MUZWELEPILI KUTONA!
Kana Kwakonahala Luli Kuli Batu ba Mibala Yeshutana Baeziwe ka Nzila Yeswana?—Bibele Ibulelañi fa Taba Yeo?
Batu babañata habalumeli kuli batu ba mibala yeshutana bakona kueziwa ka nzila yeswana.
“Mwa lifasi kaufela, saluluti sa mubala sizwelapili kutahisa butata kwa likopano, likwata za batu, ni kwa mupilelo wa batu wa ka zazi ni zazi. Saluluti sa mubala sizwelapili kutahisa kuli batu basike baezana ka kulikanelela.”—António Guterres, yomuhulu wa kopano ya UN.
Kana saluluti sa mubala sika fela muta omuñwi? Bibele ibulelañi fa taba yeo?
Mubonelo wa Mulimu ka za kuezana ka kulikanelela
Bibele iluluta mo Mulimu aangela batu ba mibala yeshutana-shutana.
“Ka mutu alimuñwi, [Mulimu] uezize macaba kamukana a batu kuli bayahe fa lifasi kaufela.”—Likezo 17:26.
“Mulimu haketululi, kono mwa sicaba ni sicaba mutu kaufela yamusaba ni kueza sesilukile ulumelelwa ki yena.”—Likezo 10:34, 35.
Bibele ibonisa kuli batu kaufela basimuluha ku mutu alimuñwi ni kuli Mulimu uamuhela batu ba mibala kaufela.
Sesikatahisa kuli batu baezane ka nzila yeswana
Nto yekatahisa kuli batu baezane ka nzila yeswana ki Mubuso wa Mulimu, ona mulonga wa kwa lihalimu. Mubuso wo, ukaluta batu mobakona kuezeza babañwi hande. Batu bakaituta mobakona kutuhelela maikuto a saluluti sa mubala ane babanga ni ona.
“Babayahile mwa naha [bakaituta ] kuluka.”—Isaya 26:9.
“Kuluka kwa niti kukatahisa kozo, mi muselo wa kuluka kwa niti ikaba buiketo ni silelezo ka nako kaufela.”—Isaya 32:17.
Kacenu, batu babañata basweli baituta mobakona kuezeza babañwi ka likute, kuzwelela mwa Bibele.
Kuli muitute zeñata, mubale magazini ya Muzuhe! yenani toho ya taba yeli, “Zekona Kumitusa Kusaketululanga Babañwi?”
Mubale taba yeli, “Talking to Children About Racism” kuli muitute mo bashemi bakona kuikambotela taba ye ni bana babona kwa ndu.
Hape Mwendi Mwakona Kutabela Litaba Ze
MUZUHE!
Bibele I Bulelañi ka za Saluluti sa Mubala?
Kana batu kaufela ba likanelela? Kana saluluti sa mubala si ka fela muta o muñwi?
LITUTO ZA BUTOKWA ZA MWA BIBELE
Mubuso wa Mulimu ki Nto Mañi?
Mwa bukombwa bwahae kaufela, Jesu naalutile hahulu za Mubuso wa Mulimu kufita taba ifi kamba ifi. Balateleli bahae base balapezi ka lilimo-limo kuli Mubuso wo utahe.
BIBELE YACINCANGA BUPILO BWA BATU
Nenibata Kufelisa Saluluti
Bo Rafika nebakeni mwa sikwata sesiñwi ka mulelo wa kuli bafelise saluluti. Kono nebaitutile za sepiso yefumaneha mwa Bibele ya kuli Mubuso wa Mulimu ki ona okatahisa kuli batu bapile mwa kozo ni kueza babañwi hande.
TAWALA YA MULIBELELI
Lifasi mo ku si na Saluluti Li ka ba Teñi Lili?
KA ZA LUNA
Mukupe Kuli Mutu Yomuñwi Ato Mipotela
Munyakisise puzo yeñwi ka za taba ya mwa Bibele, kamba muitute zeñata ka za Lipaki za Jehova.
