Bene Levi 19:1-37
19 Yehova wesamba monka na Mosesa amba:
2 “Wisambe na kitango kyonso kya bene Isalela wibalombole amba, ‘Mufwaninwe kwikala bajila mwanda amiwa, Yehova Leza wenu, ne ujila.+
3 “‘Muntu ne muntu mu bukata mwenu ufwaninwe kulēmeka* inandi ne shandi,+ kadi mufwaninwe kulama masabato+ ami. Amiwa ne Yehova Leza wenu.
4 Kemwakalamukilai kudi baleza ba bitupu+ nansha kwilongela baleza ba byuma bisungululwe.+ Amiwa ne Yehova Leza wenu.
5 “‘Shi kemulambula kitapwa kya kipwano kudi Yehova,+ mufwaninwe kulambula’kyo mu muswelo omubwanya kwitabijibwa.+
6 Kifwaninwe kudibwa mu difuku dya kitapwa kyenu ne mu difuku dilonda’po, ino byobya bikashala’ko kufika ne mu difuku dya busatu bifwaninwe kusōkwa mu mudilo.+
7 Inoko shi badye’ko bimo mu difuku dya busatu, i kintu kya munyanji kekiketabijibwapo.
8 Yewa udya’byo ukapebwa mfuto pa kilubo kyandi mwanda wakobakanya kintu kijila kya Yehova, kadi yao muntu* ufwaninwe kutyibwa’ko* mu bantu bandi.
9 “‘Shi kemwangula mwangulo wa ntanda yenu, kemufwaninwepo kwangudidila ne kufulakufula kwa madimi enu, kadi kemufwaninwepo kukōkolola* byangulwa byenu.+
10 Kadi kufwaninwepo kukongakanya bishele mu budimi bobe bwa mañanza nansha kōlola mañanza akusankene mu budimi. Ukashila’o mulanda*+ ne mweni wa kibundi. Amiwa ne Yehova Leza wenu.
11 “‘Kemufwaninwepo kwiba,+ kemufwaninwepo kongolañana,+ kadi kemufwaninwepo kwidimba banwe bene na bene.
12 Kemufwaninwepo kutyipa bya bubela mu dijina dyami,+ kadi kufwaninwepo kukobakanya dijina dya Leza obe. Amiwa ne Yehova.
13 Kufwaninwepo kudimba mukwenu,+ kadi kufwaninwepo kunyoñomona bintu.+ Kokalama mfutwa ya muntu wa kaji bufuku bonso kufika ne ku lubanga.+
14 “‘Kufwaninwepo kufinga* wa kitwi nansha kutūla kya kukukala ku meso a mpofu,+ ufwaninwe kutyina Leza obe.+ Amiwa ne Yehova.
15 “‘Kemufwaninwepo kubulwa boloke mu butyibi bwenu. Kufwaninwepo kwikala na mboloji kudi mulanda nansha kwitabila mpeta.+ Ufwaninwe kutyibila mukwenu mambo na boloke.
16 “‘Kufwaninwepo kwenda koku ne koku uvubakanya myanda mu bantu bobe.+ Kufwaninwepo kwimana kulwa na būmi* bwa mukwenu.*+ Amiwa ne Yehova.
17 “‘Kufwaninwepo kushikwa mwanenu mu mutyima obe.+ Ufwaninwe kudingila mukwenu+ kutyina’mba nobe wakasela bubi pamo nandi.
18 “‘Kufwaninwepo kulubula kinongo+ nansha kulamina bana ba bantu bobe kīji, sanswa mukwenu mowisanshilwe abe mwine.+ Amiwa ne Yehova.
19 “‘Mufwaninwe kulama bitungo byami: Kufwaninwepo kutūla banyema bobe ba nja ba miswelo ibidi amba betenteke. Kufwaninwepo kukuna mu madimi obe nkunwa ya miswelo ibidi,+ kadi kufwaninwepo kuvwala bivwalwa bilongwe na nyushi ya miswelo ibidi misobakanye.+
20 “‘Shi muntu walāla na mwana-mukaji mwingidi obakwatyile kudi muntu mukwabo, ino aye wadi kakūdilwe nansha kupebwa bwanapabo, bafwaninwe kupebwa mfuto. Inoko kebafwaninwepo kufikijibwa ku lufu, mwanda mwana-mukaji wadi kapelwe bwanapabo.
