Aa, Bible kafundijangapo amba ntanda i mipapakane. a Bible ke dibukupo dya sianse. Inoko kapatanyangapo bintu bya bine binena sianse. Myanda inenenwe mu Bible “i ikulupilwa kyaba kyonso, dyalelo ne nyeke.”—Ñimbo ya Mitōto 111:8.

•  Le patela Bible “mafinko aná a ntanda,” ukimba kunena bika?

•  Le kutompa kobātompele Yesu kudi Dyabola kushintulula bika?

 Musemwa “mafinko aná a ntanda” ne “ku mfulo kwa ntanda” ingidijibwe mu Bible, ke ya kwivwanapo’nka moilembelwe, pamo bwa ayo idi na mitamba iná nansha mifule. (Isaya 11:12; Yoba 37:3) Inoko, uno i muneneno wa kyelekejo ufunkila pa ntanda yonso. Kadi uno muneneno i mwingidijibwe mu Bible pobesambila pa mitamba iná ya ntanda.—Luka 13:29.

 Mobimwekela, kishima kya Kihebelu kyalamwinwe bu “mafinko” nansha “ku mfulo” i kitambe ku kishima “mapapa.” Dibuku dimo (The International Standard Bible Encyclopedia) dinena’mba, “kyoni byokingidijanga mapapa akyo mwanda wa kupūta twana, kino kishima kya Kihebelu kidi na buluji bwa mfulo ya kintu kyo-kyonso kitamune.” Kadi dino dibuku dibweja’ko amba, mu Yoba 37:3 ne Isaya 11:12, “kino kishima kishintulula mbadi, mikalo, nansha mafulo a ntanda yonso.” b

 Pa kutompa Yesu, “Dyabola wamuselela pa lūlu lulampe bya malwa kamulombola malopwe onso a ntanda ne ntumbo yao.” (Mateo 4:8) Bantu bamo banenanga’mba ino nsekununi ya mu Bible ifundija’mba ntanda yonso i mipapakane mwanda ibwanya kumwenwa pa kifuko kimo. Inoko bimweka’mba “lūlu lulampe bya malwa” lutelelwe mu ino nsekununi i kwenzankanya’tu, ke lūlupo lumweka na meso. Tala kine kyotwanenena namano.

•   Pano pa ntanda i patupu lūlu lumweka na meso pobabwanya kumwena malopwe a ntanda.

•   Dyabola kālombwelepo Yesu enka malopwe kete, ino i ne “ntumbo yao.” Ino ntumbo ya bulopwe keibwanyapo kumwenwa kulampe, nanshi bimweka’mba Dyabola wālombwele Yesu ino ntumbo mu kimonwa. Bidi pamo bwa muntu wingidija projecteur ne ecran mwanda wa kutadija muntu bifwatulo bya bipindi palapala bya ntanda.

•   Nsekununi ya Luka 4:5 iifwene nayo inena’mba, Dyabola wālombwele Yesu “mu kitatyi kityetye’tu malopwe onso a ntanda ikelwe na bantu.” Kino kilombola’mba Dyabola wāingidije muswelo mukwabo pa kutompa Yesu, pa kyaba kya kumutadija malopwe na meso a bu muntu.