Cwale Se Ni Ziba Mulimu Ye Ni Lapela

Ka mo li Kandekezwi ki bo Marieta Manuel Bacudio

Lizazi le ne ni kwaza sikolo sa Bibele, mukutazi wa mwa bulapeli bwa Pentecostal ya naa ngiwa kuli naa na ni maata a ku folisa naa tilo fumaneha kwa mukiti wo. A sa ni swala feela, na wela fafasi ni “ku weleliswa ki maata a moya.” Ha se ni wetulukile, na lemuha kuli ne ni na ni maata a ku folisa ili nto ye ne ni batanga hahulu. Ki nto mañi ye ne tahisize kuli ni be mwa muinelo o cwalo, mi muinelo wo, ne u amile cwañi bupilo bwa ka? Ni si ka mi bulelela kale ka za taba yeo, kashe ni mi taluseze ka za bupilo bwa ka bwa kwamulaho.

N E NI pepezwi mwa tolopo ya Ilocos Norte, mwa Philippines, ka la December 10, silimo sa 1968, mi ni wa busupa mwa lubasi lwa bana ba lishumi. Sina batu ba bañata ba kwa Philippines, ni luna ne lu huliselizwe mwa bulapeli bwa Katolika. Ne ni felize sikolo sa ka sa sekondari ka silimo sa 1986, mi ne ni na ni mulelo wa ku ba nasi. Nihakulicwalo, bakeñisa kuli ne ni yambuzi butuku bo butuna, mulelo wa ka wo ne u si ka talelezwa. Mane ne ni nahana kuli butuku bo, ne bu ka ni bulaya. Kabakala ku zwafiswa ki makulanu a ka, na kupa Mulimu kuli a ni tuse mi na mu taluseza kuli haiba ne ni ka fola, ne ni ka mu sebeleza mwa bupilo bwa ka kaufela.

Ha se ni folile hasamulaho wa ku kula nako ye telele, na hupula sepiso ya ka ku Mulimu. Kamukwaocwalo, mwa kweli ya June, ka silimo sa 1991, na iñolisa kwa sikolo sa Bibele sa Pentecostal. O muñwi wa milao ya fa sikolo seo kutwi ne li wa ku amuhela “mpo ya feela ya moya o kenile.” Ne ni bata ku ba ni maata a ku folisa. Kwa sikolo seo, ne lu itutile kuli mpo yeo ne i kona ku fiwa feela ka ku itima lico ni ka litapelo. Nako ye ñwi, bakeñisa ku bata ku bonisa kuli ne ni na ni “mpo,” na shondalela ku yo muñwi wa batu ba ne ni kena ni bona sikolo ya naa lapela ka ku tumusa mwa kozwana ka nako ya milapelo ni ku yo teeleza kwa tapelo ya hae. Ha naa tuha a feza tapelo ya hae, na kutela kapili-pili ko ne ni lapelela. Hasamulaho, na mu bulelela kaufela za naa kupa mwa tapelo ya hae, mi a lumela kuli cwale ne se ni na ni “mpo ya feela ya moya o kenile”!

Ha ne ni nze ni zwelapili mwa lituto za ka kwa sikolo seo, na ba ni lipuzo ze ñata. Ka mutala, Mateu 6:9 i bulela ka za ‘Ndate’ ni ka za “libizo” la hae. Ne ni buzanga lipuzo ze cwale ka za kuli, “Ki mañi Ndate ya naa talusizwe ki Jesu?” ni kuli, “Ki libizo la mañi le li swanela ku keniswa?” Likalabo ze ne ba ni fanga baluti ba ka ne li sa utwahalangi hande mi ne li sa kolwisi. Ne ba bulelanga kuli Silalu ki nto ye sa utwisisehi. Ne ni sa utwisisi. Ku si na taba ni zeo, na zwelapili mwa lituto za ka za bupasita.

Lwa Pili ku Kopana ni Lipaki za Jehova

Kwa sikolo sa Bibele ne lu lutilwe kuli Lipaki za Jehova ne li bona ba ne ba luta lituto za buhata ka ku fitisisa za bulapeli. Ne ba biziwa hape kuli ki bo antikreste. Na toya hahulu bulapeli bo.