21 Muntu’wa ufwaninwe kuselela Yehova kyamulambu kyandi kya mambo ku pema wa kubungakena’ko, mukōko mulume wa kyamulambu kya mambo.+
22 Kitobo ukamupūtyila bubi na mukōko wa kyamulambu kya mambo ku meso a Yehova mwanda wa bubi bwalongele, nandi ukalekelwa bubi bwalongele.
23 “‘Shi mubatwela mu ntanda’ya, mubakune mutyi o-onso udibwa, mufwaninwe kumona bipa byao bu bya disubi ne bijidikwe.* Ukekala mwimujidikwe* myaka isatu. Keukadibwapo.
24 Ino mu mwaka wa buná, bipa byao byonso bikekala bijila mwanda wa kusangala ku meso a Yehova.+
25 Ebiya mu mwaka wa butano, mukokeja kudya bipa byao mwanda wa kubweja’byo ku byangulwa byenu. Amiwa ne Yehova Leza wenu.
26 “‘Kemufwaninwepo kudya kintu nansha kimo kidi’mo mashi.+
“‘Kemufwaninwepo kubuka na mitāmu nansha kulonga bya maleñanya.+
27 “‘Kemufwaninwepo kutenda* nywene ya kufulakufula kwa mutwe nansha konakanya ku mfulo kwa myevu yobe.+
28 “‘Kemufwaninwepo kwiketaketa ngitu yenu mwanda wa muntu*+ mufwe, kadi kemufwaninwepo kwitapa ntapo. Amiwa ne Yehova.
29 “‘Kokafutulula obe mwana mwana-mukaji na kumwalamuna ke ndumba,+ kutyina’mba ntanda’ya yakalonga bundumba ne kuyula’yo bilongwa bya bumvu.+
30 “‘Mufwaninwe kulama masabato+ ami, kadi mufwaninwe kulēmeka* bininge kipandulwe kyami. Amiwa ne Yehova.
31 “‘Kemwakalamukilai kudi babuka na bibanda,+ kadi kemwakepangulai bilumbu+ kutyina’mba mwakesubija nabyo. Amiwa ne Yehova Leza wenu.
32 “‘Ufwaninwe kwimanina wa mvwi,+ ufwaninwe kulēmeka mununu,+ kadi ufwaninwe kutyina Leza obe.+ Amiwa ne Yehova.
33 “‘Shi mweni ushikatanga nobe mu yenu ntanda, kemufwaninwepo kumususula.+
34 Mweni ushikatanga nenu ufwaninwe kwikala pamo bwa mwine Isalela mu bukata mwenu,+ kadi ufwaninwe kumusanswa mowisanshilwe abe mwine, mwanda nenu mwadi beni ba kibundi mu ntanda ya Edipito.+ Amiwa ne Yehova Leza wenu.
35 “‘Kemufwaninwepo kwingidija bipimo bidimbañana pa kupima bula, bulēmi nansha bungi.+
36 Mufwaninwe kwingidija bipimo bibwane bya bulēmi, ne bulēmi bubwane, bipimo* bibwane bya bintu byūmu, ne bipimo*+ bibwane bya bintu bidi bwa mema. Amiwa ne Yehova Leza wenu wemulupwile mu ntanda ya Edipito.
37 Nanshi mufwaninwe kulama bitungo byami byonso ne mutyibilo wami wa mambo, kadi mufwaninwe kwibilonda.+ Amiwa ne Yehova.’”
Kunshi kwa Dyani
^ Kishima pa kishima i, “kutyina.”
^ Nansha’mba “muya.”
^ Nansha’mba “kwipaibwa.”
^ Nansha’mba “bishala’ko.”
^ Nansha’mba “kimonya-malwa.”
^ Nansha’mba “kusakila bibi.”
^ Kishima pa kishima i, “mashi.”
^ Bibwanika padi i, “Kufwaninwepo kutala bitupu shi būmi bwa mukwenu budi mu kyaka.”
^ Kishima pa kishima i, “pamo bwa kyayo kikoba kya ngitu ya bwana-bulume.”
^ Kishima pa kishima i, “wampikwa kutwela kwisao.”
^ Nansha’mba “kusesa; kuketa.”
^ Nansha’mba “mwanda wa muya.” Kishima kya Kihebelu nephesh pano kifunkila pa muntu mufwe.
^ Nansha’mba “kwivwanina moyo.” Kishima pa kishima i, “kutyina.”
^ Kishima pa kishima i, “efa mubwane.” Tala Mbwejo B14.
^ Kishima pa kishima i, “hina mubwane.” Tala Mbwejo B14.
