Ne ni Nahananga za ku yo Sebeza Mwa Libuhelo la Lipapali

Ka mo li Kandekezwi ki bo Zoya Dimitrova

Ha ne ni li wa lilimo ze 15, nto ye ne ni nahananga hahulu ne i ezahalile luli, ili ku ikola ku zamaya-zamaya ni sikwata sa batu ba ne ba bapala lipapali ze shutana-shutana. Mi ka la September 4, 1970, kwa ezahala kozi. Nako ye ñwi ne ni sweli ku minyaukisa mubili wa ka, ka bukwala mwa mwahalimu, mi ha ni yo kumbuluka se ni wela fafasi.

NE NI pepilwe la December 16, 1952, mi ne ni pila ni bashemi ba ka ni kaizelaa ka mwa Sofia, ili mwa naha ya Bulgaria. Ka nako yeo Bulgaria ne li naha ya Komyunizimu, mi ne i zwafisa batu ku lapela nihaike kuli batu ne ba na ni bulapeli bwa bona. Buñata bwa batu ne ba sa lumeli ku Mulimu, mi ba ne ba lumela, buñata bwa bona ne ba sa zibahazi tumelo ya bona fa nyangela. Nihaike kuli lubasi lwa hesu ne lu ipapatanga kuli lu lapela kwa Orthodox, ne ni si ka lutiwa za Mulimu ha ne ni sa li mwanana, mi ne ni sa nahanangi ka za Mulimu.

Ku zwa feela kwa bwanana bwa ka, ne ni ikolanga lipapali za mifuta kaufela ze tiisa mubili sihulu za ku minyaukisa mubili. Ha ne ni li wa lilimo ze 13, muuna yo muñwi a to punya fa sikolo sa luna mi naa bata-bata musizana ya na ka kona ku lutiwa ku minyaukisa mubili ka bukwala. Bo muluti ba ka ba ne ba lu lutanga lipapali ze tiisa mubili ba akaleza kuli ku ketiwe na. Ne ni nyakalalile hahulu ha ne ni isizwe ka mota ye tula hahulu ya yo muhulu wa kampani kuli ni yo tatubiwa ni ku likiwa ki sikwata sa baluti. Ne ni tabile hahulu ha ne ni ketilwe. Ao ne li makalelo a ku lutiwa ka taata ku twaeza mubili ko ne ku tandile lilimo ze fitelela ze peli. Ha ne ni kwanisize lilimo ze 15, na feza lituto zeo, mi na kala bupilo bwa ku zamaya-zamaya ni sikwata sa batu ba ne ba bapala lipapali ze shutana-shutana. Kwa makalelo, ne lu potanga feela mwa naha ya Bulgaria, mi hamulaho lwa kala ku yanga kwa linaha ze cwale ka Algeria, Hungary, ni naha ye ne banga Yugoslavia.

Mwa lilimo ze talu zeo kaufela, ne ni ikola bupilo. Kozi ye ni talusize kwa makalelo a taba ye, ne i ezahalile ha ne ni li kwa Titov Veles, mwa naha ya Macedonia. Ne ni sweli ku minyaukisa mubili wa ka mwahalimu, ili fapilaa sikwata sa batu ba ne ba ni buha. Ye ne ni bapala ni yena, na nyendaela mwahalimu mi na sweli ku ni posanga mwahalimu ni ku bona teñi kuli wa ni akwela. Zazi leo ka bumai, ha ni posiwa mwahalimu, na palelwa ku to swala kwa mazoho a hae, kacwalo mihala ye ne ni tamelezwi ya ku ni sileleza ya pumeha mi na wela fafasi, ili limita ze 6 ku zwa mwahalimu. Na matisezwa kwa sipatela, mi baalafi ba yo fumana kuli ne ni lobehile lizoho, makupo, ni mukokoto. Ne ni mbemukile ka mazazi a sikai mi ne ni sa hupuli ze ne ezahezi. Ha ne ni ikutwile hande hanyinyani, na lemuha kuli ne ni omelezi luñañali ku kalela mwa teka ku liba kwa mahutu. Bakeñisa kuli ne ni sa li mwanana, na isepisa kuli hamulaho wa likalafo, ni ka fola, ni ku zamaya hape mwendi mane ni ku kuta ku yo ezanga lipapali za ku minyaukisa mubili.

