“Kulupila mudi Yehova na mutyima obe onso, kadi kokesumbidila ñeni ya abe mwine. Mu mashinda obe onso mute mutyima, nandi ukōlolanga tushinda tobe.”—Nkindi 3:5, 6, Bwalamuni bwa Ntanda Mipya.

 “Kulupila Vidye na mucima obe onso kokungamai ku yobe ngeni; Mu obe mwikadilo onso, ta mucima ku kumuyuka, aye nandi ukolola obe masinda.”—Nkindi 3:5, 6, Bisonekwa Bitokele.

 Tufwaninwe kukimba buludiki kudi Yehova a Leza, pa kyaba kya kwikwatyila batwe bene butyibi bukatampe.

 “Kulupila mudi Yehova na mutyima obe onso.” Tulombolanga’mba tukulupile mudi Leza kitatyi kyotulonga bintu mwasakila. Tufwaninwe kukulupididila mudi Leza, ke na mutyima wetu onso kadi. Mu Bible, mutyima ufunkila pa muntu wa munda, mwine mubadilwa mwiivwanino wa muntu, kukanina kwa mutyima, milangwe, ne mwikadila. Nanshi, kukulupila mudi Yehova na mutyima wetu onso ke mwiivwaninopo’tu, ino kulomba bivule. Ye kyotutoñanga kulonga, mwanda tukulupile na kusumininwa amba Umpangi wetu uyukile i bintu’ka bya mvubu kotudi.—Bene Loma 12:1.

 “Kokesumbidila ñeni ya abe mwine.” Tusakilwa kukulupila mudi Leza mwanda ke biyampepo kwisumbidila ñeni yetu ya kubulwa kubwaninina. Shi twikulupile’tu enka batwe bene nansha kuleka mwiivwanino wetu uludike mashinda etu, nabya tukokeja kukwata butyibi bumweka dibajinji bu buyampe, ino ku mfulo bwalupula bipa bibi. (Nkindi 14:12; Yelemia 17:9) Tunangu twa Leza i tutabuke bininge tunangu twetu. (Isaya 55:8, 9) Shi tuludikwa na milangwe yandi, nabya tukekala na būmi buyampe.—Ñimbo ya Mitōto 1:1-3; Nkindi 2:6-9; 16:20.

 “Mu mashinda obe onso mute mutyima.” I biyampe kuyuka mumweno wa Leza mu ngikadilo mikomo yo-yonso ya mu bwetu būmi, ne mu butyibi bukatampe bo-bonso botukwata. Tuloñanga namino na kumulomba etupe buludiki, ne kwitukwasha tulonge mungya byaetulombola mu Kinenwa kyandi Bible.—Ñimbo ya Mitōto 25:4; 2 Temote 3:16, 17.

 “Ukōlolanga tushinda tobe.” Leza ōlolanga kashinda ketu na kwitukwasha twiendeje mungya misoñanya yandi myoloke. (Nkindi 11:5) Namino twepukanga makambakano a bituputupu ne kwikala na būmi bwa nsangaji ya kashā.—Ñimbo ya Mitōto 19:7, 8; Isaya 48:17, 18.

 Mukanda wa Nkindi udi na misoñanya ya kyalwilo pa kwikala na būmi bwa nsangaji kadi buyampe, ke būmi busangaja Leza kadi. Mashapita kitema mabajinji adi pamo bwa madingi obapa mwana muswedibwe kudi shandi. Shapita 3 wisambila bininge pa byabuyabuya bimwenanga boba balēmekele kadi bengidija tunangu twa Umpangi wetu.—Nkindi 3:13-26.