Mwa Haiti kunani likwata zesweli kutahisa hahulu mifilifili. Mi mwa South Africa, Mexico mane ni mwa linaha zeñwi za kwa Latin America, kunani likezo za bukebenga. Mane nihaiba mwa libaka mokusina hahulu mifilifili, batu babapila mwateñi, baikalezwi ni kubilaezwa ki lipiho zebautwanga za kuuzwezwa, kusinyiwa ni kucisiwa kwa lika.

 Bibele ibulelañi ka za kuekezeha kwa bumaswe bobusweli kuezahala mwa lifasi kaufela?

 Bibele neipolofitile kuli bumaswe nebukaba kalulo ya sisupo sa “nako ya kufela kwa lifasi.” (Mateu 24:3) Jesu Kreste hanaatalusa za likezahalo zeli kalulo ya sisupo seo, naabulezi kuli:

•   “Kabakala kuekezeha kwa bumaswe, lilato la babañata likafola.”—Mateu 24:12.

 Bibele hape neipolofitile kuli “mwa mazazi a mafelelezo” batu nebakaba “babasina buiswalo, bababuhali, babasa lati bunde.” (2 Timotea 3:1-5) Tulemeno twa buitati to ki tona totusweli kutahisa mikwa yemaswe yelusweli kuiponela kacenu.

 Kono kunani mabaka haluswanela kuba ni sepo. Bibele isepisa kuli honacwale-cwale fa, bumaswe bukafeliswa.

•   “Kusiyezi feela nakonyana, mi babamaswe habasana kubateñi; ukatalima fone bainzi, kono habana kufumaneha fateñi. Kono babaishuwa bakaluwa lifasi, mi bakataba hahulu kabakala kozo yetuna.”—Samu 37:10, 11.

 Muitute zeñata ka za lushango lwa mwa Bibele lolufa sepo ni libaka hamukona kuba ni buikolwiso bwa kuli likezahalo zelusweli kuiponela kacenu litaleleza bupolofita bwa mwa Bibele. Munyakisise litaba zelatelela.

 “A Real Hope for a Better Tomorrow”

 “What Is the Sign of ‘the Last Days,’ or ‘End Times’?”

 “Kana Bibele Neipolofitile ka za Munahanelo ni Mikwa Yebanani Yona Batu Kacenu?”