 Mwa lilimo ze peli ni licika ze ne tatami, na fiwa likalafo mwa lipatela ze shutana-shutana, mi na zwelapili ku ba ni sepo ya kuli ni ka fola. Kwa mafelelezo na lumela kuli ha ni sa kona ku bapala lipapali za ku minyaukisa mubili. Nako ye, bupilo bwa ka bu shutana hahulu ni bupilo bo ne ni nahananga—se ni itusisa sipula sa mawili.

Ku Kala Bupilo bo Bunca

Hamulaho wa ku pila bupilo bwa ku mbindana, ne ni nahana kuli cinceho ye, ne i ka tatafaza bupilo bwa ka. Bakeñisa ku felelwa ki sepo, na kenelwa ki maswabi a matuna. Cwale mwa silimo sa 1977, mutangana ya bizwa Stoyan a to ngongota fa munyako. Ha ne ni lemuhile kuli mutangana yo ki muhulwanaa mutu ye ne ni sebezanga ni yena, na mu kupa kuli a kene mwa ndu. Ha ne lu nze lu ambola, mutangana yo a ni buza ka za haiba ni na ni sepo ya ku fola. Bakeñisa kuli ne ni felezwi ki sepo, na mu alaba kuli ne ni si na sepo ya kuli ni ka fola. Ha naa ni bulelezi kuli Mulimu ki yena feela ya kona ku ni tusa, na mu alaba ka bunyemi kuli: “Haiba Mulimu u teñi, ki kabakalañi ha ni inzi mwa muinelo wo?”

Puzo ya ka ne i tahisize kuli Stoyan ya naa sa zo ba Paki ya Jehova ka nako ya na belekela kwa United States sina mubapali wa ku minyaukisa mubili a be ni kolo ya ku ni taluseza ka za lisepiso ze nde za kwapili ze mwa Bibele. Ne ni tabile hahulu ku ituta kuli lifasi li tuha li ba paradaisi. Ne ni tabisizwe hahulu ki sepiso ya kuli “lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku.” (Sinulo 21:4) Ne ni nyolelwa ku ikangula hape! Kapili-pili na lumela ku ituta Bibele kamita. Kacwalo na kala bupilo bo bunca. Ne ni tabile hahulu kuli ne ni fumani sepiso ya niti!

Ne ni nyolelwanga ku ituta Bibele sunda ni sunda. Ne ni kalile ku itutanga ni Stoyan, mi hasamulaho Paki ya sishemo wa libizo la Totka a to zwisezapili tuto ya luna ya Bibele. Ka tuso ya Totka, na kalisa ku utwisisa niti ya mwa Bibele, mi na neela bupilo bwa ka ku Jehova Mulimu. Ka nako yeo, mwa Sofia ne ku si na mutu ya na fitile ku ze konisa za ku kolobeza, kacwalo ne ni na ni ku libelela muzwale ya na zwa kwa Macedonia. Ne ni kolobelizwe la September 11, 1978, mwa sitapelo sa mwa ndu, ibatoo ba hamulaho wa silimo ku zwa zazi le ne ni kalile ku ituta Bibele. Ne ni tabile hahulu ha ne ni kolobelizwe sina yo muñwi wa Lipaki za Jehova, mi cwale se ni ziba ze ni pilela.

Niti ye ne ni itutile mwa Bibele ne i cisa mwa sifuba sa ka sina mulilo. Ne ni bulelelanga kaufela ba ne ba tahanga kwa ndu ya ka, ka za sepo ye nde ye ne ni sa zo ituta. Kono ka bumai, ha ku na ya na iseza pilu ku ze ne ni bulela mwendi ka ku nahana kuli ne ni si ka iketa hande mwa booko kabakala kozi ye ne ni ipumani ku yona.

