Isaya 21:1-17
21 Musapu mubi wa mu ntanda mutuputupu ya dijiba:*+
Kīyanga pamo bwa luvula lwa kimpumpu lupita kunshi,Kitamba mu ntanda mutuputupu, mu ntanda ilenga moyo.+
2 Kimonwa kikomokomo kyobanombwele:
Ndalandala uloñanga bya bundalandala,Kadi yewa onakanya onakanyanga.
A Elama, kanda! A Media,+ tēkela kasāla!
Nsa kufudija kubinza konso kwaakolomwene.+
3 O mwanda ngidi mu malwa makatampe.*+
Misanshi ibaunkwata,Pamo bwa ya mwana-mukaji ubutula.
Nasusuka bininge pa kwivwana;Nakambakanibwa pa kumona.
4 Mutyima wami ubakōka; natetema luzakalo.
Kapita i kāni konadi ngabila bininge kabanzakaja.
5 Alai meza ne kupanga bityi!
Dyai mutome!+
A bamfumu, imanai mushinge* ngabo māni!
6 Mwanda Yehova waunena namino amba:
“Enda, katūle kalama, asapule byobya byamona.”
7 Kadi wamwene dikalo dya divita ne tubalwe tubidi,Dikalo dya divita dya bampunda,Dikalo dya divita dya bangamedia.
Watadija biyampe, na katentekeji.
8 Penepo waita pamo bwa ntambo amba:
“A Yehova, ñimene dyuba dyonso pa kiteba kya mulami,Kadi ñimene pa kifuko kyami kya bu mulami bufuku bonso.+
9 Talai kyokya kīya:
Bantu mu dikalo dya divita ne tubalwe tubidi!”+
Penepo wesamba na diwi dikatampe kanena’mba:
“Wapone! Babiloni wapone!+
Bankishi bonso basōnge ba baleza bandi webavingakanya pa nshi!”+
10 A bantu bami bapūlwe,Bintu bitambile* ku kipūdilo kyami,+Nemusapwila byobya byonaivwana kudi Yehova wa bibumbo, Leza wa Isalela.
11 Musapu mubi pa Duma:*
Kudi muntu ungela lubila ku Seila+ amba:
“A mulami, le bufuku budi namani?
A mulami, le bufuku budi namani?”
12 Mulami wanena’mba:
“Lubanga lusa kwiya, ne bufuku bwine.
Shi musaka kwipangula, ipangulai.
Iyai monka!”
13 Musapu mubi wa mu ntanda mudi zolē:
Mukalāla bufuku mwitó mu ntanda mudi zolē,Byanwe bibumbo bya Dedane bya bañenda.+
14 Selai mema mukatundaile wa kyumwa,Banwe bekadi ba ntanda ya Tema,+Selelai ne yewa unyema mikate.
15 Mwanda abanyema bipete, kipete kisomone,Buta bwa miketo bukane, ne divita dibidibi.
16 Mwanda Yehova waunena namino amba: “Mu mwaka umo, pamo’nka bwa myaka ya muntu wa kaji,* ntumbo yonso ya Kedala+ ikafula.
17 Bela miketo bashele ku ba bulwi ba Kedala bakatyepa, mwanda Yehova Leza wa Isalela wesambe’kyo.”
Kunshi kwa Dyani
^ Mobimwekela ifunkila pa ntanda ya Babiloni wa kala.
^ Kishima pa kishima i, “kifuka kyami i kiyule misanshi.”
^ Nansha’mba “mufukanye.”
^ Kishima pa kishima i, “Mwana mwana-mulume.”
^ Ko kushintulula’mba “Talala Nyā.”
^ Nansha’mba “mibalwe senene na mubadilanga muntu wa kaji”; ko kunena’mba, mu mwaka mubwane nkū.
