Bene Kodinda Umbajinji 15:1-58
15 Pano nemuvuluja’ko, banwe banabetu, myanda miyampe yonemusapwidile,+ kadi yomwaitabije banwe, ne mine yomwimanije’mo.
2 Kadi mupandijibwanga kupityila ku ayo shi mukwatyije myanda miyampe yonemusapwidile, poso’tu mwaitabije bya bitupu.
3 Mwanda mu bintu bibajinji byonemushidile mwadi ne kyokya kyonatambwile ne ami, amba Kidishitu wafwile mwanda wa bubi bwetu mwendele Bisonekwa;+
4 ne amba wajīkilwe,+ bine, amba wasangwilwe+ mu difuku dya busatu+ mwendele Bisonekwa;+
5 ne amba wamwekēle Kefasa,*+ kupwa ke Ba Dikumi ne Babidi.+
6 Kupwa wamwekela banabetu 500 ne musubu kya pamo,+ kadi bavule mu bukata mwabo bakidi netu, nansha bamobamo byokebalāle kala mu tulo twa lufu.
7 Kupwa wamwekela Yakoba,+ penepo ke batumibwa bonso.+
8 Ino ku mfulo waumwekela ne amiwa+ pamo bwa kudi mwana mubutulwe kitatyi kekyabwene.
9 Mwanda ami ne mutyetyetyetye mu batumibwa, kadi nkifwaninwepo nansha kwitwa bu mutumibwa, mwanda nadi mpangapanga kipwilo kya Leza.+
10 Ino pa kanye ka ku buntu bitupu ka Leza kendi mongikadile’mu. Kadi kanye kandi ka ku buntu bitupu kondi kekadipo ka bitupu, ino nasusukile na mingilo kutabuka abo bonso; inoko ke amipo, ino i kanye ka ku buntu bitupu ka Leza kadi nami.
11 Penepo, ekale ami nansha abo, e motusapwila kadi e momwafikīle ku kwitabija.
12 Pano shi tusapulanga’mba Kidishitu wasangwilwe mu bafwe,+ i namani kadi bamo mu bukata mwenu banena’mba i kutupu lusangukilo lwa bafwe?
13 Shi bine i kutupu lusangukilo lwa bafwe, nanshi Kidishitu kasangwilwepo.
14 Ino shi Kidishitu kasangwilwepo, nankyo na bubine busapudi bwetu i bwa bitupu, ne lwitabijo lwenu lwine i lwa bitupu.
15 Ne kadi, nankyo tubaikala batumoni ba bubela ba Leza,+ mwanda tusapulanga bukamoni bwa bubela padi Leza potunena’mba wasangwile Kidishitu,+ aye papo kumusangula mpika shi bine bafwe kebakasangulwangapo.
16 Mwanda shi bafwe kebakasangulwangapo, nankyo ne Kidishitu mwine kasangwilwepo.
17 Ne kadi, shi Kidishitu kasangwilwepo, nankyo lwitabijo lwenu i lwa bituputupu; banwe mukidi mu bubi bwenu.+
18 Nankyo ne boba balēle mu tulo twa lufu mu bumo na Kidishitu nabo abaoneka lonso.+
19 Shi tukulupile mudi Kidishitu enka pa mwanda wa buno būmi kete, nankyo tufwaninwe kudidilwa bulanda kupita muntu ye-yense.
20 Ino Kidishitu wasangwilwe mu bafwe, kyangulwa kibajinji kya boba balēle mu tulo twa lufu.+
21 Mwanda lufu byolwāile kupityila ku muntu umo,+ lusangukilo lwa bafwe nalo lubaiya kupityila ku muntu umo.+
22 Monka mufwilanga bonso mudi Adama,+ ne mudi Kidishitu namo mo monka, bonso bakapebwa būmi.+
23 Ino muntu ne muntu mu kyaba kyandi kifwaninwe: Kidishitu kyangulwa kibajinji,+ kupwa ke boba ba Kidishitu mu kitatyi kya kwikala’po kwandi.+
24 Ebiya ku mfulo, aye pakajokeja Bulopwe kudi Leza wandi kadi Shandi, pa kupwa kujimankanya maludiki onsololo ne lupusa ne bukomo bonsololo.+
25 Mwanda aye ufwaninwe kubikala bu mulopwe enka ne bikatūla Leza balwana bonso munshi mwa maulu andi.+
26 Kadi lufu, walwana wa mfulo, ukajimankanibwa fututu.+
27 Mwanda Leza “watūdile bintu byonso munshi mwa maulu andi.”+ Ino aye panena’mba ‘bintu byonso bibatūlwa munshi,’+ i bimweke patōka’mba i kutalula’mo Yewa watūdile bintu byonso munshi mwandi.+
28 Ino pakatūlwa bintu byonso munshi mwandi, penepo Mwana nandi uketūla munshi mwa Yewa watūdile bintu byonso munshi mwandi,+ amba Leza ekale bintu byonso ku muntu ense.+
29 Shi bitupu, le boba babatyijibwa mwanda wa kwikala bafwe bakalonga namani?+ Shi bafwe kebakasangulwangapo nansha dimo, i kika kyobabatyijibwa mwanda wa kwikala bafwe?
30 Ne i kika kyotwikadile mu kyaka nsá yonso?*+
31 Difuku ne difuku nkimbanga’nka kufwa. Kino i kya binebine’nka mwikadile kusepelela kwami pomudi, banwe banabetu, kusepelela kondi nako mudi Kidishitu Yesu Mfumwetu.
