Ezela 7:1-28
7 Bine bino’bi pa kupita, mu bulopwe bwa Alatazelekishishi+ mulopwe wa Peleshia, Ezela*+ wajoka. I mwanā Selaya,+ mwanā Azadia, mwanā Hilekia,+
2 mwanā Shalumu, mwanā Zadoki, mwanā Ahitube,
3 mwanā Amadia, mwanā Azadia,+ mwanā Melayote,
4 mwanā Zelahia, mwanā Uzi, mwanā Buki,
5 mwanā Abishua, mwanā Finease,+ mwanā Eleaza,+ mwanā Alone+ kitobo mukulu.
6 Uno Ezela watambile ku Babiloni. Aye wadi mutentudi* ujingulwile senene* Bijila bya Mosesa,+ byaletele Yehova Leza wa Isalela. Mulopwe wamupēle bintu byonso byaalombele, mwanda kuboko kwa Yehova Leza wandi kwadi pādi.
7 Bene Isalela bamo, ne babitobo, ne bene Levi,+ ne batuimba,+ ne batulama ba ku kibelo,+ ne bengidi ba ku tempelo,*+ bakanda ku Yelusalema mu mwaka wa busamba-bubidi wa Mulopwe Alatazelekishishi.
8 Kadi Ezela waile ku Yelusalema mu kweji wa butano, mu mwaka wa busamba-bubidi wa mulopwe.
9 Mu difuku dibajinji dya kweji mubajinji, washilula lwendo lwa kutamba ku Babiloni, wafika ku Yelusalema mu difuku dibajinji dya kweji wa butano, mwanda kuboko kuyampe kwa Leza wandi kwadi pādi.+
10 Ezela wateakenye mutyima* wandi mwanda wa kukimba Bijila bya Yehova ne kwibilonda,+ ne mwanda wa kufundija misoñanya yabyo ne butyibi mu Isalela.+
11 Uno’u o mukanda mutentule wa Mulopwe Alatazelekishishi waapēle Ezela kitobo kadi mutentudi,* muntu upotolwele kwifunda* mbila ya Yehova ne misoñanya yandi kudi Isalela:
12 * “Ami Alatazelekishishi,+ mulopwe wa balopwe, kudi Ezela kitobo, mutentudi* wa Bijila bya Leza wa mūlu: Ndoe mibwaninine ikale nobe. Shi ke pano
13 nasoñanya amba muntu ense udi mu ntanda yami wa ku bantu ba Isalela ne babitobo babo ne bene Levi udi na mutyima wa kwenda nobe ku Yelusalema, ende.+
14 Mwanda ubatumwe na mulopwe ne badingidi bandi basamba-babidi amba ukakimbe shi Bijila bya Leza obe, byodi nabyo,* bilondwanga mu Yuda ne mu Yelusalema,
15 kadi usele ne ndalama ne olo yaletele mulopwe ne badingidi bandi na mutyima tō kudi Leza wa Isalela, mwine udi na kīkalo mu Yelusalema,
16 ne ndalama yonso ne olo yotambula* mu ntanda yonso ya bubikavu* ya Babiloni, pamo ne kyabuntu kileta bantu ne babitobo na mutyima tō ku njibo ya Leza wabo, idi mu Yelusalema.+
17 Ukapota bukidibukidi na luno lupeto bañombe,+ mikōko milume,+ twana twa mikōko,+ pamo ne byamulambu byabyo bya miseke+ ne byamulambu byabyo bya bitomibwa,+ kadi ukebilambula pa kisōkelo kya njibo ya Leza obe mu Yelusalema.
18 “Kadi kyokya kyonso kyomona bu kiyampe kulonga abe ne banabenu, mubwanya kwikilonga na ndalama ne olo ikashala’ko, mwendele kiswa-mutyima kya Leza wenu.
