Mu Itute Linzwi La Mulimu

Kana ku na ni Sepo ya Kuli Bafu ba ka Zuha?

Taba ye i nyakisisa lipuzo ze ne mu kana mu ipuzize mi i bonisa ko mu kona ku fumana likalabo mwa Bibele ya mina. Lipaki za Jehova ba ka tabela ku nyakisisa ni mina likalabo ze.

1. Ki sepo mañi ye lu na ni yona ka za bafu?

Jesu ha na fitile mwa Betania bukaufi ni Jerusalema, mulikanaa hae Lazaro naa sa shwile ka mazazi a mane. Jesu a ya kwa mabita ni Mareta ni Maria, ili likaizeli za Lazaro. Hañihañi, sikwata sa batu sa kubukana. Mu nahane feela tabo ye ne ba bile ni yona bo Mareta ni Maria, Jesu ha na zusize Lazaro kwa bafu.—Mu bale Joani 11:20-24, 38-44.

Mareta naa lumela kuli ba ba shwile ba ka zuha. Batanga ba Jehova ba ba sepahala ba ziba ku zwa feela kale kuli Mulimu kwapili u ka zusa bafu kuli ba to pila fa lifasi hape.—Mu bale Jobo 14:14, 15.

2. Bafu ba mwa muinelo mañi?

Nihaike kuli maata a bupilo, kamba “moya,” kona a tahisa kuli batu ni lifolofolo ba pile, luna batu ha lu mioya ye pilanga feela mwa mubili wa nama. (Muekelesia 3:19; Genese 7:21, 22) Lu libupiwa za nama ze bupilwe fa liluli. (Genese 2:7; 3:19) Booko bwa luna ha bu shwa, milelo ya luna ya fela. Kacwalo, Lazaro ha mano zusiwa, ha ku na za na bulezi ka za muinelo wa hae ha na shwile bakeñisa kuli ba ba shwile ha ba na se ba ziba.—Mu bale Samu 146:4; Muekelesia 9:5, 10.

Kaniti, bafu ha ba nyandi. Kacwalo, tuto ya kuli Mulimu wa tukufazanga batu hamulaho wa ku shwa ki ya buhata. Tuto yeo i sinya libizo la Mulimu. Muhupulo wa ku tukufaza batu mwa mulilo u nyenyisa Jehova.—Mu bale Jeremia 7:31.

  3. Kana lwa kona ku bulela ni bafu?

Bafu ha ba koni ku bulela. (Samu 115:17) Mangeloi a maswe ha bulela ni batu, a kona ku ipumisa ku ba mutu ya shwile. (2 Pitrosi 2:4) Jehova wa hanisa batu ku lika ku ambola ni bafu.—Mu bale Deuteronoma 18:10, 11.

4. Ki bomañi ba ba ka zusiwa?

Mwa lifasi le linca le li taha, batu ba bañata ba ba mwa mabita ba ka kutisezwa kwa bupilo. Nihaiba batu ba ne ba ezanga lika ze maswe bakeñisa kuli ne ba sa zibi Jehova ba ka zusiwa.—Mu bale Luka 23:43; Likezo 24:15.

Batu ba ba ka zusiwa ba ka ituta niti ka za Mulimu mi ba ka bonisa tumelo ya bona ku Jesu ka ku mu utwa. (Sinulo 20:11-13) Ba ba ka zusiwa ili ba ba ka eza lika ze nde ba ka ikola bupilo bo bu sa feli fa lifasi. Nihakulicwalo, ba bañwi kwa batu ba ba ka zusiwa ba ka zwelapili ku eza lika ze maswe. Bakeñisa kuli batu bao ba ka atulwa ka ku ya ka likezo za bona ze maswe, zuho ya bona i ka ba ‘zuho ya katulo.’—Mu bale Joani 5:28, 29.

5. Zuho ya bafu i lu lutañi ka za Jehova?

Zuho ya bafu ya konahala bakeñisa kuli Mulimu naa lumile Mwanaa hae ku to lu shwela. Kacwalo, zuho ya bafu i bonisa lilato ni sishemo se situna sa Jehova ku luna.—Mu bale Joani 3:16; Maroma 6:23.

Kuli mu bale litaba ze ñata ka za taba ye, mu bone likauhanyo 6 ni 7 za buka ye, ye hatisizwe ki Lipaki za Jehova.

[Siswaniso se si fa likepe 26]

Adama naa bupilwe fa liluli