32 Shi pamo bwa bantu bakwabo,* nalwile na banyema ba ntanda mu Efisesa,+ le kidi na kamweno’ka kondi? Shi bafwe kebakasangulwangapo, nankyo “tudyei tutome, mwanda kesha tusa kufwa.”+
33 Kemwakyongolwai. Kupwana na babi konanga bibidiji biyampe.*+
34 Jokejai ñeni yenu mu dishinda dyoloke kadi kemwakilongalongai bubi, mwanda bamo kebayukilepo Leza. Nanena mwanda wa mufwe bumvu.
35 Inoko, bamo bakepangula’mba: “Lelo bafwe bakasanguka namani? Bine, le bakāya na umbidi wa muswelo’ka?”+
36 Abe muntu wampikwa ñeni! Kyokya kyokuna kekikalangapo na būmi monka poso kifwe bidi.
37 Kadi kyokuna’kya, kukunangapo umbidi mwine usa kutama, ino i museke’tu onkaonka, shi i wa ñano shi nkunwa ya muswelo mukwabo;
38 inoko Leza wikipanga umbidi monka mwasakila, kadi upanga nkunwa yonso umbidi wayo.
39 Ngitu yonso ke ngitupo ya muswelo umo, ino kudi ngitu ya bantu, kudi ngitu mikwabo ya banyema, ngitu mikwabo ya byoni, ingi nayo ya mwita wa lui.
40 Kudi imbidi ya mūlu+ ne imbidi ya panshi;+ inoko ntumbo ya imbidi ya mūlu idi muswelo ungi, ntumbo ya imbidi ya panshi nayo muswelo mukwabo.
41 Ntumbo ya dyuba idi muswelo ungi, ne ntumbo ya kweji nayo muswelo mukwabo,+ kadi ntumbo ya ñenyenye nayo muswelo mukwabo; bine, luñenyenye i lwishile na luñenyenye lukwabo ku ntumbo.
42 Ne lusangukilo lwa bafwe nalo mo monka. Kyakuninwe kya kubola; kibasangulwa ke kya kubulwa kubola.+
43 Kyakuninwe kifutululwe; kibasangulwa ke kya ntumbo.+ Kyakuninwe kizoze; kibasangulwa ke kya bukomo.+
44 Kyakuninwe umbidi wa ngitu; kibasangulwa ke umbidi wa mushipiditu. Shi kudi umbidi wa ngitu, kudi ne wa mushipiditu.
45 O mwanda kilembelwe amba: “Muntu mubajinji Adama wāikele ke muntu* mūmi.”+ Adama wa mfulo waikele ke mushipiditu upāna būmi.+
46 Inoko, kyokya kya mushipiditu ke kibajinjipo. Kyokya kya ngitu kyo kibajinji, kupwa ke kyokya kya mushipiditu.
47 Muntu mubajinji i mutambe ku biloba kadi wālongelwe na luvumbi;+ muntu wa bubidi i mutambe mūlu.+
48 Monka mwikadile yewa ulongelwe ku luvumbi, mo mwikadile ne boba balongelwe ku luvumbi bene; kadi monka mwikadile yewa wa mūlu, mo mwikadile ne boba ba mūlu bene.+
49 Kadi enka motwaifwanine yewa ulongelwe ku luvumbi,+ e monka motukefwanina yewa wa mūlu.+
50 Inoko nemulombola kino, banwe banabetu, amba ngitu ne mashi kebikokejapo kupyana Bulopwe bwa Leza, nansha bubole kupyana kubulwa kubola.
51 Talai! Nemulombola kifibwe kikola’mba: Ke batwe bonsopo bakalāla mu tulo twa lufu, ino batwe bonso tukalamunwanga,+
52 mu kyaba kityetye’tu, na mu kukopa kwa diso, pakavuma kimpungidi kya mfulo. Mwanda kimpungidi kikavumanga,+ kadi bafwe bakasangulwanga kebakibolapo, ne kadi tukalamunwanga.
53 Mwanda kino kibola kifwaninwe kuvwala kya kubulwa kubola,+ kadi kino kifwa kifwaninwe kuvwala kya kubulwa kufwa.+
54 Inoko kino kibola pokikavwala kya kubulwa kubola ne kino kifwa pokikavwala kya kubulwa kufwa, penepo e popakafikidila kinenwa kilembelwe amba: “Lufu lubaminininwa nyeke.”+
55 “A lufu, le bushindañani bobe budi kwepi? A lufu, le lunonga lobe ludi kwepi?”+
56 Lunonga luleta lufu i bubi,+ kadi bukomo bwa bubi i Bijila.*+
57 Ino tufwija’ko Leza, mwanda wetupe bushindañani mudi Mfumwetu Yesu Kidishitu!+
58 Shi ke pano, banwe banabetu baswedibwe, ningai,+ kemwakijinai, vudilwai mafuku onso bya kulonga+ mu mwingilo wa Mfumwetu, byomuyukile amba kwenu kususuka na mingilo ke kwa bitupupo+ mudi Mfumwetu.
Kunshi kwa Dyani
^ Witwa ne bu Petelo.
^ Nansha’mba “kitatyi kyonso?”
^ Bibwanika padi i, “mungya mumweno wa bantu.”
^ Nansha’mba “kubolejanga ngikadila miyampe.”
^ Nansha’mba “muya.”
^ Nansha’mba “kadi Bijila byo bipa bubi bukomo bwabo.”
