu ye fita kutwisiso kaufela” i buluka lipilu za bona ni mihupulo ya bona, mi i ba tusa ku kolwa ka se ba na ni sona, ni ku ba tahiseza tabo.—Mafilipi 4:7.

Kwandaa limbuyoti zeo, batu ba ba na ni tumelo ku Mulimu ka Mwanaa hae, Jesu Kreste, hape ba na ni sepo ye nde ya ku pila ku ya ku ile. Jesu Kreste naa bulezi manzwi a, a zibahala hahulu: “Mulimu u latile lifasi hahulu, mane u li file Mwanaa hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” (Joani 3:16) Sepo yeo ya butokwa ya tiyanga mutu haa ba ni zibo ye nepahezi ya ku ziba Ndate ni Mwana, kakuli Jesu hape naa ize: “Bupilo bo bu sa feli, kikuli ba ku zibe, Wena, Mulimu a nosi wa niti, ni yo lumile, yena Jesu Kreste.”—Joani 17:3.

Hañata limbuyoti za lu fanga Mulimu ki ze lu tusa ku tiisa bulikani bwa luna ni yena, mi hape ku na ni limbuyoti ze ñwi ze lu tusa ku ba ni buikangulo ni maikuto a mande. Ha mu nyakisise mutala wa Dalídio ya pila kwa Brazil. A si ka ba kale ni zibo ye nepahezi ka za mulelo wa Mulimu, naa nwanga hahulu bucwala. Mukwa wo ne u tahisize kuli a si ke a pila hande ni lubasi lwa hae. Hape naa si na hande masheleñi. Cwale a kalisa ku ituta Bibele ni Lipaki za Jehova mi a eza licinceho ze tuna mwa bupilo bwa hae.

Za naa itutile Dalídio mwa Bibele ne li mu tusize ku tuhela mikwa ya hae ye maswe. Naa ezize hahulu zwelopili ka ku pila ka ku ya ka za naa itutile mwa Bibele kuli mane naa ize, “Ne ni yanga kwa mupanda ni mupanda; kono cwale ni yanga fa ndu ni ndu.” Naa kalile ku itusisanga nako ya hae ye ñata mwa musebezi wa ku kutaza Linzwi la Mulimu. Tukufalelo yeo ne i mu tusize kuli a ikangule ni kuli a itusisange hande mali a hae. Dalídio naa ize, “Mali a ne ni itusisanga kwa ku leka bucwala, ni itusisa ona cwale kwa ku tusa batu ba bañwi kamba ku leka lika ze ni tokwa.” Hape saa na ni balikani sakata kabakala ku swalisana ni batu ba ba na ni mubonelo o swana ni wa hae wa ku nga lika sina mwa li ngela Mulimu. Dalídio cwale u na ni mwangalwa ni tabo, ze fita nto ifi kamba ifi ya naa sa koni ku nahana kuli wa kona ku ba ni yona a si ka ziba kale Mulimu.

Mutala wa mutu yo muñwi ya naa tusizwe ku ba ni bupilo bo bunde ka ku ba ni tumelo ku Jehova Mulimu ki wa Renato. Ha mu bona tabo ya na ni yona kacenu, ku taata ku lumela kuli naa eziswe hahulu maswe mwa bupilo bwa hae. Hamulaho feela wa ku pepwa, a yubekwa ki bo mahe. Ne ba mu siile mwa mukotana o noo li mwatasaa sipula sa mabala, inzaa ñwalauzwi maswe mi kakombokombo ka hae ne ka si ka wa kale. Basali ba babeli ha ne ba fita ba bona mukotana wo, inzoo nyanganya mwatasaa sipula seo. Pili ne ba nahana kuli ku na ni mutu ya naa siile kakaze mwa mukotana wo. Ha ba se ba lemuhile kuli nee li mbututu ye sa zo pepwa ye nee li mwa mukotana wo, kapili-pili ba i matiseza kwa sipatela se ne si li bukaufi kuli i yo fiwa tuso.

A li muñwi kwa basali bao nee li yo muñwi wa Lipaki za Jehova, mi naa bulelezi Paki yo muñwi wa libizo la Rita ka za mbututu yeo. Limbututu li sikai za Rita ne li fitelezi, mi naa na  ni feela mwana a li muñwi wa musizana. Naa lata hahulu ku ba ni mwana wa mushimani, kacwalo a añula Renato.

Rita naa bulelezi Renato inge a sa li yo munyinyani kuli nee si yena mahe ya naa mu pepile. Kono naa mu babalezi ka lilato ni ku mu luta likuka za Bibele. Renato ha naa nzaa hula, a kalisa ku tabela Bibele. Mi hape a itumela hahulu kabakala nzila ye komokisa ya naa pilisizwe ka yona. Nako kaufela ha balanga manzwi a, a walisamu Davida, u lotisanga mioko: “Ndate ni me, niha ba ka ni tuhela, Muñaa Bupilo u ka ni nopa.”—Samu 27:10.

Renato naa bonisize buitumelo bwa hae ku Jehova kabakala za mu ezelize kaufela, ka ku kolobezwa ka 2002, mi ka 2003 a kalisa ku itusisanga hahulu nako ya hae mwa musebezi wa ku kutaza. Ni ka nako ye ha zibi bo ndatahe ni bo mahe, mi mwendi haa na ku ba ziba ni kamuta. Kono Renato u ikutwa kuli ye ñwi ya limpo za butokwa hahulu za amuhezi ki ku ziba Jehova ni ku lumela ku yena sina Ndatahe ya mu lata ni ku mu babalela.

Mwendi mu lakaza ku iswala bulikani bo tiile ni Mulimu bo bu kona ku mi tusa ku pila bupilo bo bunde. Batu kaufela, ba ba fumile ni babotana, baa kona ku ba ni bulikani bo bu cwalo ni Jehova Mulimu ni Mwanaa hae, Jesu Kreste. Mwendi bulikani boo ha bu na ku mi fumanisa bufumu bwa masheleñi, kono bu ka mi fumanisa mwangalwa ni tabo, ili ze mu sa koni ku leka ka masheleñi. Manzwi a ñozwi kwa Liproverbia 10:22 ki a niti luli, a li: “Ku fuyolwa ki Muñaa Bupilo ku fumisa mutu; ku ipilaeza mwa pilu ha ku tusi se siñwi.”

Jehova Mulimu u tokomelanga batu ba ba taha ku yena. U bulela kuli: “Mawe, kabe noo utwile milao ya ka! noo kabe u pilile mwa kozo ye swana inge nuka; ze lukile za hao ne li kabe li bonahala sina mandinda a mwa liwate.” (Isaya 48:18) Mi u sepisa kuli ba ba taha ku yena ka pilu ye kenile ba ka fuyolwa hahulu: “Mupuzo wa ku ikokobeza ni ku saba Mulimu, ki bufumu, ni ku kutekiwa, ni bupilo.”—Liproverbia 22:4.

[Manzwi a fa likepe 14]

Ku ba ni tumelo ku Mulimu ku tahisa kozo, buiketo, ni tabo

[Siswaniso se si fa likepe 13]

Lubasi lwa Jesu niha ne lu shebile, ne lu fuyozwi hahulu ki Mulimu