Mwa silimo sa ka sa bubeli kwa sikolo seo, na ya kwa ndu ku yo potela bashemi ba ka, ka nako ya pumulo. Muhulwanaa ka wa libizo la Carmen ha naa utwile kuli ne ni inzi kwahae, a to pota ni yena. Carmen naa sa kolobelizwe, mi ne li sikombwa sa ka nako kaufela sa Lipaki za Jehova. Ha naa likile ku ni luta ka za Mulimu, na mu alaba ka buhali kuli: “Na ziba Mulimu ye ni sebeleza!”  Hamulaho wa ku mu lwaha fa nyangela, na mu kasha mi ne ni si ka mu fa kolo ye ñwi hape ya ku bulela ni na.

Ha se ni kutezi kwa sikolo sa Bibele, Carmen a ni lumela broshuwa ye li, Kana Wa Swanela ku Lumela mwa Silalu? * Kapili-pili na i pazaula ni ku i yumbela mwa mulilo kakuli ne ni sa mu nyemezi.

Zwelopili ya ka Mwa Bupasita

Ha ne ni nze ni zwelapili mwa lituto za ka kwa sikolo sa Bibele, ne ni cincisize batu ba bañwi bulapeli bwa bona. Ne ni tabile hahulu sihulu bo ma ni bahulwani ba ka ba baana ha ne ba kalile ku swalisana ni na mwa bulapeli bwa Pentecostal.

Mwa March ka silimo sa 1994, na kwaza sikolo sa Bibele sa Pentecostal. Sina ka mo ku taluselizwe kwa makalelo a taba ye, ka nako yeo ne ku tile mukutazi wa mupoti. Luna kaufela ba ne ba kwaza sikolo, ne lu bata ku ba bukaufi ni yena bakeñisa kuli ne lu na ni tumelo ya kuli naa na ni mpo ya ku folisa. Lwa pahama fa katala ni ku kala ku tulaka-tulaka ni ku opela ni yena inze lu sweli ku bina lipina ze ne sweli ku lila. Mi mutu ni mutu ya naa swaliwa ki yena naa wela fafasi ni “ku weleliswa ki maata a moya.” * Ha naa ni sweli ni na, na wela fafasi ni ku welela. Ha ni wetuluka, na ikutwa ku ba ni sabo, kono na lemuha kuli ne ni na ni maata a ku folisa, kabakaleo na ba ni tabo.

Hamulahonyana wa fo, ne ni itusisize maata a ka ao, ku folisa mwanana ya naa kula fibele. Ha ne ni mu lapelezi, mwanana yo a kala ku fufulelwa mi fibele ya hae ya fola. Kwa nalule-lule, na ikutwa kuli ne ni ka kona ku taleleza sepiso ya ka ku Mulimu. Kono nihakulicwalo, ne ni ikutwa kuli ne ni tokwa nto ye ñwi. Mwa pilu ya ka ne ni lumela kuli ku na ni Mulimu a li muñwi feela, kono ne ni sa zibi kuli ki mañi luli. Ne ni kakanya hahulu lituto ze ñata za mwa bulapeli bo.

Ze ne Tisize Kuli ni Cince Munahano wa ka

Hamulaho wa likezahalo zeo, na toya hahulu Lipaki za Jehova ni ku fita. Nako kaufela ye ne ni fumananga lihatiso za Lipaki, ne ni li cisanga. Kono kwa ezahala nto ye ñwi ye ne ni si ka libelela. Ne ni komokile hahulu ku ziba kuli bo ma ne se ba tuhezi ku swalisana ni na mwa bulapeli bwa luna bwa Pentecostal. Bo Carmen ne ba itutanga Bibele ni bona. Na nyemela hahulu bahulwani ba ka bo Carmen.

Ku tuha fo, na yo fumana magazini ya Mu Zuhe! kwa ndu ya bo ma. Sina kamita ne ni ka i cisa. Kono kabakala kuli ne ni bata ku ziba kuli ne ba bala lika mañi, na apaula makepe a yona. Ha ne ni sweli ku apaula makepe cwalo, na fumana taba ye ne bulela ka za mutu yo muñwi ya naa na ni tumelo ye tuna ka za lituto za keleke ya hae. Nihakulicwalo, ha naa kalile ku bala lihatiso za Lipaki za Jehova hamohocwalo ni Bibele, naa fitile fa ku ikolwisa kuli tuto ya Silalu, tuto ya lihele ni tuto ya ku sa shwa kwa moyo ne li sa zwi mwa Bibele. Taba yeo ne i ni fitile kwa pilu. Zeo ki zona lituto luli ze ne ni bata ku utwisisa. Ku zwelela feela ona fo, na nyolelwa nako ye ne ni ka fita fa ku utwisisa niti ya Bibele.

