Isaya 50:1-11
50 Yehova wanena namino amba:
“Le mukanda wa dilubu+ wa inenu onapangile udi kwepi?
Nansha le i ku mwapulwa’ka ongapwile konemupoteje?
Talai! Mwapotolojibwe pa mwanda wa bilubo byenu,+Kadi inenu wapangilwe pa mwanda wa kujilula kwenu.+
2 Penepa mwanda waka kekwadipo nansha umo ponaile kuno?
Mwanda waka kekwadipo nansha umo waitabile ponaityile?+
Le kuboko kwami i kwīpi bininge pa kwimukūla,Nansha le nkidipo na bukomo bwa kwimukūla?+
Talai! Ñumijanga dijiba na kufuna kwami;+Ngalamunanga minonga ke mu ntanda mudi zolē.+
Mwita wayo wabola mwanda wa kubulwa mema,Kadi wafwa pa mwanda wa kyumwa.
3 Mvwikanga madiulu mfindi,+Ne kwalamuna sāka ke kya kwipūta kyao.”
4 Mfumu Mwinē Lupusa Lonso Yehova waumpe ludimi lwa boba bafundijibwe,*+Amba ndyuke mwa kulondolwela* yewa mukōke na kinenwa kyoloke.*+
Unangulanga lubanga ne lubanga;Ulangulanga kutwi kwami amba kuteje pamo bwa bantu bafundijibwe.+
5 Mfumu Mwinē Lupusa Lonso Yehova washitula kutwi kwami,Kadi nkyadipo ntomboki.+
Nkyaalamukīlepo mu dishinda dingi.+
6 Napēne nyuma yami kudi boba bankupilaNe matama ami kudi boba batukuna’ko myoya.*
Nkyafilepo mpala yami ku bintu bya bumvu ne ku kupēlelwa mata.+
7 Ino Mfumu Mwinē Lupusa Lonso Yehova ukankwasha.+
O mwanda nkikafupo bumvu.
O mwanda natūla mpala yami pamo bwa dibwe dikomo,+Kadi ndyukile amba nkikafwijibwapo bumvu.
8 Yewa umingija udi pabwipi.
Le i ani ubwanya kunsambila?*+
Twimane nandi pamo.*
Le i ani udi nami mwanda?
Amfwene.
9 Talai! Mfumu Mwinē Lupusa Lonso Yehova ukankwasha.
Le i ani ukamponeja?
Talai! Bakanunupa pamo bwa kivwalwa.
Kīshi kikebadya.
10 Le i ani momudi wakaminwe YehovaNe kwivwana diwi dya mwingidi wandi?+
Le i ani unangila mu fukutu mikatampe, mwampikwa kitōkeji nansha kimo?
Nabya akulupile mu dijina dya Yehova ne kwisumbidila* Leza wandi.
11 “Talai! Banwe bonso babanza mudilo,Batolokeja nsase ya mudilo,Nangilai mu kitōkeji kya mudilo wenu,Mu nsase ya mudilo omusōkele.
Mukatambula kino’ki ku kuboko kwami:
Mukalāla na misanshi yonkayonka.
Kunshi kwa Dyani
^ Bibwanika padi i, “kukomejeja.”
^ Kishima pa kishima i, “na kinenwa.”
^ Nansha’mba “ludimi lufundijibwe biyampe.”
^ Nansha’mba “batukuna’ko myevu.”
^ Nansha’mba “kulwa nami?”
^ Nansha’mba “Twikume.”
^ Nansha’mba “kweyalala kudi.”
