Bantu bavule baswile kufwa banenanga’mba bavulukanga kitatyi kyobatambile mu imbidi yabo, kyobamwene kitōkeji nansha kifuko kiyampe bininge. Dibuku dimo (Souvenirs de la mort : une investigation médicale) dinena’mba, ‘bamo bamwene amba kwimwena bino bintu i dyese dipa muntu mukenga wa kulangulukila pa kīkalo kikwabo.’ Nansha Bible bya kanenepo kintu pa bino bintu bimonwa pa kukotoka, ino mudi bubine bukatampe bulombola’mba ke bimonwapo bya būmi bukwabo.

 Bafwe kebayukilepo kintu.

Bible unena’mba bafwe “kebayukilepo kintu nansha kimo.” (Musapudi 9:5) Potufwanga ketwendangapo mu umbuo mukwabo motubwanya kwikala nansha kulanga, ino tulekanga kwikala’ko. Lufundijo lwa amba tudi na muya keufu ushalanga mūmi shi umbidi wetu ubafu keludipo mu Bible. (Ezekyele 18:4) Nanshi kukotoka kekushintululapo kumona diulu, kalunganyembo, nansha kīkalo kikwabo.

 Le Lazalasa wānenene bika pa kīkalo kikwabo?

Nsekununi ya Lazalasa idi mu Bible īsambila pa lufu lwa bine: Wāsangwilwe na Yesu apo papo ke papite ne mafuku aná. (Yoano 11:38-44) Shi Lazalasa wādi mu kīkalo kikwabo, nabya Yesu wālongele bibi pa kumwalwija pano pa ntanda. Inoko mu Bible kemudipo myanda yānenene Lazalasa pa mwanda utala kīkalo kikwabo. Na bubine, shi Lazalasa wādi uyukila myanda ipita mu kīkalo kikwabo, wādi wa kwiinena. Yuka’mba Yesu wādingakenye lufu lwa Lazalasa na tulo, mwanda wa kulombola’mba Lazalasa paādi mufwe, kādipo uyukile kintu nansha kimo.—Yoano 11:11-​14.