Hamulaho wa ku bala taba ye ñwi hape ya ze ezahezi mwa bupilo, mwa magazini ya Mu Zuhe! ili ye ne bulela ka za mutu yo muñwi ya  naa nwanga hahulu bucwala ni ku itusisa milyani ye kola, ya naa sa ezize licinceho ze tuna mwa bupilo bwa hae kabakala ku ituta Bibele, na kala ku balanga lihatiso ze ñwi ze ñata za Lipaki za Jehova. Na fumana broshuwa ye ñwi ye li, Libizo La Bumulimu Le Li Ka Ina Kuya Ku Ile. * Ka ku bala broshuwa yeo, na ituta kuli libizo la Mulimu ki Jehova. Ku ituta niti ka za Mulimu a nosi wa niti ne ku ni tahiselize tabo ye tuna!—Deuteronoma 4:39; Jeremia 10:10.

Na zwelapili ku bala lihatiso ka ku ipata-pata mi na ituta lituto ze ñata za mwa Bibele. Ka mutala, mwa sikolo sa Pentecostal ne ni itutile kuli Jesu ki Mulimu, kono cwale ni itutile ku zwelela mwa Bibele kuli Jesu ki “Mwanaa Mulimu ya pila.”—Mateu 16:15, 16.

Ku Cinca Mubonelo wa ka

Ha ne ni bonani ni bo Carmen hape, ne ba komokile ha ne ni ba kupile kuli ba ni fumanele kopi ya broshuwa ye li, Libizo La Bumulimu Le Li Ka Ina Kuya Ku Ile ni lihatiso ze ñwi. Ne ni tandile lilimo ze ñata kwa sikolo seo sa Bibele kono ne ni si ka lutiwa niti kwateñi; ne ni li mwa simbwi. Ne ni bile ni tabo kabakala niti ya mwa Bibele ye ne ni sweli ku ituta. Ne ni amilwe ha buniti ki manzwi a Jesu a li: “Mu ka ziba niti, mi niti i ka mi lukulula.” (Joani 8:32) Niti yeo ya mwa Bibele ne i kalile ku cinca bupilo bwa ka.

Ka nakonyana, ne ni nahanile kuli na kona ku lapela Jehova Mulimu ka ku ipata-pata inze ni zwelapili ku sebeza sina pasita. Hasamulahonyana, na lemuha kuli ha ni sa kona ku luta lituto ze ñata za bulapeli. Nihakulicwalo, ne ni na ni sabo. Ne ni ka ipilisa cwañi ha ne ni ka tuhela bupasita? Neikaba maswabisa a matuna hahulu kwa keleke, yo muñwi kwa mapasita ba bona ha naa ka ba yo muñwi wa Lipaki za Jehova! Kamukwaocwalo, na zwelapili ku sebeza sina pasita kono na ambuka ku luta lituto za buhata za keleke.

Ha ne ni bonani ni bahulwani ba ka bo Carmen hape, ba ni susueza ku yo fumaneha kwa mikopano ya Lipaki za Jehova. Bakeñisa kuli fokuñwi ne ni yanga kwa keleke ye tuna ye ne fumaneha mwa muleneñi wa Laoag, na ikuzwa ni ku yo bata-bata sibaka se ne ba kopanelanga ku sona Lipaki za Jehova ili yona Ndu ya Mubuso. Teñi ko, na yo zibana ni Alma Preciosa Villarin, ya naa bizwanga hape kuli “Precious” ili sikombwa sa ka nako kaufela mwa puteho yeo. Nihaike kuli ne ni sa na ni mubonelo o maswe ka za Lipaki za Jehova, ne ni lumezi kuli a ni lutange Bibele.

Bahulwani ba ka ne ba bile ni pilu-telele ha ne ba ni bulelanga niti ya mwa Bibele. Ne ni lemuhile kuli, bo Precious ni bona ne ba na ni moya o swana wo. Ne ba ni tusize hahulu ku utwisisa Bibele, nihaike kuli fokuñwi ne ni nyemanga, ni ku ba kananisanga, mi mane ka linako ze ñwi ne ni bulelanga ka ku tiisa hahulu linzwi ili ku ñañelela fa litaba ze ne ni lutilwe. Sishemo, buikokobezo  ni buishuwo ze ne ba ni bonisize bo Precious ni Lipaki za Jehova ba bañwi, ne li ni tahiselize ku cinca mubonelo wa ka. Nto yeo ne i ni susuelize kuli ni tabele ku sebeleza Jehova.

