Kusokwelwa Kudi Yoano 2:1-29
2 “Lembela mwikeulu+ wa kipwilo kya mu Efisesa+ amba: Bino’bi byo byanena yewa ukwete ñenyenye isamba-ibidi mu kuboko kwandi kwa lundyo kadi unanga mu bukata mwa bitūlwa-binanu bisamba-bibidi bya olo+ amba:
2 ‘Ndyukile bilongwa byobe, ne mingilo yosusuka nayo ne kūminina kobe, ne amba kukokejapo kutala kilomo-nyeka bantu babi, kadi utūlanga pa ditompo boba betela bu batumibwa, abo’ko ke batumibwapo,+ kadi ubebajingulula’mba i bambepai.
3 Ne kadi abe ūmininanga, kadi utakamene pa mwanda wa dijina dyami+ ne kupungila mpika.+
4 Inoko, ngidi nobe uno mwanda, ubaleka buswe bowadi nabo dibajinji.
5 “‘Nanshi vuluka popa powaponene, wisāse+ ne kulonga bilongwa byowadi ulonga dibajinji. Shi bitupu, nsa kwiya kodi, kadi nsa kutalula kitūlwa-binanu+ kyobe pa kifuko kyakyo, poso wisāse.+
6 Inoko, kudi kintu kiyampe kyodi nakyo: ushikilwe bilongwa bya katango ka Nikola,+ byonshikilwe ne amiwa.
7 Yewa wa matwi evwane kinena mushipiditu ku bipwilo:+ Yewa unekenya+ nkamupa lupusa lwa kudya ku mutyi wa būmi,+ udi mu paladisa ya Leza.’
8 “Lembela ne mwikeulu wa kipwilo kya mu Semilena amba: Bino’bi byo byanena yewa ‘Umbajinji kadi wa Mfulo,’+ wafwile kupwa waikala mūmi monka’mba:+
9 ‘Ndyukile byamalwa ne bulanda bobe—inoko wi mpeta+—ne mutonko wa boba betela bu Bayuda, abo’ko kwikala Bayuda binebine mpika, ino abo i shinankonka ya Satana.+
10 Kokakwatwa moyo wa bintu bisa kukufikila.+ Tala! Dyabola kakalekapo kwela bamobamo momudi’mo mu kifungo amba mutompibwe ne pa mfulo, kadi mukamona byamalwa mafuku dikumi. Abe ikala mukōkele ne ku lufu kwine, nami nkakupanga kilukwa kya būmi.+
11 Yewa wa matwi evwane+ kinena mushipiditu ku bipwilo: Yewa unekenya+ kakasanshijibwapo na lufu lwa bubidi.’+
12 “Lembela mwikeulu wa kipwilo kya mu Pengamume amba: Bino’bi byo byanena yewa udi na kipete kya bui, kilampe, kya bui kubidi+ amba:
13 ‘Ndyukile koshikete, ko kunena’mba, kwine kudi lupona lwa Satana; inoko ukikwatyije dijina dyami,+ kadi kwatuninepo lwitabijo lobe mudi ami+ nansha ke mu mafuku a Antipasa, kamoni wami mukōkele,+ waipailwe+ mwamo mwenu, mwine mushikete Satana.
14 “‘Inoko, kudi myanda mityetye yondi nobe, udi mwamo na bantu balamete ku bufundiji bwa Balame,+ wāfundije Balake+ kutūla kya kukukaja ku meso a bana ba Isalela, kudya bintu bitapilwe bilezaleza ne kulonga busekese.*+
15 Mo monka, abe nobe udi na boba balamete ku bufundiji bwa katango ka Nikola.+
16 Nanshi wisāse. Shi bitupu, yao ngiya kodi bukidibukidi, kadi nkebatamba divita na kipete kilampe kya mu kyakanwa kyami.+
17 “‘Yewa wa matwi evwane kinena mushipiditu ku bipwilo:+ Yewa unekenya+ nkamupa’ko māna mafibwe,+ kadi nkamupa ne dibwe dya munono ditōka, kadi pa dibwe dya munono’pa palembe dijina dipya kediyukilepo muntu nansha umo poso enka mwine utambula’dyo.’
18 “Lembela mwikeulu wa kipwilo kya mu Tyiataila+ amba: Bino’bi byo byanena Mwanā Leza, yewa udi na meso bwa lubimbi lwa mudilo,+ ne wa maulu adi bwa mukuba mulumbuluke+ amba:
19 ‘Ndyukile bilongwa byobe, ne buswe ne lwitabijo lobe ne mwingilo ne kūminina kobe, ne amba bilongwa byobe bya mfulo i bipite byobya byowalongele dibajinji.
20 “‘Inoko, ngidi nobe uno mwanda, abe utalanga kilomo-nyeka mwana-mukaji Yezebele,+ witela bu mupolofeto, ufundija ne kongola bapika bami balonge busekese*+ ne kudya bintu bitapilwe bilezaleza.
21 Namupele kyaba kya kwisāsa, ino aye kasakilepo kwisāsa busekese* bwandi.
22 Tala! Kensa kumwela mu kitanda kya misongo, boba balonga nandi makoji nabo mu kyamalwa kikatampe, poso’tu besāse bilongwa byandi.
23 Kadi nkepayanga bandi bana na kipupo kileta lufu, mwanda wa bipwilo byonso bikayuke amba amiwa ye mwine usātanga milangwe ya munda* ne mityima, kadi nkemupa muntu ne muntu mwendele bilongwa byandi.+
24 “‘Inoko, nanena bashele’ko momudi’mo mu Tyiataila, boba bonso kebalondapo buno bufundiji, boba kebayukilepo byobya bītwa bu “bintu bya mushike bya Satana”:+ Ami nkimutwikangapo kiselwa kikwabo kilēma.
25 Nansha nankyo, kwatyijai kyakyo kyomudi nakyo enka ne byongiya.+
26 Kadi yewa unekenya ne kulama bilongwa byami kufika ne ku mfulo, nkamupa lupusa pa mizo,+
27 monka monatambwidile’lo kudi Tata, kadi ukakumba bantu na mukombo wa kyuma’mba+ batyumunwe bipindibipindi pamo bwa bipungwa bya dilongo.
28 Kadi nkamupa mutumbwe wa lubanga.+
29 Yewa wa matwi evwane kinena mushipiditu ku bipwilo.’
Kunshi kwa Dyani
^ Tala Nshintulwilo ya Bishima.
^ Tala Nshintulwilo ya Bishima.
^ Mu Kingidiki i, porneia. Tala Nshintulwilo ya Bishima.
^ Nansha’mba “milangwe mifyame.” Kishima pa kishima i, “mfyo.”
