BIBELE YA CINCANGA BUPILO BWA BATU

“Ne ni bata ku ba muprisita”

Taba ye kandekilwe ki bo Roberto Pacheco

SILIMO SE NE BA PEPILWE: 1957

NAHA KO NE BA PEPEZWI: MEXICO

LITABA ZE EZAHEZI: NE BA KENI SIKOLO FA SIKOLO SA BAPRISITA; NE LI BA KACIMA-CIMA

BUPILO BWA KA BWA KWAMULAHO: Ne ni pepezwi mwa toloponyana ya Texcoco. Ka nako yeo, buñata bwa mikwakwa ne i si ka lukiswa hande mi ne i na ni liluli. Batu ba ne ba zwanga mwa minzi ye li bukaufi ne ba tisanga lika za ku lekisa ze ne ba shimbelanga fa limbongolo za bona kwa tolopo. Lubasi lwa luna ne lu botanile hahulu, mi ne li na mwana wa bu 7 mwa lubasi lo lwa batu ba 9. Bo ndate ne ba lukisanga makatulo kuli ba fumane masheleñi a ku lu babalela ka ona. Kono ne ba timezi inze ni na ni lilimo ze 7. Mi ku zwa ka yona nako yeo, bo ma ba kala ku belekanga ka taata kuli ba fumanele lubasi lwa luna lico.

Bo kuku ne ba lizanga siopeliso se si bizwa violini mi ne li baopelisi ba sikwata se ne si opelanga lipina za bulapeli. Ibato ba batu kaufela mwa lubasi lwa luna ne ba ziba ku liza liopeliso. Bo ma ne ba opelanga mwa kwaya ya Keleke, mi bo malume ne li baopeli ni balizi ba piano. Ne lu li Makatolika ba ba tiile, naa ne ni tusanga muprisita ka nako ya Misa, mi ne ni bata ku ba mulumiwa wa Keleke ya Katolika. Niteñi ne ni lata hahulu ku buha mafilimu a lindwa. Bakeñisa ku buhanga hahulu mafilimu ao, naa kala ku lata hahulu mifilifili.

Mwa Puebla, ne ni keni sikolo sa bulapeli se ne si luta batu ku ba baprisita. Mulelo wa ka ne li ku ba muprisita mwa Keleke ya Katolika. Kono mwa silimo sa ka sa mafelelezo kwa sikolo seo, ne ni swabisizwe hahulu ki likezo za batu ba mwa Keleke ya Katolika. Sisita wa mukulwani a kalisa ku ni ezeza linyawe. Ne ni tuzi muliko wo, kono bakeñisa muinelo wo, naa kala ku lakaza ku nyala. Nihakulicwalo, naa lemuha kuli baprisita ba bañata ne ba pila  bupilo bwa ku ipumisa ku ba ba ba lukile. Kwa mafelelezo, naa tuhela mulelo wa ka wa ku bata ku ba muprisita.

Na keta ku ituta lipina kwa sikolo sa lipina (National Conservatory of Music) mwa tolopo ya Mexico. Ha ne ni felize sikolo seo, naa nyala mi hamulaho lwa pepa bana ba ba bane. Ne ni uta lubasi lwa ka ka ku opelanga lipina ka nako ya Misa mwa Keleke ya Katolika.

Ku zwa kwa makalelo, ne lu bile ni butata mwa linyalo la luna. Na ni musalaa ka ne lu lwananga, bakeñisa kuli ne lu na ni lifufa. Pili ne lu kalanga ku omana mi hamulaho ne lu lwananga. Hasamulaho wa lilimo ze 13, lwa ikatulela ku kauhana.

BIBELE MO NE I CINCELIZE BUPILO BWA KA: Lipaki za Jehova ha ba ni potela lwa pili ne ni si ka kauhana kale ni musalaa ka. Basali ba babeli ba Lipaki, ne ba ngongotile fa munyako wa luna ni ku ni taluseza kuli ba kona ku ituta Bibele ni na. Ne ni nahana kuli ne ni ziba hahulu za bulapeli, kamukwaocwalo, naa kala ku bata ku ba bonisa kuli ne li mahata. Naa ba buza lipuzo ze taata ze ne ni nahana kuli ne li si na likalabo. Kono naa komoka hahulu kuli ne ba alabile hande lipuzo za ka kaufela ka ku itusisa Bibele. Naa lemuha kuli, kanti ne ni ziba feela litaba ze nyinyani hahulu ka za bulapeli. Bakeñisa kuli ne ni patehile hahulu mi musalaa ka naa sa ezangi hande lipaki bao, ba tuhela ku lu potelanga.

Lilimo ze ketalizoho ku zwa fo, ka nako ye ne ni pila ni musali u sili wa libizo la Elvira, ne ni kopani hape ni Lipaki za Jehova. Elvira naa sa lwanisangi Lipaki, kamukwaocwalo, ne ku ni bezi bunolo ku itutanga Bibele kamita. Nihakulicwalo, ne ku fitile nako ye telele kuli ni kone ku cinca bupilo bwa ka.

Naa lemuha kuli haiba ne ni bata ku sebeleza Jehova ka pilu ya ka kaufela, ne ni tokwa ku eza licinceho ze tuna mwa bupilo bwa ka. Sa pili, ne ni swanela ku tuhela musebezi wa ka wa ku opelanga ka nako ya Misa kwa Keleke ya Katolika, ili ku talusa kuli ne ni na ni ku fumana nzila i sili ya ku ipilisa ka yona. (Sinulo 18:4) Hape ne ni tokwa ku ñolisa linyalo la ka ni Elvira.

Kono cinceho ye tuna ye ne ni tokwa ku eza ne li ya ku tuhela ku ba ni kacima-cima. Nto ye ne ni tusize hahulu ki mañolo a mabeli a mwa Bibele: La pili ki la Samu 11:5, le li bonisa kuli Jehova u toile mutu ya lata situhu kamba mifilifili, mi la bubeli ki la 1 Pitrosi 3:7, le ne li ni lutile kuli haiba ne ni bata kuli Jehova a utwe litapelo za ka, ne ni lukela ku kuteka musalaa ka. Ha ne ni nahanisisize litimana zeo ni ku lapela kuli Jehova a ni tuse, naa fita fa ku tuhela hanyinyani-hanyinyani mukwa wa ka wa kacima-cima.

MO NI TUSELIZWE: Ka nako cwale ni na ni tabo mwa bupilo. Ni sweli ku lika ka taata kuli ni utwane ni bana ba ka ba ne ni pepile ni musalaa ka wa pili, mi ni sweli ku tusa lubasi lwa ka lwa cwale ku ba ni tumelo ye tiile ku Mulimu.

Ha ne ni sa li mwanana, ne ni bata ku ba muprisita ni ku tusanga batu. Cwale ni ikutwa kuli ni na ni tabo luli mwa bupilo. Ni lutanga batu ku opela kuli ni fumane masheleñi a ku babalela lubasi lwa ka. Ni itumela hahulu ku Jehova, kakuli naa ni bonisize pilu-telele ka ku ni fa kolo ya ku cinca bupilo bwa ka ni ku ba mutu yo munde!

[Manzwi a fa likepe 8]

Ka ku ba mutangana ya naa tusanga muprisita ka nako ya Misa, ne ni bata ku ba mulumiwa wa Keleke ya Katolika, niteñi ne ni lata hahulu ku buha mafilimu a lindwa mi naa kala ku lata hahulu mifilifili

[Manzwi a fa likepe 9]

Bibele ne i ni lutile kuli haiba ne ni bata kuli Jehova a utwe litapelo za ka, ne ni lukela ku kuteka musalaa ka