Bufosi bo Butuna

Ka nako yeo, musebezi wa Lipaki za Jehova ne u kwalilwe mwa Bulgaria, mi ne ku na ni Lipaki ba sikai feela mwa naha kaufela. Ne ku si na  mikopano ya puteho ko ne ni kona ku kopana, mi ne ku li taata hahulu ku swalisana ni batu ba bañwi ba ne ba na ni litumelo ze swana ni za ka. Zeo kaufela, ku kopanyeleza cwalo ni bufokoli bwa ka bwa ku sa lemuha bumaswe bwa ku eza sango ni batu ba ba sa pili ka ku lumelelana ni likuka za Bibele ne li ni tahiselize ku eza bufosi bo butuna.

Na sisitwa ki lizwalo, mi na utwa butuku kwa pilu kabakala ku fulalela Jehova Mulimu. Bakeñisa maswabi e ne ni ikutwa, na lapela ku Jehova ni ku mu kupa kuli a ni swalele. Hamulaho wa ku tusiwa ki maeluda ba Sikreste ba ba lilato, na ba hape ni silikani se si tiile ni Jehova mi na fumana hape tabo mwa ku mu sebeleza. Na itebuha hahulu tohonolo ya ku sebeleza Jehova ka lizwalo le li kenile ni ku swalisana ni kopano ya hae ye kenile!

Ni Tabile ku si na Taba ni Mapalelwi

Kozi ye ne ezahezi lilimo ze 40 kwamulaho ne i ni palelwisize ku zamaya-zamaya ni ku bapala lipapali ze shutana-shutana, mi ne i ni tahiselize kuli ni itusisange sipula sa mawili. Niteñi, ha ni iheta ha ni inyazi kuli ni palezwi za ku eza mwa bupilo. Niti ya mwa Bibele i ni tusize ku lemuha kuli tabo ni buikolwiso mwa bupilo bo ne ni fumani kabakala ku eza lipapali za ku minyaukisa mubili ne li lika ze sa ineleli. Ni iponezi maswabi-tuna e ba bile ni ona mwa bupilo batu bo ne ni sebezanga ni bona ba ne ba zwezipili mwa lipapali za ku minyaukisa mubili. Haili na, ni fumani nto ya butokwa hahulu, ili sona silikani se si tiile ni Mubupi wa ka, Jehova Mulimu. Ku ba ni silikani ni Jehova ku ni tahiselize tabo ye tuna ku fita ye ne ni ka fumana ha ne ni ka zwelapili mwa lipapali za ku minyaukisa mubili.

Fahalimwa zeo kaufela, ni bile ni tabo ka ku bona batu ba bañwi ba bañata ha ba ituta niti ya mwa Bibele ni ku neela bupilo bwa bona ku Mulimu ya lilato, Jehova. Ha ne ni kalile ku ituta Bibele ka 1977, ne ku na ni feela Lipaki za Jehova ba sikai mwa Bulgaria. Nihaiba kwa mafelelezo a silimo sa 1991, Lipaki za Jehova ha ne ba ñolisizwe lwa pili ka mulao ka nako ye ne i wile puso ya ba Komyunizimu, mwa naha kaufela ne ku na ni feela Lipaki ba ne ba sa fiti fa 100. Ni ya tabile hahulu ku bona kekezeho ya bahasanyi ba Mubuso ka nako ya cwale kuli se i batoo ba 1,800!

Mwa Bulgaria ku sa na ni musebezi wo mutuna wo sa tokwa ku eziwa. Batu ba bañata ba bata  ku ziba Linzwi la Mulimu. Taba yeo i pakwa ki palo ye tuna ya baputehi ba 3,914 ba ne ba tilo fumaneha kwa Kupuzo ya lifu la Kreste mwa silimo sa 2010. Na nyakalalanga ha ni bona bupaki bwa kuli Jehova u fuyauzi musebezi wo no kalile hanyinyani-hanyinyani mwa Bulgaria. Ni iponezi “mutu yo munyinyani” ha fetuha ku ba “sicaba se si maata” sina mo ne ku polofitezwi kwa Isaya 60:22.