19 Kadi bipungwa byonso bikupelwe mwanda wa mingilo ya njibo ya Leza obe, kafikije’byo ku meso a Leza ku Yelusalema.+
20 Bintu bikwabo bisakibwa ku njibo ya Leza obe byofwaninwe kuleta, ukayata’byo mu kibīko kya byabulēme bya bulopwe.+
21 “Ami Mulopwe Alatazelekishishi, nasoñanya balami bonso ba byabulēme badi mu ntanda ya Bukila bwa Munonga,* amba kintu kyonso kimulomba Ezela+ kitobo, mutentudi* wa Bijila bya Leza wa mūlu, kilongwe bukidibukidi,
22 kufika ne ku talenta* 100 ya ndalama, ne bipimo bya kola* 100 bya ñano, ne bipimo bya bate* 100 bya vinyu,+ ne bipimo bya bate 100 bya māni,+ ne mwepo+ wa bungi bonso bwasaka.
23 Kintu kyonso kisoñanya Leza wa mūlu kilongwe na bupyasakane mwanda wa njibo ya Leza wa mūlu,+ kutyina’mba bukalabale bwakekala pa ntanda ya mulopwe ne bandi bana.+
24 Kadi mubalombolwa monka’mba kekifwaninwepo kulomba musonko, nansha mulambu+ nansha munyenga ku babitobo ne bene Levi, ne batuimba,+ ne batulama ba pa kibelo, ne bengidi ba ku tempelo,*+ ne ku bengidi ba ino njibo ya Leza.
25 “Kadi abe Ezela, mungya tunangu todi nato tukupēle Leza obe,* tūla’ko bandela-bantu ne batyibi ba kutyibila bantu bonso mambo mu ntanda ya Bukila bwa Munonga, boba bonso bayukile bijila bya Leza obe; ino ufwaninwe kufundija yewa ense kayukile’byo.+
26 Kadi yewa ense kalaminepo Bijila bya Leza obe ne kijila kya mulopwe butyibi bufwaninwe kufikidijibwa bukidibukidi pādi, ekale bwa lufu, kupangwa, kutungwa mambo, nansha kukutwa.”
27 Yehova Leza wa bakulutuba betu atendelwe, mwine watūdile mu mutyima wa mulopwe mulangwe wa kulumbulula njibo ya Yehova mu Yelusalema!+
28 Kadi waunombola buswe bwa ndamatyidile ku meso a mulopwe+ ne a badingidi+ bandi ne a bamfumu bonso bakomo ba mulopwe. Ebiya nakankamana* mwanda kuboko kwa Yehova Leza wami kwadi pondi, penepa nakongakanya mu Isalela bana-balume batangidiji* ba kukanda nami.
Kunshi kwa Dyani
^ Ko kushintulula’mba “Bukwashi.”
^ Nansha’mba “musonekeji.”
^ Nansha’mba “Aye wadi mutentudi wa bwino wa.”
^ Nansha’mba “bene Netini.” Kishima pa kishima i, “bapānwe.”
^ Nansha’mba “wadi usumininwe mu mutyima wandi.”
^ Nansha’mba “musonekeji.”
^ Nansha’mba “mutentudi wa binenwa’bya.”
^ Eza 7:12 kutūla ku 7:26 walembelwe dibajinji mu Kialamia.
^ Nansha’mba “musonekeji.”
^ Kishima pa kishima i, “bidi mu kuboko kobe.”
^ Nansha’mba “buludiki bwa kipindi kya ntanda.”
^ Kishima pa kishima i, “yosokola.”
^ Nansha’mba “Bukila bwa Ufalete.”
^ Nansha’mba “musonekeji.”
^ Kola umo i malitele 220 (makwatyi 200 a byūmu). Tala Mbwejo B14.
^ Bate umo i malitele 22. Tala Mbwejo B14.
^ Talenta imo i makilo 34,2. Tala Mbwejo B14.
^ Nansha’mba “bene Netini.” Kishima pa kishima i, “bapānwe.”
^ Kishima pa kishima i, “mungya tunangu twa Leza obe tudi mu kuboko kobe.”
^ Nansha’mba “nekomeja.”
^ Kishima pa kishima i, “mitwe.”
