Bene Kodinda Umbajinji 6:1-20
6 Le kudi umo mu bukata mwenu shi abepotomeja na mukwabo+ usomonwa kwenda ku kidye ku meso a bantu bampikwa koloka, ino kwenda kudi bajila mpika?
2 Nansha le kemuyukilepo amba bajila bakatyibilanga ino ntanda mambo?+ Kadi shi ino ntanda i ya kutyibilwa mambo na banwe, le kemubwanyapo kusambija myanda mityemitye?
3 Le kemuyukilepo amba tukatyibilanga bamwikeulu mambo?+ Penepo myanda ya mu buno būmi ke pepi?
4 Ebiya shi mudi na myanda ya mu buno būmi ya kusamba,+ le i bantu bafutulwilwe na kipwilo bomutūla bu batyibi?
5 Nanena mwanda wa mufwe bumvu. Le mu bukata mwenu kemudipo muntu umo wa tunangu ubwanya kutyibila banababo mambo?
6 Inoko, mwana wenda’ko na mwanabo mu kidye, kadi ku meso a bampikwa kwitabija!
7 Na bubine, mubanekenibwa kala shi mwisambila banwe bene na bene. Mwanda waka kemulekapo’tu bemulubile?+ Mwanda waka kemulekapo’tu bemudimbe?
8 Inoko, banwe mulubanga ne kudimba bantu, kadi i banabenu!
9 Le kemuyukilepo amba ba kubulwa koloka kebakapyanangapo Bulopwe bwa Leza?+ Kemwakyongolwai.* Ba busekese,*+ ne ba kutōta bilezaleza,+ ne ba makoji,+ ne bana-balume balālwa na bana-balume,+ ne bana-balume balāla bana-balume,*+
10 ne bangivi, ne bantu ba makomwa-meso,+ ne bankolwankolwa,+ ne ba kutukana,* ne ba manyengenyenge kebakapyanangapo Bulopwe bwa Leza.+
11 Kadi mo mwadi mwikadile ne bamobamo mu bukata mwenu. Ino mubaoijibwa tō;+ mubapandulwa;+ mubatelwa bu boloke+ mu dijina dya Mfumwetu Yesu Kidishitu ne na mushipiditu wa Leza wetu.
12 Bintu byonso kebidipo na kijila* kondi; inoko ke bintupo byonso bidi na kamweno.+ Bintu byonso kebidipo na kijila kondi; inoko nkikalekapo kintu nansha kimo kimbikale.*
13 Byakudya bidi’ko mwanda wa kifu, kifu nakyo mwanda wa byakudya, ino Leza ukajimankanyanga’byo byonso.+ Umbidi keudi’kopo mwanda wa busekese,* ino i mwanda wa Mfumwetu,+ Mfumwetu nandi mwanda wa umbidi.
14 Inoko Leza wasangwile Mfumwetu+ kadi uketusangulanga ne batwe bene mu lufu+ na bukomo bwandi.+
15 Le kemuyukilepo amba imbidi yenu i bya ku ngitu bya Kidishitu?+ Le penepo ntyibe bya ku ngitu bya Kidishitu nkebilunge kudi ndumba? Mhm!
16 Le kemuyukilepo amba yewa mwilunge kudi ndumba i umbidi umo nandi? Mwanda aye unena’mba, “Abo babidi bakekala ngitu imo.”+
17 Ino yewa mwilunge kudi Mfumwetu i umo pamo nandi mu mushipiditu.+
18 Nyemai busekese!*+ Bubi bukwabo bonso bubwanya kulonga muntu budi panja pa umbidi wandi, ino yewa ense ulongalonga busekese ulubilanga umbidi wandi aye mwine.+
19 Le kemuyukilepo amba umbidi wenu i tempelo+ ya mushipiditu ujila udi munda mwenu, omutambwile kudi Leza?+ Ne kadi, kemudipo ba banwe bene, aa,+
20 mwanda mwapotelwe ku lupoto.+ Bine nanshi, tumbijai Leza+ mu umbidi wenu.+
Kunshi kwa Dyani
^ Nansha’mba “bana-balume basambakena pamo na bana-balume.”
^ Tala “Busekese” ku Nshintulwilo ya Bishima.
^ Nansha’mba “Kemwakibepelwai.”
^ Nansha’mba “ba muneneno mubi.”
^ Nansha’mba “i bitabijibwe.”
^ Nansha’mba “kintādile.”
^ Mu Kingidiki i, porneia. Tala Nshintulwilo ya Bishima.
^ Mu Kingidiki i, porneia. Tala Nshintulwilo ya Bishima.
