La Bufaifi, February 24, 2023, ndwa yelwaniwa kwa Ukraine ika kwanisa silimo silisiñwi kuzwa foikalela. Ka kuya ka lipiho zeñwi za makande, masole baba batoba 300,000 ba mwa Ukraine ni Russia babulailwe kamba kuholofazwa mi kuakalezwa kuli batu baba batoba 30,000 babulailwe mwa ndwa. Nihakulicwalo, palo ya batu babashwile ikona kuba yetuna hahulu kufita yebihilwe.

 Ka bumai, hakubonahali kuli ndwa yeo yakona kufela.

•   “Ibatoba silimo silisiñwi kuzwa foitasezwa naha ya Ukraine ki naha ya Russia, hakuna lisupo zebonisa kuli ndwa yeo ikafela kapili. Hakubonahali kuli kwa linaha zepeli zeo kunani iliñwi yekona kuwina ndwa yeo, mi hape hakubonahali kuli linaha zepeli zeo zakona kufumana nzila ya kutatulula ka yona butata ilikuli likone kulumelelana.”—NPR (National Public Radio), February 19, 2023.

 Batu babañata babilaezwa hahulu ki butuku ni manyando zebakopana ni zona batu babande mwa lifasi kaufela kabakala ndwa ye ni lindwa zeñwi. Bibele ifa sepo mañi? Kana lindwa likafela muta omuñwi?

 Bibele ibulela ka za ndwa yeka pilisa batu, isiñi kubayundisa. Ndwa yeo ibizwa Armagedoni, mi italusizwe sina “ndwa ya lizazi lelituna la Mulimu Yamaata Kaufela.” (Sinulo 16:14, 16) Ka kuitusisa ndwa yeo, Mulimu ukafelisa mibuso ya batu, ili yetahisize lindwa zeñata. Kuli muitute mo ndwa ya Armagedoni ikatahiseza kozo ya kuya kuile, mubale litaba zelatelela:

•   “Ndwa ya Armagedoni ki Nto Mañi?”

•   “Lunyolezwi Hahulu Ndwa ya Armagedoni!”