Bilongwa bya Mafuku wa Bubidi 32:1-33
32 Kupwa kwa bino bintu ne bino bilongwa bya kikōkeji,+ Senakediba mulopwe wa Ashidia waiya kutamba’dyo Yuda. Watēkela bibundi bikomejibwe kasāla, na mutyima wa kutwela’mo ku bukomo ne kwibikwata.+
2 Hezekia pa kumona’mba Senakediba waiya ne amba udi na mutyima wa kulwa na Yelusalema divita,
3 wakala ñeni na bamfumu ne ba bulwi bandi, kupwa watyiba mbila ya kujika masulo a mema a panja pa kibundi,+ kadi nabo bamukwasha’ko.
4 Bantu bavule bebungile pamo, bajika masulo onso a mema ne kamunonga kadi kakuka mu ntanda’ya, kebanena’mba: “Le kiila balopwe ba Ashidia kutanina mema mangi i kika?”
5 Kadi, waubakulula na kusumininwa lubumbu lonso lobapomwene, waimika’po biteba, walonga ne lubumbu lukwabo panja. Walongolola ne Ndunduma*+ ya Kibundi kya Davida, kupwa walonga ne byabulwi bivule ne mangabo.
6 Penepo watūla bakata ba basola pa bantu, webakongakenya mu kīkwe kya pa kibelo kya kibundi, webakankamika* amba:
7 “Kankamanai kadi mwikomejei. Kemwakakwatwai moyo nansha kutuyuka pa mwanda wa mulopwe wa Ashidia+ ne kibumbo kyonso kyadi nakyo, mwanda botudi nabo i bavule kupita badi nabo.+
8 Aye udi na kuboko kwa ngitu,* ino batwe tudi na Yehova Leza wetu wa kwitukwasha ne kulwa malwi etu.”+ Bantu bakankamikwa na binenwa bya Hezekia mulopwe wa Yuda.+
9 Kupwa, Senakediba mulopwe wa Ashidia paadi ku Lakishi+ na bukomo bwandi bwa bulopwe,* watuma bengidi bandi ku Yelusalema kudi Hezekia mulopwe wa Yuda ne kudi bene Yudea bonso mu Yelusalema,+ amba:
10 “Senakediba mulopwe wa Ashidia wanena namino amba, ‘Le mukulupile mu bika pomukishikete mu Yelusalema aye mutēkelwe kasāla?+
11 Mwene Hezekia wimongolanga ne kwimwipaija na kipupo kya nzala ne kyumwa, panena’mba: “Yehova Leza wetu usa kwitukūla ku kuboko kwa mulopwe wa Ashidia?”+
12 Le ke enkapo Hezekia watalwile mitenta ya Leza wenu*+ ne bisōkelo Byandi+ kupwa kanena Yuda ne Yelusalema amba: “Mufwaninwe kwivukwila ku meso a kisōkelo kimo kadi mufwaninwe kufitwila’po mwishi wa bitapwa byenu”?+
13 Le kemuyukilepo byonalongele ami ne bakulutuba bami ku bantu bonso ba matanda?+ Le baleza ba mizo ya matanda’a babwenye kukūla ntanda yabo ku kuboko kwami?+
14 Mu baleza bonso ba ino mizo yaonakanibwe na bakulutuba bami, le i leza’ka wabwenye kukūla bantu bandi ku kuboko kwami, amba Leza wenu nandi abwanye kwimukūla ku kuboko kwami?+
15 Shi ke pano, Hezekia kakemongola uno muswelo!+ Kemwakamukulupilai, mwanda kekudipo leza wa muzo nansha wa bulopwe bo-bonso wabwenye kukūla bantu bandi ku kuboko kwami ne ku kuboko kwa bakulutuba bami. Penepo Leza wenu ke pepi, le ukabwanya kwimukūla ku kuboko kwami!’”+
16 Bengidi bandi banenene Yehova Leza wa bine ne Hezekia mwingidi wandi bibi kutabuka.
17 Walemba ne mikanda+ ya kutuka Yehova Leza wa Isalela+ ne kumunenena bibi amba: “Monka kemwabwaninyepo baleza ba mizo ya matanda kukūla bantu babo ku kuboko kwami,+ ne Leza wa Hezekia nandi kakabwanyapo kukūla bantu bandi ku kuboko kwami.”
