Balunda ba bine i bakulupilwa kadi besumbidilwa. Pamo bwa bana ba munda mumo besenswe, badi na lulamato kadi batanga balunda nabo mutyima, nakampata mu bitatyi bya makambakano.

 “Mulunda wa bine ulombolanga buswe kitatyi kyonso.” Uno musemwa ubwanya ne kwalamunwa’mba “balunda balombola buswe nyeke.” Kishima kya Kihebelu kyalamwinwe bu “buswe” kyobengidije mu uno musemwa, kekifunkilapo’tu enka pa motwiivwanina pa muntu. I buswe bwampikwa kwisakila bulombolwa muntu mu bilongwa. (1 Bene Kodinda 13:4-7) Balunda besenswe uno muswelo belamatanga kitatyi kitūlwa kipwano kyabo pa ditompo, padi i pa mwanda wa kubulwa kumvwañana, nansha na matompo a mu būmi. Kadi belekelanga na mutyima umo. (Nkindi 10:12) Kadi mulunda kevwaninangapo mukwabo mukao kitatyi kimwendekela bintu. Inoko aye usangalanga pamo na mulunda nandi.—Bene Loma 12:15.

 “Mulunda wa bine . . . i mwanenu mubutulwe mwanda wa bitatyi bya tusua.” Luno lukindi lulombola mwikadilanga bana ba munda mumo belamate bininge. Nanshi shi tulonga byonso byotubwanya mwanda wa kukwasha mulunda udi mu makambakano, nabya tubalonga bintu pamo bwa mwanabo wa bine. Ne kadi, kipwano kipwene bano balunda kekizozangapo nansha ke mu matompo. Kiningilanga’ko kupityila ku buswe ne bulēme.

 Mukanda wa Nkindi uleta tunangu twa kyalwilo mu binenwa bīpibīpi bya patōkelela bilanguluja mutangi. Mulopwe Solomone ye ulembele bivule mu uno mukanda wa mu Bible. Mulembelo wandi i mwiifwane potō na mulembelo wa kusāsula wa mu Kihebelu, mwine kewingidijapo bishima biifwane. Ino i mulembelo ubwanya kwingidija misemwa ibidi mīlonde idi na mulangwe umo unenenwe mu miswelo ibidi mishile nansha milangwe ibidi mishile. Nkindi 17:17 i mulembelo wa kusāsula wingidija misemwa ibidi mikwatañe, kipindi kya bubidi kya musemwa kibweja mulangwe ku kipindi kibakidikīle mwanda wa kukomeneja’o. Nkindi 18:24 idi na mulembelo wa milangwe īlwa. “Kudi balunda kebejepo kwisanshija, ino kudi mulunda ulamata bininge kupita mwanabo.”

 Kitatyi kyādi kilemba Solomone Nkindi 17:17, bimweka bu wāvulukile mu ñeni kipwano kya mpwaninine kyādi pa bukata bwa shandi Davida ne Yonafane, mwanā Mulopwe Solo. (1 Samwele 13:16; 18:1; 19:1-3; 20:30-34, 41, 42; 23:16-18) Nansha ba Davida ne Yonafane byokebādipo babutulwa, bādi bapwene bya binebine kupita’nka ne mupwaninanga bana ba munda mumo. Yonafane wātūdile’nka ne būmi bwandi mu kyaka mwanda wa mulunda nandi nkasampe. a

 “Mulunda usanswanga mafuku onso nyeke, mukimonya-malwa wilombola bu-mwanabo.”—Mukanda Ukola.

 “Mulunda uswangana kitaci kyonso,inoko mwanabo wa mundai mubutulwe mwanda wa kitaci kya byamalwa.”—Bisonekwa Bitokele.

 “Mulunda i yewa ulombola kisanso kyandi mu byaba byonso. Mwanenu nandi i yewa ukukwasha mu bufudilwe.”—Dibuku Dijila.

 Tala ino video mīpi umone myanda mikatampe idi mu mukanda wa Nkindi.