En-en, Leza ukwashanga boba bamulomba na mutyima umo bintu bikwatañene na kiswa-mutyima kyandi. Nansha shi kwalombele kashā, bimfwa bya mu Bible bya boba bālombele Leza amba ‘nkwashe’ko’ bikokeja kukukankamika. Kimfwa bino:

•   “Nkwasheko, abe Yehova Leza wami; bampandije monka mwikadile lusa lobe.”​—Ñimbo ya Mitōto 109:26.

•   “Ivwana, abe Yehova, ne kumfwila lusa; abe Yehova, wikale mukwashi wami.”​—Ñimbo ya Mitōto 30:10.

 Shako, mwine wālembele bino binenwa wādi na lwitabijo lukomo mudi Leza. Inoko Leza wivwananga bonso bāya kwadi na mutyima muyampe, kimfwa boba ba “mutyima mutyumuke,” nansha ba ‘mushipiditu musonsakane.’—Ñimbo ya Mitōto 34:18.

 Kokalanga’mba Leza udi kulampe bininge o mwanda katengapo mutyima ku myanda yobe. Bible unena’mba: “Yehova nansha i mukatampe ubangile babumvu; ino bakibengo i mwibayūke kala bakidi kulampe.” (Ñimbo ya Mitōto 138:6) Bine, Yesu wāsapwidile bandi bana ba bwanga’mba: “Enka ne nywene mine ya ku mutwe wenu i mibalwe yonso.” (Mateo 10:30) Leza umwene ne tubintu tutyetyetyetye twa ku ngitu yobe ne abe mwine kuyuka mpika. Nanshi pomulomba po pene, wivwananga kwabija kobe kitatyi kyozumbija mutyima!—1 Petelo 5:7.