Nto ye ñwi ye ne ni tiselize hahulu tabo mwa bupilo ki ku zwisiwa kwa Bibele ya New World Translation of the Holy Scriptures mwa puo ya Si-Bulgaria. Bibele ye, ne i zwiselizwe kwa Sofia mwa kweli ya August 2009 kwa Mukopano wa Sikiliti wo no na ni toho ya taba ye li, “Mu Zwelepili ku Tona!” Ku zwisiwa kwa Bibele mwa puo ya ka ne li nto ye ne ni nyolelwanga hahulu! Ni sepa kuli Bibele ye, i ka tusa batu ba bañata mwa Bulgaria ku ziba niti ye mwa Bibele.

Nihaike kuli buhole bwa ka bu ni palelwisanga ku kutaza taba ye nde ya Mubuso wa Mulimu ka mo ni latela, ni fumana tabo ye tuna mwa ku ambola niti ya mwa Bibele ni batu be ni yahile mabapa ni bona hamohocwalo ni batu kaufela ba ba to ni potelanga. Nako ye ñwi, ha ne ni boni musali ye ni pila mabapa ni yena inze a fita, na mu mema kuli a to ni potela. A to ni potela mi hamulaho wa ku ambolisana ni yena ka za Bibele, a lumela ku ituta Bibele. Ne ni tabile hahulu ku bona musali yo ha fita fa ku kolobezwa ni ku ba kaizelaa luna wa kwa moya. Se ni bile ni tohonolo ya ku tusa batu ba bane ku fita fa ku neela bupilo bwa bona ku Jehova.

Ni fumani tabo ye tuna ni susuezo ka ku kopananga ni mizwale ni likaizeli ba ba fitelela 100 kwa mikopano ya luna ya Sikreste ya kamita, ili ba se ba li feela sina lubasi. Kabakala ku pila mwa naha mo ku si na lisebeliso ze kona ku tusa lihole ni basupali ku zamaya-zamaya, ni fumananga hahulu taata ku ya kwa mikopano ya puteho. Nihakulicwalo, ni itebuha hahulu pabalelo ye lilato ya ni bonisanga muzwale yo muñwi wa mukulwani. Nako ni nako u to ni nganga ni ku ni kwelisa mwa mota ya hae ku ni isa kwa Ndu ya Mubuso, mi u yo ni tulukisanga ni ku ni isa mwa Ndu ya Mubuso, mi mikopano ha i fela, wa ni kutisanga kwa ndu. Na itumela hahulu ku Jehova ka ku ni fa tohonolo ya ku ba yo muñwi wa lubasi lwa kwa moya lo lu lilato!

Ha ni iheta, ni bona kuli bupilo bwa ka bu cincize ku shutana ni ze ne ni nahananga ha ne ni sa li mukulwani. Ku sebeleza Jehova ku ni tahiselize hahulu tabo cwale ni ku ni fa sepo ye nde ya za kwapili. Ni tabela hahulu sepiso ya Mulimu ya kuli mwa paradaisi ya fa lifasi, “ya toza u ka tula sina lizwii.” (Isaya 35:6) Ni nyolezwi ka buikolwiso ha ni ka tula mwa sipula sa ka sa mawili ili fo ni ka kutisezwa buikangulo sakata.

[Manzwi a fa likepe 20]

“Ni fumani tabo ye tuna ni susuezo ka ku fumanehanga kamita kwa mikopano ya Sikreste”

[Manzwi a fa likepe 21]

“Nto ye ne ni tiselize hahulu tabo mwa bupilo ki ku zwisiwa kwa Bibele ya New World Translation of the Holy Scriptures mwa puo ya Si-Bulgaria”

[Siswaniso se si fa likepe 19]

Ne ni kalile ku ezanga lipapali za ku minyaukisa mubili inze ni na ni lilimo ze 15