Kusokwelwa Kudi Yoano 16:1-21
16 Kadi naivwene diwi dikatampe ditamba mu kipandulwe+ kedinena bamwikeulu basamba-babidi amba: “Endai, kapungululei ngeso isamba-ibidi ya bulobo bwa Leza pa ntanda.”+
2 Mubajinji wataluka wakapungulwila lweso lwandi pa ntanda.+ Penepo bilonda bisansa kadi bibibibi+ byasusula bantu badi na kayukeno ka kinyema kya ntanda,+ badi batōta kyelekejo+ kyakyo.
3 Wa bubidi wapungulwila lweso lwandi pa dijiba.+ Penepo dyaalamuka ke mashi+ pamo bwa a muntu mufwe, kadi bipangwa* byonso byūmi byafwa, i amo, bintu bidi mu dijiba.+
4 Wa busatu wapungulwila lweso lwandi mu minonga ne masulo a mema.+ Nabyo byaalamuka ke mashi.+
5 Naivwene mwikeulu pa mema kanena’mba: “Abe, Mwine udi’ko ne wādi’ko,+ wa lulamato,+ wi moloke, ke-pantu ubatyibe buno butyibi,+
6 mwanda abo bamwangile mashi a bajila ne a bapolofeto,+ abe nobe ubebape mashi a kutoma;+ i bafwaninwe kino’ki.”+
7 Kadi naivwene kisōkelo kekinena’mba: “I amo, a Yehova* Leza, Mwinē Bukomo Bonso,+ butyibi bobe* i bwa bine kadi boloke.”+
8 Wa buná wapungulwila lweso lwandi pa dyuba,+ penepo dyuba dyapebwa lupusa lwa kusōka bantu mudilo.
9 Ebiya bantu basōkwa na kyanga kikatampe, ino badi kebatuke’ko dijina dya Leza, mwine udi na lupusa pa ino mpupo, kadi kebesāshilepo ne kumutumbija kwine mpika.
10 Wa butano wapungulwila lweso lwandi pa lupona lwa kinyema kya ntanda. Penepo bulopwe bwakyo bwafīta’tu fututu,+ bantu kebesume ndimi pa mwanda wa misanshi yabo,
11 ino badi kebatuke’ko Leza wa mūlu pa mwanda wa misanshi ne bilonda byabo, kadi kebesāshilepo mingilo yabo.
12 Wa busamba wapungulwila lweso lwandi pa munonga mukatampe wa Ufalete,+ penepo mema ao auma+ mwanda wa kulongolwela balopwe+ ba kutambanga dyuba* dishinda.
13 Kadi namwene myanda isatu ya disubi inenenwe ku mushipiditu* yadi pamo bwa byula, itamba mu kyakanwa kya mpumina+ ne mu kyakanwa kya kinyema kya ntanda ne mu kyakanwa kya mupolofeto wa bubela.
14 Ayo, na bubine, i myanda inenenwe ku mushipiditu na bandemona kadi iloñanga biyukeno,+ yendanga ku balopwe ba ntanda yonso ikelwe na bantu, kwibakongakenya ku divita+ dya difuku dikatampe dya Leza Mwinē Bukomo Bonso.+
15 “Talai! Yao ngiya pamo bwa ngivi.+ Wa nsangaji i yewa utala’nka kutala+ ne kulama bivwalwa byandi bya pangala, kutyina’mba wakananga mutaka, bantu kebatale bumvu bwandi.”+
16 Kadi yebakongakenye pamo pa kifuko kitwa mu Kihebelu bu Amakedona.*+
17 Wa busamba-bubidi wapungulwila lweso lwandi pa luvula. Penepo diwi dikatampe dyatamba mu kipandulwe+ ku lupona, kedinena’mba: “Pano kubapu!”
18 Kadi kwadi kupena kwa mapeni ne mawi ne mikungulo, kadi kwadi kutenkana kukatampe kwa ntanda, kwishile na konso ke kulongeke tamba bantu bekala’ko pano pa ntanda,+ kuno kutenkana kwadi kukomokomo, kukatampe mpata.
19 Kibundi kikatampe+ kyakalañana pasatu, ne bibundi bya mizo byapona; Babiloni Mukatampe+ nandi wavulukwa ku meso a Leza, mwanda wa kumupa kitomeno kya vinyu ya bulobo bwa bukalabale bwandi.+
20 Ne kadi, kisanga ne kisanga kyanyema lubilo, ngulu nayo ne koyaya jimejime.+
21 Penepo mabwe makatampe a mvula, dibwe ne dibwe dilēma kubwipi kwa talenta* imo, atamba mūlu aponena bantu,+ kadi bantu badi kebatuke Leza pa mwanda wa kyokya kipupo kya mvula wa mabwe,+ mwanda kipupo’kya kyadi kikatampe bya mwiko.
Kunshi kwa Dyani
^ Nansha’mba “myuya.”
^ Nansha’mba “mutyibilo obe wa mambo.”
^ Nansha’mba “ba kutunduka.”
^ Kishima pa kishima i, “mishipiditu ya disubi.”
^ Mu Kingidiki i, Har Magedon, i kitambe ku kishima kya Kihebelu kishintulula’mba “Lūlu lwa Mekido.”
^ Talenta imo ya Bangidiki i makilo 20,4. Tala Mbwejo B14.
