Batyibi 21:1-25
-
Kisaka kya Benjemani kibapandijibwa (1-25)
21 Ino bana-balume ba Isalela batyipile uno mutyipo mu Mizipa+ amba: “I kutupu muntu nansha umo motudi ukapāna wandi mwana mwana-mukaji kudi mwana-mulume wa Benjemani ke wandi mukaji.”+
2 Penepo bantu baiya ku Betele+ bashikata kwine’kwa ku meso a Leza wa bine kufika ne ku kyolwa, bayoyokota ne kudila bya bulanda.
3 Badi banena’mba: “A Yehova Leza wa Isalela, mwanda waka kino kibalongeka mu Isalela? Mwanda waka kudi kisaka kimo kyabulwa’ko dyalelo mu Isalela?”
4 Difuku dilonda’ko bantu babūka lubanga bwē, baubaka kwine’kwa kisōkelo kya kulambwila’po byamulambu bisōkwe ne byamulambu bya kipwano.+
5 Kupwa bantu ba Isalela banena’mba: “I ani wa mu bisaka byonso bya Isalela kakandilepo kwiya kwibunga ku meso a Yehova?” mwanda batyipile mutyipo mukatampe amba muntu ense kakandilepo kudi Yehova ku Mizipa ukepaibwa binebine.
6 Ebiya bantu ba Isalela baivwana bulanda pa byafikīle banababo bene Benjemani. Kebanena’mba: “Dyalelo kisaka kimo kibaketwe ku Isalela.
7 Le tusa kulonga namani pa kupāna bakaji kudi bano bashele’ko, pano potutyipile mu dijina dya Yehova+ amba ketukebapepo wetu mwana mwana-mukaji nansha umo ke wabo mukaji?”+
8 Baipangula’mba: “I ani wa mu bisaka bya Isalela kakandilepo kudi Yehova ku Mizipa?”+ Byamwekele amba kekwadipo nansha umo wa ku Yabeshe-Ngileade waile ku nkambi kwadi kipwilo.
9 Pabadilwe bantu, bamwene amba kekudipo mwikadi nansha umo wa ku Yabeshe-Ngileade wadi’ko.
10 Ponkapo kitango kyatuma kwine’kwa bana-balume 12 000 bakomokomo kutabuka. Bebasoñanya’mba: “Endai mukatape bekadi ba Yabeshe-Ngileade na kipete, ne bana-bakaji ne bana bene kumo.+
11 Mufwaninwe kulonga namino: Mwana-mulume yense, kadi ne mwana-mukaji yense ke mulāle na mwana-mulume, mufwaninwe kumonakanya fututu.”
12 Mu bekadi ba mu Yabeshe-Ngileade, batana’mo bansongwakaji 400 bajike, kebalēle na mwana-mulume. Ebiya bebaleta ku nkambi ku Shilo,+ kibundi kidi mu ntanda ya Kenani.
13 Kupwa kitango kyonso kyatuma musapu kudi bene Benjemani ku kidibwe kya Dimōne+ ne kwibasakila ndoe.
14 Penepa Benjemani wajoka mu kine kitatyi’kya. Bebapa bana-bakaji bobalamine bōmi mu bana-bakaji ba Yabeshe-Ngileade,+ ino kebatenepo bana-bakaji bebabwana.
15 Ebiya bantu baivwana bulanda pa byafikīle Benjemani+ mwanda Yehova waletele kwilalulula mu bisaka bya Isalela.
16 Bakulumpe ba kitango baipangula’mba: “Le tusa kulonga namani pa kupāna bakaji kudi bano bana-balume bashele’ko, mwanda bana-bakaji bonso batukijibwe fututu mu bene Benjemani?”
17 Balondolola’mba: “Kufwaninwe kwikala bupyani bwa boba ba ku Benjemani bapandile, kutyina’mba kisaka kimo kyakajimankana mu Isalela.
18 Ino batwe ketunenwepo kwibapa bakaji mu betu bana bana-bakaji, mwanda bantu ba Isalela batyipile mutyipo amba: ‘Afingwe mafingo yewa ukapāna mukaji kudi Benjemani.’”+
19 Kupwa banena’mba: “Talai! Kudi masobo a Yehova asobwanga mwaka ne mwaka mu Shilo,+ kibundi kidi kungala kwa Betele ne kutunduka kwa dishinda dikatampe dikanda ku Betele kufika ne ku Shekema ne kunshi kwa Lebona.”
20 Ebiya basoñanya bana-balume ba Benjemani amba: “Endai mukafyame mu madimi a mañanza.
21 Shi mubamone bansongwakaji* ba mu Shilo batamba kwiya kuja na baja luja lwa kujokoloka, muntu ne muntu ufwaninwe kutamba mu madimi a mañanza akwate mukaji wa mu bansongwakaji ba mu Shilo, kupwa mujokele ku ntanda ya Benjemani.
22 Ino shi bashabo ne banababo abaiya kwitunena, tusa kwibalombola’mba, ‘Mwitufwilei’ko lusa pangala pabo, mwanda ketwabwenyepo kupa muntu ne muntu mukaji ku divita+ kadi nenu kemwadipo mubwanya kwibapa bakaji pampikwa kupya mambo.’”+
23 Ponkapo bana-balume ba Benjemani balongela monka, muntu ne muntu wasela mukaji mu bana-bakaji badi baja’ba. Kupwa bajokela ku bupyani bwabo, baubaka bibundi byabo+ ne kushikata monka.
24 Penepa bene Isalela bapalankana tamba kwine’kwa mu kine kitatyi’kya, muntu ne muntu waenda ku kisaka kyandi ne ku difu dyandi, bataluka kwine’kwa, muntu ne muntu waenda ku bupyani bwandi.
25 Mu mene mafuku’a kekwadipo mulopwe mu Isalela.+ Muntu ne muntu wadi ulonga byobya byamona bu byoloke mu meso andi aye mwine.*
Kunshi kwa Dyani
^ Kishima pa kishima i, “bana bana-bakaji.”
^ Nansha’mba “byaadi ulanga’mba i byoloke.”
