Kinkwa na Kidishitu ke muntupo umo nansha kiyukeno kya mungya bijila, mwanda Bible unena’mba kudi “bakinkwa na Kidishitu bavule.” (1 Yoano 2:18) Kishima “kinkwa na Kidishitu,” kine kitambile ku kishima kya Kingidiki kishintulula “kulwa na (pa kyaba kya) Kidishitu,” kifunkila pa muntu yense:

•   Upela’mba Yesu ke Kidishitupo (Meshiasa) nansha upela’mba kadipo Mwanā Leza.​—1 Yoano 2:22.

•   Ulwa na Kidishitu, Mushingwe Māni wa Leza.—Ñimbo ya Mitōto 2:1, 2; Luka 11:23.

•   Witela bu Kidishitu.—Mateo 24:24.

•   Upangapanga balondi ba Kidishitu, mwanda Yesu umwene byobebalonga bu aye obalonga’byo.—Bilongwa 9:5.

•   Witela bu mwine Kidishitu aye koku ujilulajilula bijila ne kongola bantu.—Mateo 7:22, 23; 2 Bene Kodinda 11:13.

 Kutentekela pa kutela bantu balonga bino bilongwa bu bakinkwa na Kidishitu, Bible wibatela abo bonso mu kikonge ne bu “kinkwa na Kidishitu.” (2 Yoano 7) Kinkwa na Kidishitu wāmwekele dibajinji mu kitatyi kya batumibwa, kadi wingilanga ne dyalelo. Bino byo byālaile bupolofeto bwa mu Bible.—1 Yoano 4:3.

•   Banenanga bya bubela padi Yesu. (Mateo 24:9, 11) Kimfwa, boba bafundija lufundijo lwa Busatu Busantu nansha bafundija’mba Yesu i Leza Mwinē Bukomo Bonso, balwanga bine na bufundiji bwa Yesu, mwine wānenene amba: “Tata untabukile bukata.”​—Yoano 14:28.

•   Bakinkwa na Kidishitu bapelanga bintu byānenene Yesu pa mwingidila Bulopwe bwa Leza. Kimfwa, bendeji bamo ba bipwilo banenanga amba Kidishitu wingilanga kupityila ku maludiki a bantu. Inoko buno bufundiji bupatanyanga byobya byānenene Yesu amba: “Bulopwe bwami ke bwa ino ntandapo.”​—Yoano 18:36.

•   Banenanga’mba Yesu i Mfumwabo, ino kukōkela misoñanya yandi mpika, enka ne owa wa kusapula myanda miyampe ya Bulopwe.—Mateo 28:19, 20; Luka 6:46; Bilongwa 10:42.