Mu Itute Linzwi La Mulimu

Ki Kabakalañi Mulimu ha Tuhelela Bumaswe ni Manyando?

Taba ye i nyakisisa lipuzo ze ne mu kana mu ipuzize mi i bonisa ko mu kona ku fumana likalabo mwa Bibele ya mina. Lipaki za Jehova ba ka tabela ku nyakisisa ni mina likalabo ze.

1. Bumaswe ne bu kalile cwañi?

Bumaswe fa lifasi ne bu kalile, Satani ha naa bulezi buhata bwa pili. Satani naa si ya maswe ha naa bupilwe. Naa li lingeloi le li petehile, kono na si ka ‘ina mwa niti.’ (Joani 8:44) Naa hulisize takazo ya hae ya ku bata ku lapelwa, ili kezo ye ne swanela ku fiwa feela ku Mulimu. Satani naa pumile musali wa pili, yena Eva, mi a mu kolwisa kuli a utwe yena ku fita ku utwa Mulimu. Adama naa swalisani ni Eva mwa ku sa utwa Mulimu. Katulo ya Adama i tahisize manyando ni lifu.—Mu bale Genese 3:1-6, 17-19.

Satani naa kwenuhezi bubusi bwa Mulimu ka ku bulelela Eva kuli a si ke a utwa Mulimu. Batu ba bañata ba swalisani ni Satani mwa ku hana Mulimu sina Mubusi wa bona. Kacwalo, Satani ki kale a ba “mulena wa lifasi le.”—Mu bale Joani 14:30; Sinulo 12:9.

2. Kana Mulimu naa si ka bupa hande lika?

Mangeloi ni batu ba ne ba bupilwe ki Mulimu ne ba kona ku latelela litaelo za Mulimu ka ku petahala. (Deuteronoma 32:5) Mulimu naa lu bupile ni tukuluho ya ku iketela ku eza ze nde kamba ze maswe. Tukuluho yeo i lu konisa ku bonisa lilato ku Mulimu.—Mu bale Jakobo 1:13-15; 1 Joani 5:3.

3. Ki kabakalañi Mulimu ha tuhelezi manyando?

Ku zwa feela mwa simu ya Edeni, Jehova u tuhelezi bukwenuheli kwa bubusi bwa hae ka nakonyana. Ki kabakalañi? Kuli a bonise kuli mibuso ya lifasi ha i koni ku busa hande batu ku si na tuso ya hae. (Jeremia 10:23) Hamulaho wa lilimo ze 6,000 ku zwa feela kwa makalelo a bupilo bwa batu, taba ya bubusi bwa Jehova ki kale i tatululwa. Babusi ba butu ba palezwi ku feza lindwa, bukebenga, ketululo, ni matuku.—Mu bale Muekelesia 7:29; 8:9; Maroma 9:17.

Ka ku shutana, batu ba ba nga Mulimu sina Mubusi wa bona ba tuseha. (Isaya 48:17, 18) Ona cwale-cwale fa, Jehova u ka felisa mibuso kaufela ya butu. Ki batu feela ba ba keta ku busiwa ki Mulimu, ba ba ka pila mwa lifasi.—Isaya 2:3, 4; 11:9; mu bale Daniele 2:44.

  4. Pilu-telele ya Mulimu i fa batu kolo mañi?

Satani naa bulezi kuli batu ha ba na ku zwelapili ku ipeya ku utwa Mulimu ka busepahali. Pilu-telele ya Mulimu i fa batu kaufela kolo ya ku bonisa haiba ba bata ku busiwa ki Mulimu kamba ku busiwa ki batu. Ku likana ni mo lu pilela bupilo bwa luna, lwa kona ku bonisa hande ye lu bata kuli a lu buse.—Mu bale Jobo 1:8-11; Liproverbia 27:11.

5. Lu kona ku keta cwañi Mulimu kuli a be Mubusi wa luna?

Lu kona ku keta Mulimu kuli a be Mubusi wa luna ka ku batisisa bulapeli bwa niti bo bu tomile fa linzwi la hae, yona Bibele, ni ku pila ka ku lumelelana ni bulapeli bo. (Joani 4:23) Hape lu ambuka ku ikenya mwa litaba za naha ni mwa lindwa, sina mwa naa ezelize Jesu.—Mu bale Joani 17:14.

Satani u itusisanga maata a hae kwa ku susueza batu ku eza likezo ze maswe. Ha lu ambuka likezo ze cwalo, balikani ba luna ba bañwi ni bahabo luna ba kona ku lu sheununa kamba ku lu lwanisa. (1 Pitrosi 4:3, 4) Kacwalo, lu swanela ku eza keto. Kana lu ka swalisana ni batu ba ba lata Mulimu? Kana lu ka utwa milao ya Mulimu ye butali ili ye lilato? Haiba lu eza cwalo, lu bonisa kuli Satani naa pumile ha naa bulezi kuli ha ku na mutu ya naa ka utwa Mulimu.—Mu bale 1 Makorinte 6:9, 10; 15:33.

Kuli mu bale litaba ze ñata ka za taba ye, mu bone kauhanyo 11 ya buka ye, ye hatisizwe ki Lipaki za Jehova.

[Siswaniso se si fa likepe 16]

Adama naa ezize keto ye maswe

[Siswaniso se si fa likepe 17]

Liketo ze lu eza li bonisa haiba lu bata kuli Mulimu a be Mubusi wa luna