Mu Itute Linzwi la Mulimu

Ki Lika Mañi ze ka Ezahala fa Lizazi la Katulo?

Taba ye i nyakisisa lipuzo ze ne mu kana mu ipuzize mi i bonisa ko mu kona ku fumana likalabo mwa Bibele ya mina. Lipaki za Jehova ba ka tabela ku nyakisisa ni mina likalabo ze.

1. Lizazi la Katulo ki nto mañi?

Sina mo si boniseza siswaniso se si kwa bulyo, batu ba bañata ba nahananga kuli fa Lizazi la Katulo, bolule-lule ba batu ba ka to yemiswa fapilaa lubona lwa Mulimu kuli ba atulwe ka ku ya ka likezo ze ne ba ezize. Ba bañwi ba ka fiwa bupilo kwa lihalimu, mi ba bañwi ba ka tukufazwa mwa mulilo wa lihele. Kono Bibele i bonisa kuli mulelo wa Lizazi la Katulo ki wa ku to lamulela batu kwa lipuso za buhateleli. (Samu 96:13) Mulimu u ketile Jesu kuli a be muatuli ya ka tahisa kuli ku luka ku be teñi hape.—Mu bale Isaya 11:1-5; Likezo 17:31.

2. Lizazi la Katulo li ka tahisa cwañi kuli ku luka ku be teñi hape?

Mutu wa pili Adama, ha naa kwenuhezi Mulimu ka mabomu, naa tahiselize bana ba hae kaufela sibi, manyando, ni lifu. (Maroma 5:12) Kuli a tatulule butata bo, Jesu u ka zusa bolule-lule ba batu ba ba shwile. Buka ya Sinulo i patulula kuli lika zeo li ka ezahala mwahalaa puso ya lilimo ze sikiti ya Kreste Jesu.—Mu bale Sinulo 20:4, 11, 12.

Ba ba ka zusiwa ba ka atulwa isiñi kabakala likezo ze ne ba ezize pili ba si ka shwa kale, kono kabakala ze ba ka eza ili ze ka ñolwa mwa “miputo” ye bulezwi kwa Sinulo kauhanyo 20. (Maroma 6:7) Mwahalaa batu ba ba ka zusiwa ni ku fiwa kolo ya ku ituta ka za Mulimu, muapositola Paulusi naa bulezi kuli ku ka ba “ba ba lukile ni ba ba si ka luka.” —Mu bale Likezo 24:15.

  3. Lizazi la Katulo li ka petañi?

Ba ne ba shwile ba si ka fita kale fa ku ziba Jehova Mulimu ni ku mu sebeleza, ba ka ba ni kolo ya ku cinca ni ku eza ze lukile. Haiba ba ka eza ze lukile, zuho ya bona i ka ba ya ku ‘zuhela bupilo.’ Kono ba bañwi ku ba ba ka zusiwa ha ba na ku tabela ku ituta ka za Jehova. Zuho ya bona i ka ba ya ku ‘zuhela katulo.’—Mu bale Joani 5:28, 29; Isaya 26:10; 65:20.

Kwa mafelelezo a lilimo ze sikiti za Lizazi la Katulo, Jehova u kabe a kutiselize batu kwa muinelo wa sapili wa bupetehi. (1 Makorinte 15:24-28) Yeo luli ki tibelelo ye nde kwa batu ba ba ipeya ku utwa kaufela! Fa tiko ya mafelelezo, Mulimu u ka lukulula Satani Diabulosi, ya naa tamilwe mwa mukoti ka lilimo ze sikiti. Satani hape u ka lika ku kukueza batu ku kwenuhela Jehova, kono ba ba ka hanyeza Satani ba ka ikola bupilo fa lifasi ku ya ku ile.—Mu bale Isaya 25:8; Sinulo 20:1, 7-9.

4. Ki lifi Lizazi la Katulo le liñwi le li ka tusa batu?

Bibele hape itusisa pulelo ya “Lizazi la Katulo,” ku ama kwa kezahalo ye ka tahisa mafelelezo a muinelo wa lifasi le. Lizazi la Katulo li ka taha ka sipundumukela sina feela Munda wa mwa miteñi ya Nuwe o ne u tahisize kuli batu ba ba maswe ba timezwe. Kwa tabisa ku ziba kuli ona cwale-cwale fa, sinyeho ya “banyefuli” i ka tahisa lifasi le linca mo ku ka “yaha ku luka.”—Mu bale 2 Pitrosi 3:6, 7, 13.

Kuli mu bale litaba ze ñata ka za taba ye, mu bone makepe 213-215 a buka ya Bibele I Lutañi Luli?, ye hatisizwe ki Lipaki za Jehova.

[Siswaniso se si fa likepe 16]

“Katulo ya Mafelelezo,” ka ku ya ka bo Gustave Doré, 1832-1883

[Manzwi a bañi ba siswaniso]

Siswaniso se si swanisizwe ki bo Doré