TOHO YA TABA | KI KABAKALAÑI BATU BA BAÑWI HA BA IKUTWA KULI HA BA KONI KU LATA MULIMU?

Buhata bo bu Tahisa Kuli Batu ba si ke ba Ziba Mulimu

ZE BA LUMELA BA BAÑATA Buka ye ñwi (The New Encyclopædia Britannica) i bonisa kuli, bulapeli bwa Sikreste “mwa mifuta ya bona ye mituna ye milaalu ili keleke ya Katolika, keleke ya Eastern Orthodox, ni keleke ya Protestanti, bu lumela kuli Mulimu ki a li muñwi kono u mwa likalulo ze taalu, ili Mulimu Ndate, Mulimu Mwana, ni Mulimu Moya O Kenile. Ka ku ya ka tuto yeo ya bulapeli, taba yeo ha i bonisi kuli batu ba bulapeli bo ba lumela kuli ku na ni milimu ye milaalu kono i bonisa kuli likalulo ze taalu zeo ki mulimu a muñwi.”—

NITI YE FUMANEHA MWA BIBELE Jesu, yena Mwanaa Mulimu, naa si ka bulela nihaiba hanyinyani kuli wa likana ni Mulimu, kamba kuli yena ni Ndatahe ki nto iliñwi. Kono, naa bulezi kuli: “Ni ya ku Ndate, kakuli Ndate ki yo muhulu ku na.” (Joani 14:28) Hape naa bulelezi yo muñwi wa balateleli ba hae kuli: “Ni kambamela ku Ndate yena Ndataa mina ni ku Mulimu wa ka yena Mulimu wa mina.”—Joani 20:17.

Moya o kenile haki mulimu. Nako ye ñwi Bakreste ba kwa makalelo ne ba ‘tezi moya o kenile’ mi Jehova naa kile a bulela kuli: “Ni ka sululela moya wa ka kwa batu ba mufuta kaufela.” (Likezo 2:1-4, 17) Moya o kenile haki kalulo ya Silaalu, kono ki maata a itusisa Mulimu kwa ku peta milelo ya hae.

LIBAKA HA LU SWANELA KU ZIBA NITI Bo Karl Rahner ni bo Herbert Vorgrimler licaziba ba litaba za bulapeli bwa Katolika ba talusa kuli, tuto ya Silaalu “ha i koni ku zibiwa ku si na ya i talusa, nihaiba hamulaho wa ku i talusa, tuto yeo ha i koni ku utwisiswa ka ku tala.” Kana luli mwa kona ku lata mutu ye mu sa koni ku ziba kamba ku utwisisa? Kamukwaocwalo, tuto ya Silaalu i palelwisa batu ku ziba Mulimu ni ku mu lata.

Bo Marco, ba ba bulezwi mwa taba ya kwa makalelo ne ba lemuhile kuli, tuto ya Silaalu ne i ba palelwisa ku ziba Mulimu. Ba bulela kuli: “Ne ni nahananga kuli Mulimu naa bata kuli ni si ke na mu ziba, mi nto yeo ne i tahisize kuli ni nge kuli haa na taba ni na, mi batu ha ba koni ku mu utwisisa kamba ku sutelela ku yena.” Nihakulicwalo, “Mulimu haki Mulimu wa mifilifili [kamba ya lyanganisa lika].” (1 Makorinte 14:33) Ha si ka palelwa ku lu taluseza kuli ki yena mañi mi u bata kuli lu mu zibe. Jesu naa bulezi kuli: “lu lapela se lu ziba.”—Joani 4:22.

Bo Marco ba bulela kuli: “Ha ne ni itutile kuli Mulimu haki kalulo ya Silaalu, na itama bulikani ni yena.” Ha lu nga kuli Jehova ki Mulimu ya ikemezi isiñi nto ye sa utwisisehi, ku bunolo hahulu ku mu lata. Bibele i bulela kuli: “Mutu kaufela ya sa bonisi lilato ha si ka ziba Mulimu, kakuli Mulimu ki lilato.”—1 Joani 4:8.

[Manzwi a bañi ba siswaniso fa likepe 5]

Museo Bardini, Florence