Ñimbo ya Mitōto 118:1-29
118 Fwijai’ko Yehova, mwanda i muyampe;+Buswe bwandi bwa ndamatyidile bulādilanga nyeke.
2 Pano Isalela anene amba:
“Buswe bwandi bwa ndamatyidile bulādilanga nyeke.”
3 Boba ba mu njibo ya Alone banene amba:
“Buswe bwandi bwa ndamatyidile bulādilanga nyeke.”
4 Boba batyina Yehova nabo banene amba:
“Buswe bwandi bwa ndamatyidile bulādilanga nyeke.”
5 Naityile Yah* mu tusua twami;Yah waunondolwele wantweja mu kifuko kilamwe senene.*+
6 Yehova udi ku wami mutamba; nkikakwatwapo moyo.+
Le muntu ubwanya kunonga kika?+
7 Yehova udi ku wami mutamba bu mukwashi wami;*+Nkamonanga kupona kwa boba banshikilwe.+
8 I kipite buya kunyemena mudi YehovaKupita’ko kukulupila bantu.+
9 I kipite buya kunyemena mudi YehovaKupita’ko kukulupila bamfumu.+
10 Mizo yonso yaunjokolokele,Ino mu dijina dya Yehova,Nebapangila kulampe.+
11 Baunjokolokele, bine, nadi mujokolokwe ami ense,Ino mu dijina dya Yehova,Nebapangila kulampe.
12 Baunjokolokele pamo bwa nyuki,Ino babudile bukidibukidi pamo bwa mudilo mu miba.
Mu dijina dya Yehova,Nebapangila kulampe.+
13 Bantakikile bibibibi* amba mpone,Ino Yehova waunkwasha.
14 Yah i mwemba wami ne bukomo bwami,Kadi waikala ke lupandilo lwami.+
15 Diwi dya nsangaji ne lupandilo*Didi mu mapema a bantu boloke.
Kuboko kwa lundyo kwa Yehova kulombolanga bukomo bwako.+
16 Kuboko kwa lundyo kwa Yehova kwizunzulanga;Kuboko kwa lundyo kwa Yehova kulombolanga bukomo bwako.+
17 Amiwa nkikafupo, aa, nkekalanga mūmi,Mwanda wa kusapula mingilo ya Yah.+
18 Yah waundemunwine na bulobo,+Ino kaumpēnepo ku lufu.+
19 Nshitwilei bibelo bya boloke;+Nkatwelanga’mo kentendela Yah.
20 Kino’ki i kibelo kya Yehova.
Boloke bakatwelela’po.+
21 Nkakutendelanga, mwanda waunondolwele+Kadi waikele lupandilo lwami.
22 Dibwe dyapelelwe na bōbakiDibaalamuka ke dibwe dinedine dya difinko.*+
23 Kino kitamba kudi Yehova;+I kya kutendelwa mu meso etu.+
24 Dino’di i difuku dilongele Yehova;Tukasangalanga ne kusepelela’mo.
25 A Yehova, witupandije’po, tubakwisāshila!
A Yehova, witupe’po bushindañani!
26 Mweselwe dyese i yewa wiya mu dijina dya Yehova;+Tubakwesela dyese tamba ku njibo ya Yehova.
27 Yehova i Leza;Wetupe kitōkeji.+
Twelai mu mulongo wa benda ku masobo na tunkindu ku makasa,+Kufika ne ku masengo a kisōkelo.+
28 Abe wi Leza wami, kadi nkakutendelanga;Leza wami, nkakuzunzulanga.+
29 Fwijai’ko Yehova,+ mwanda i muyampe;Buswe bwandi bwa ndamatyidile bulādilanga nyeke.+
Kunshi kwa Dyani
^ “Yah” i dijina Yehova mu kīpi.
^ Nansha’mba “kifuko kikatampe.”
^ Bibwanika padi i, “pamo na boba bankwasha.”
^ Bibwanika padi i, “Abe wantonwene bibibibi.”
^ Nansha’mba “bushindañani.”
^ Kishima pa kishima i, “mutwe wa difinko.”
