Batyibi 17:1-13
-
Bilezaleza bya Mika ne kitobo wandi (1-13)
17 Kwadi mwana-mulume umo mu ntanda ya ngulu ya Efelaimi+ wa dijina dya bu Mika.
2 Wanenene inandi amba: “Bibese 1 100 bya ndalama byobakuselele’bya, bine byowadi ufingila mafingo onaivwene’a—tala! ndalama’ya i ami udi nayo. Ami ye weiselele.” Pa kino inandi wanena’mba: “Yehova esele wami mwana.”
3 Ebiya wajokejeja inandi bibese 1 100 bya ndalama, ino inandi wanena’mba: “Binebine’tu nsa kupandula ndalama ya ku makasa ami kudi Yehova mwanda wa wami mwana alongeje nkishi musōnge ne nkishi wa kyuma.*+ Pano nakujokejeja’yo.”
4 Kupwa wajokejeja inandi ndalama, inandi nandi wasela bibese 200 bya ndalama wapa’byo sendwe wa ndalama. Nandi wapunga nkishi musōnge ne nkishi wa kyuma;* batūlwa mu njibo ya Mika.
5 Uno mwana-mulume Mika wadi na njibo ya baleza, wapunga efoda+ ne bankishi ba batelafimi,*+ watūla* ne wandi mwana umo amwingidile bu kitobo.+
6 Mu mene mafuku’a kekwadipo mulopwe mu Isalela.+ Muntu ne muntu wadi ulonga byobya byamona bu byoloke mu meso andi aye mwine.*+
7 Ino kwadi nsongwalume umo wa mu Betelema+ mu Yuda wadi wa ku kisaka kya Yuda. I mwine Levi+ wadi ushikata kwine’kwa kitatyi kampanda.
8 Muntu’wa wavilukile mu kibundi kya Betelema mu Yuda kakakimbe kwa kushikata. Paadi mu lwendo, wafikile ku ntanda ya ngulu ya Efelaimi ku njibo ya Mika.+
9 Penepa Mika wamwipangula’mba: “Le kotamba i kwepi?” Nandi amba: “Ne mwine Levi, ntamba mu Betelema mu Yuda, kadi ñendanga nkimba kwa kushikata.”
10 Penepa Mika wamunena’mba: “Shikata nami wikale bu tata* ne bu kitobo wami. Nsa kukupa bibese dikumi bya ndalama ku mwaka ne mwaka ne kitutulu kya bivwalwa ne byakudya byobe.” Ponkapo mwine Levi watwela.
11 Enka nenki mwine Levi waitabija kushikata na mwana-mulume’wa, nsongwalume’wa waikala pamo bwa umo wa mu bandi bana.
12 Kadi Mika watūla* mwine Levi bu kitobo wandi,+ nandi washikata mu njibo ya Mika.
13 Kupwa Mika wanena’mba: “Pano nayuka’mba Yehova usa kunongela biyampe mwanda mwine Levi waikala kitobo wami.”
Kunshi kwa Dyani
^ Nansha’mba “nkishi musungululwe.”
^ Nansha’mba “nkishi musungululwe.”
^ Kishima pa kishima i, “wadinga kuboko na.”
^ Nansha’mba “baleza ba mu njibo; bilezaleza.”
^ Nansha’mba “byaadi ulanga’mba i byoloke.”
^ Nansha’mba “mudingidi.”
^ Kishima pa kishima i, “wadinga kuboko na.”
