Pashika i masobo a Bayuda obādi basoba pa mwanda wa Leza wānyongolwele bene Isalela mu bupika bwa Edipito mu 1513 Y.K. Leza wāsoñenye bene Isalela kuvuluka mwaka ne mwaka kino kinkumenkume kikatampe mu difuku dya 14 dya kweji wa Abibu wa Bayuda, wāityilwe mwenda mafuku bu Nisane.—Divilu 12:42; Bene Levi 23:5.

Mwanda waka ino fetyi itwa bu Pashika?

 Kishima “Pashika” kifunkila pa kitatyi kyobāpandije bene Isalela kudi Leza ku kipupo kyāipaile bana bonso babedi mu Edipito. (Divilu 12:27; 13:15) Kumeso kwa Leza kuleta kino kipupo kya lufu, wāsapwidile bene Isalela bashinge mashi a kana ka mukōko nansha a mbuji pa mbao ya pangala pa bibelo. (Divilu 12:21, 22, kunshi kwa dyani) Leza wādi wa kumona kino kiyukeno ne ‘kutabuka’ abo mobo ne kupandija babo bana babedi.—Divilu 12:7, 13.

Le Pashika yādi isobwa namani mu kitatyi kyāsonekelwe Bible?

 Leza wāpele bene Isalela bulombodi bwa mwa kusobela Pashika mibajinji. a Mu bintu bimo byādi bilongwa pa Pashika bitelelwe mu Bible mubadilwa ne bilonda’ko’bi.

•   Kitapwa: Bisaka byādi bitonga kana ka mukōko ka mwaka umo (nansha mbuji) mu difuku dya dikumi dya Abibu (Nisane), kupwa mu difuku dya 14 bekatapa. Pa Pashika mibajinji, Bayuda bāshingile mashi ako pa ñunji ya bibelo byabo ne pa lubao lwa pa kibelo kya mobo abo, bēkosha ne kwikadya.—Divilu 12:3-9.

•   Bya Kudya: Kutentekela pa kana ka mukōko (nansha mbuji), bene Isalela bādi badya mukate wampikwa kiyujo ne minyoni ilula bu byakudya bya Pashika.—Divilu 12:8.

•   Fetyi: Bene Isalela bādi balonga Fetyi ya Mukate Wampikwa Kiyujo mu mafuku asamba-abidi pa kupwa kwa Pashika, kitatyi kine kyokebādipo badya mukate wampikwa kiyujo.—Divilu 12:17-20; 2 Bilongwa bya Mafuku 30:21.

•   Bufundiji: Pa Pashika, bambutwile bādi bafundija babo bana myanda ya Yehova Leza.—Divilu 12:25-27.

•   Lwendo: Mwenda myaka, bene Isalela bādi benda ku Yelusalema kukasoba masobo a Pashika.—Kupituluka mu Bijila 16:5-7; Luka 2:41.

•   Bibidiji bikwabo: Mu mafuku a Yesu, bādi batoma mālwa ne kwimba ñimbo pa masobo a Pashika.—Mateo 26:19, 30; Luka 22:15-18.

Milangwe ya bubela pa mwanda utala Pashika

 Mulangwe wa bubela: Bene Kidishitu bafwaninwe kusoba masobo a Pashika.

 Bubine: Yesu pa kupwa kusoba masobo a Pashika mu mafuku 14 Kweji wa Nisane, mwaka wa 33 Y.K., wāshilwile kinkumenkume kikwabo: Bidibwa bya Kyolwa bya Mfumwetu. (Luka 22:19, 20; 1 Bene Kodinda 11:20) Bino bidibwa byāpingakenine pa Pashika, mwanda bituvuluja kitapwa kya “Kidishitu, . . . kana ka mukōko ka Pashika.” (1 Bene Kodinda 5:7) Kitapwa kya kinkulwa kya Yesu i kitabuke kitapwa kya Pashika mwanda i kikūle bantu bonso ku bupika bwa bubi ne Lufu.—Mateo 20:28; Bahebelu 9:15.