Mwa July ka silimo sa 1995, na lemuha kuli haiba ne ni bata ku tabisa Mulimu, ne ni swanela ku tuhela musebezi wa ka wa bupasita. Kabakalañi? Liñolo la Sinulo 18:4 li bulela ka swanisezo ka za bulapeli bwa buhata kuli: “Ha mu zwe ku yena, mina sicaba sa ka, haiba ha mu lati ku abana ni yena mwa libi za hae, ni ku amuhela kwa likoto za hae.” Ne ni ka ipilisa cwañi? Kwa liñolo la Maheberu 13:5 ne ni itutile kuli haiba lu eza tato ya Mulimu, Mulimu u lu sepisa kuli: “Ha ni na ku mi siya ni kamuta mi ha ni na ku mi fulalela ni kamuta.”

Nihaike kuli bo ndate ni bahulwani ba ka ba baana ne se ba ni lwanisanga hahulu, lisunda ze peli pili ni si ka kolobezwa kale sina Paki ya Jehova, na ba ni bundume bwa ku ya kwahae ni ku yo cisa lika kaufela ze ne ni itusisanga mwa musebezi wa ka wa bupasita. Hamulaho wa ku eza cwalo, na lemuha kuli maata kaufela a ipitezi a ne ni filwe naa felile. Nako ya kwamulaho, ha ne ni lobalanga, ne ni ikutwanga kuli ku na ni nto ye ne i siniliketanga ka nako kaufela. Zeo kaufela ne li felile. Na tuhela ku bonanga miluti ye ne ni bonanga fa mahaulo a muzuzu wa ka. Mwa lituto za ka za Bibele, ni itutile kuli lika kaufela ze twi ki limpo za moya mazazi a, ze cwale ka maata a ku folisa, ha li zwi ku Mulimu kono li zwa kwa mioya ye maswe. Ni ya tabile hahulu kuli ni lukuluzwi kwa kukuezo ya yona, sina feela mwa naa lukululezwi mutanga yo muñwi wa musizana kwa “mudimona wa bunuhi” ki Paulusi ni Barnabasi.—Likezo 16:16-18.

Ne ni tabile hahulu ku kolobezwa hamoho ni bo ma sina Lipaki za Jehova mwa September 1996! Hamulaho wa kolobezo ya ka, na iñolisa sina sikombwa sa ka nako kaufela wa Lipaki za Jehova mi na ikola ku ba mwa sebelezo yeo ka lilimo ze ñata.

Ka nako ya cwale, ni nyezwi ku bo Silver. Na ni bo muunaa ka, lu beleka ka taata ku hulisa mwanaa luna wa musizana ka niti ya mwa Bibele. Bahulwani ba ka ba babeli ni munyanaa ka a li muñwi wa musizana, ni bona ba kalile ku swalisana ni luna mwa ku sebeleza Jehova. Nihaike kuli na inyazanga kuli ka lilimo ze ñata ne ni sa zibi hande Mulimu, ni ya tabile hahulu bakeñisa kuli cwale se ni ziba Mulimu ye ni lapela.

[Litaluso za kwatasi]

[Manzwi a fa likepe 27]

Ne ni itusisize maata a ka ao ku folisa mwanana ya naa kula fibele

[Manzwi a fa likepe 28]

Niti yeo ya mwa Bibele ne i kalile ku cinca bupilo bwa ka

[Manzwi a fa likepe 29]

Ku ituta niti ka za Mulimu a nosi wa niti ne ku ni tahiselize tabo ye tuna!

[Siswaniso se si fa likepe 27]

Nako ye ne ni kwaza sikolo sa ka sa bupasita

[Siswaniso se si fa likepe 28, 29]

Bo Precious ne ba itutanga Bibele ni na

[Siswaniso se si fa likepe 29]

Nako yeo na ni bo ma ne lu kolobelizwe

[Siswaniso se si fa likepe 29]

Nako ye ne ni sebeza sina sikombwa sa nako kaufela sa Lipaki za Jehova

[Siswaniso se si fa likepe 29]

Na ni bo muunaa ka, mwanaa ka wa musizana, ni bahabo luna ba bañwi ba se ba swalisana ni luna mwa bulapeli bwa niti