“Lu Fumani Mesia”!

Hamulaho wa lilimo ze bato ba 400 ku zwa fo i felezwa ku ñolwa buka ya mafelelezo kwa libuka za Bibele za Siheberu, bupolofita bwa Mika ka za Mesia bwa talelezwa: Jesu a pepelwa mwa Betelehema. Lilimo ze bato ba 30 ku zwa fo, ili ka 29 C.E., kalulo ya pili ya bupolofita bwa Daniele ka za ku taha kwa Mesia ya talelezwa. Jesu a kolobezwa mi Mulimu a mu toza ka moya o kenile. Mesia ya naa libelezwi ka nako ye telele, yena Peu, a bonahala ka nako ye swanela luli!

Honafo feela, Jesu a kalisa bukombwa bwa hae bwa “ku shaela taba ye nde ya Mubuso wa Mulimu.” (Luka 8:1) Sina feela mo ne ku polofitezwi, Jesu naa na ni sishemo, musa, mi naa iyakatwa ba bañwi ha buniti. Lituto za hae ne li ze tusa mi naa li luta ka lilato, mi naa folisize batu ba ne ba na ni “buyanga bwa mifuta kaufela,” ili ku bonisa kuli Mulimu naa li ni yena. (Mateu 4:23) Batu ba lilimo ze shutana-shutana ne ba selahanela ku Jesu mi ne ba bulezi kuli: “Lu fumani Mesia”!—Joani 1:41.

Jesu naa polofitile kuli nakonyana pili Mubuso wa hae u si ka kalisa kale ku busa, fa lifasi ne ku ka ba ni lindwa, lizikinyeho, ni matata a mañwi a mañata. Naa susuelize batu kaufela kuli ba “zwelepili ku tona.”—Mareka 13:37.

Jesu ne li mutu ya petehile, ya naa zwezipili ku utwa Mulimu, kono naa na ni lila ili ze ne mu bulaisize kwa mafelelezo. Kamukwaocwalo, lifu la hae la ba sitabelo se si petehile se ne si konile ku lu kutiseza se ne ba latehezwi ki sona bo Adama ni Eva—ili sepo ya ku pila ku ya ku ile mwa Paradaisi.

Ku shwa kwa Jesu ne ku talelelize bupolofita, sina feela Mulimu mwa naa talelelize bupolofita ka ku zusa Jesu kwa bafu hamulaho wa mazazi a malaalu ni ku mu bisa sibupiwa sa kwa moya se si maata. Hasamulaho, Jesu a bonahala kwa balutiwa ba hae ba ba fitelela 500. Pili a si ka ya kale kwa lihalimu, Jesu naa file balateleli ba hae musebezi wa kuli ba kutaze taba ye nde ka za hae ni ka za Mubuso wa hae kwa “batu ba macaba kaufela.” (Mateu 28:19) Ne ba petile cwañi musebezi wo?

—Taba ye i tomile fa Mateu, Mareka, Luka, Joani, ni 1 Makorinte.