Ñimbo ya Mitōto 38:1-22
Lwimbo lwa Davida, lwa kuvulukila’po.*
38 A Yehova, kokandingila na bulobo bobe,Nansha kungolola na bukalabale bobe.+
2 Mwanda miketo yobe ibansabe munda mwami,Kadi kuboko kobe kubantyintyidila panshi.+
3 Ngitu yami yonso ibelanga* mwanda wi mufītwe mutyima.
Mu mikupa yami kemudipo ndoe pa mwanda wa bubi bwami.+
4 Mwanda bilubo byami bibampite mutwe;+Pamo bwa kiselwa kilēma, bibampityila bungi pa kusela.
5 Bilonda byami kebinunka ne kututumukaMwanda wa bulembakane bwami.
6 Najingwe mutyima ne kufītwa bininge;Nangakana bya bulanda dyuba dyonso dituntulu.
7 Munda mwami mutēma,*Ngitu yami yonso ibela.+
8 Napungila ne kusonsakanibwa ami ense;Mutyima wami wa malwa keundidija miyoa.*
9 A Yehova, kusakasaka kwami konso kudi ku meso obe,Kadi kubinza kwami kekukufīlwepo.
10 Mutyima wami untwa, bukomo bwami bubampu,Kadi kitōkeji kya meso ami kibantaluka.+
11 Balunda nami ne bakwetu kebanyema pa mwanda wa kipupo kyami,Kadi bayukane bami ba pabwipi kebemene kulampe.
12 Boba bakimba būmi bwami* abate bidiba;Boba basaka kunsanshija besamba bya kyonakanya;+Beuninga bongojani dyuba dyonso dituntulu.
13 Ino pamo bwa wa kitwi, amiwa kwivwana mpika;+Kadi pamo bwa kamāma, kwasama kyakanwa kyami mpika.+
14 Naikala pamo bwa muntu kabwanyapo kwivwana,Wa kyakanwa kekidipo na kya kunena pa kwibingija.
15 Mwanda nadi nkutengele, abe Yehova,+Nobe waunondolwele, a Yehova Leza wami.+
16 Mwanda nanenene amba: “Kebakasangela tusua twamiNansha kwizunzwila pondi shi kulu kwami kubashetemuka.”
17 Mwanda nadi kensa kupona,Kadi masusu ami adi nami nyeke.+
18 Nesapwile kilubo kyami;+Nadi nkambakanibwa na bubi bwami.+
19 Ino balwana nami i bankanka* kadi bakomo,*Boba banshikilwe pampikwa mwanda abavula bininge.
20 Bandubwidile kibi ku kiyampe;Badi bandwa mwanda nadi nondalonda kyokya kiyampe.
21 A Yehova, kokandeka.
A Leza, kokekala kulampe nami.+
22 Peja unkwashe,A Yehova, lupandilo lwami.+
Kunshi kwa Dyani
^ Nansha’mba “kuvuluja.”
^ Kishima pa kishima i, “I kutupu kikomo nkē mu ngitu yami.”
^ Kishima pa kishima i, “Kifuka kyami i kiyule kutēma.”
^ Nansha’mba “keumbulumija.”
^ Nansha’mba “muya wami.”
^ Kishima pa kishima i, “bōmi.”
^ Bibwanika padi i, “Ino balwana nami pampikwa mwanda i bangi.”