18 Badi beta’nka kwita bantu ba Yelusalema badi pa lubumbu na diwi dikatampe mu ludimi lwa Bayuda, mwanda wa kwibakwatyija moyo ne kwibatuyula, amba bakwate kibundi.+
19 Banenene Leza wa Yelusalema bibi monka mobadi banenena’byo baleza ba bantu ba pano pa ntanda, mingilo ya makasa a bantu.
20 Ino Mulopwe Hezekia ne mupolofeto Isaya+ mwanā Amoze badi balombela’nka kulombela pa uno mwanda ne kwabija momwa mūlu.+
21 Penepo Yehova watuma mwikeulu watukija fututu ba bulwi bonso+ bakomokomo, ne batangidiji, ne bakata ba mu nkambi ya mulopwe wa Ashidia, wajokela ku yandi ntanda bya bumvu. Kupwa watwela mu njibo* ya leza wandi, ebiya bandi bana bamo bamwipaila’mo na kipete.+
22 Enka nenki Yehova wapandija Hezekia ne bekadi ba Yelusalema ku kuboko kwa Senakediba mulopwe wa Ashidia ne ku kuboko kwa bakwabo bonso, kadi wamupa kukōkolokwa ku mitamba yonso.
23 Kadi bantu bavule baletela Yehova byabuntu ku Yelusalema ne kuletela Hezekia mulopwe wa Yuda+ bintu bilumbuluke, kupwa mizo yonso yamulēmeka bininge.
24 Mu mene mafuku’a Hezekia wabela kadi wadi kadi kubwipi na lufu, ebiya walombela kudi Yehova,+ nandi wamulondolola wamupa ne kiyukeno.*+
25 Ino Hezekia kalongelepo senene mungya biyampe byobamulongēle, mwanda mutyima wandi wezunzwile, bamufītyilwa mutyima aye ne Yuda ne Yelusalema mwine.
26 Inoko Hezekia wetyepeja pa mwanda wa kwizunzula kwa mutyima wandi,+ aye ne bekadi ba Yelusalema, ebiya Yehova waleka kwibafītyilwa mutyima mu mafuku a Hezekia.+
27 Penepo Hezekia waikala na bupeta bungi ne ntumbo;+ kadi welongela bibīko+ bya ndalama, bya olo, bya mabwe malēme, bya māni a balasome, bya mangabo, ne bya bintu byonso bya bulēme.
28 Kadi walonga ne mwa kubīka byangulwa bya miseke ne vinyu mipya ne māni, ne bipopole bya bimunanwa bya miswelo yonso ne bipopole bya mikōko.
29 Waikala ne na bibundi, ne bimunanwa bingi, bya mikōko ne bañombe, mwanda Leza wamupēle bintu bivule bininge.
30 I Hezekia wajikile nsulo ya kungala ya mema+ a Ngiona,+ weakupwila kushika kwa Kibundi kya Davida,+ kadi Hezekia wamwene biyampe mu mingilo yandi yonso.
31 Inoko, patuminwe bantu banenenanga bamfumu ba Babiloni kukamwipangula myanda ya kiyukeno*+ kyalongekele mu ntanda’ya,+ Leza wa bine wamulekele bunka bwandi mwanda wa kumutūla pa ditompo,+ amba ayuke byonso byadi mu mutyima wandi.+
32 Myanda mikwabo ya mānga ya Hezekia ne bilongwa byandi bya buswe bwa ndamatyidile,+ i milembwe mu kimonwa kya mupolofeto Isaya,+ mwanā Amoze, mu Mukanda wa Balopwe ba Yuda ne ba Isalela.+
33 Kupwa Hezekia walādikwa mwanda wa kukōkolokwa na bakulutuba bandi, bamujīka mu mukuna wenda ku ntanda ijīkwanga’mo bana ba Davida;+ kadi Yuda ne bekadi bonso ba Yelusalema bamulēmeka pa lufu lwandi. Ebiya wandi mwana Manase wabikala pa kyandi kyaba.
Kunshi kwa Dyani
^ Nansha’mba “Milo.” Kishima kya Kihebelu kishintulula’mba “kudinga.”
^ Kishima pa kishima i, “wesamba ku mutyima wabo.”
^ Nansha’mba “bukomo bwa bantu.”
^ Nansha’mba “basola bandi bonso ne buya bwa dyangi.”
^ Kishima pa kishima i, “yandi.”
^ Nansha’mba “tempelo.”
^ Nansha’mba “kilomboji.”
^ Nansha’mba “kilomboji.”
