Divilu 1:1-22
1 Kadi ano’a o majina a bana ba Isalela bāile na Yakoba mu Edipito, muntu ne muntu wāile na ba mu njibo yandi:+
2 Lubeni, Shimioni, Levi, ne Yuda;+
3 Isakala, Zebuluna, ne Benjemani;
4 Dani ne Nafatale, Ngade ne Ashela.+
5 Boba* bonso bobābutwidile Yakoba* bādi bantu* 70, ino Yosefa aye wādi kala mu Edipito.+
6 Mwenda mafuku Yosefa wāfwa,+ ne banababo bonso ne lolwa lukongo lonso.
7 Bene Isalela* babutula kebevudija bininge, kadi badi bevudija’nka kwivudija ne kwikomeja mu muswelo utulumukwa, penepa bayula mu ntanda’ya.+
8 Kupwa mu Edipito mwabikala mulopwe mupya, mwine kadipo uyukile Yosefa.
9 Penepa wanena bantu bandi amba: “Talai! Bantu ba Isalela abavula ne kwikomeja kwitupita.+
10 Longai twibadyumukile. Shi bitupu, basa kwendelela kwivudija, kadi shi divita dibatambe, bakelunga na balwana netu kebalu netu kupwa bakatamba mu ino ntanda.”
11 Penepo bebatongela bakata ba mingilo ya kuningilwa* ba kwibamwesha malwa na mingilo mikomokomo,+ kebōbakila Felo bibundi bya bibīko, ko kunena’mba Pitome, ne Lamesese.+
12 Ino abo pa kwibamwesha malwa bininge po pene bevudija’ko ne kusambakana konso konso, ebiya baivwana moyo mukatampe ne luzakalo pa mwanda wa bene Isalela.+
13 Mfulo mfulō, bene Edipito batweja ku bukomo bene Isalela mu bupika bwa malwa.+
14 Baludija būmi bwabo na mingilo mikomokomo, pobādi bavuba bitoto bya dilongo ne kufwatula bidiki ne mu miswelo yonso ya bupika bwa mu madimi. Bine, bebaputumije bibibibi na mingilo mu bupika bwa miswelo yonso.+
15 Kupwa mulopwe wa Edipito wanena babimbutuja Bahebelu, majina abo i Shipala ne Pua,
16 webalombola’mba: “Shi kemubutuja bana-bakaji Bahebelu ne mubebamone pa kityi kya lubutulo,*+ mufwaninwe kwipaya mwana’wa shi i mwana-mulume; ino shi i mwana-mukaji, nankyo ufwaninwe kwikala mūmi.”
17 Inoko, babimbutuja batyinine Leza wa bine, kebalongelepo byebalombwele mulopwe wa Edipito. Ino badi baleka bana bana-balume bōmi.+
18 Ebiya mulopwe wa Edipito waita babimbutuja kaebanena’mba: “Mwanda waka muleka bana bana-balume bōmi?”
19 Babimbutuja nabo balondolola Felo amba: “Bana-bakaji Bahebelu kebadipo bwa bana-bakaji bene Edipito. Abo i bakomo kadi babutulanga ne kimbutuja mwine katwelele mobadi.”
20 Penepo Leza walongela babimbutuja biyampe, bantu kebevudija’nka kwivudija ne kwikomeja bininge.
21 Kadi babimbutuja byobadi batyina Leza wa bine, nandi webapele bisaka mwenda mafuku.
22 Ku mfulo, Felo wasoñanya bantu bandi amba: “Mufwaninwe kwela mu Munonga wa Nile mwana wa lukeke ense mwana-mulume wa Bahebelu, ino mwana mwana-mukaji ense mufwaninwe kumuleka mūmi.”+
Kunshi kwa Dyani
^ Nansha’mba “Myuya.”
^ Kishima pa kishima i, “bātambile ku ditangatanga dya Yakoba.”
^ Nansha’mba “myuya.”
^ Kishima pa kishima i, “Bana ba Isalela.”
^ Nansha’mba “bendeji ba mingilo batongwe.”
^ Nansha’mba “butanda bwa lubutulo.”
