Luta 1:1-22
1 Penepo mu mafuku adi atyiba+ batyibi myanda,* kipupo kya nzala kyapona mu ntanda’ya; ebiya mwana-mulume umo wataluka ku Betelema+ mu Yuda wakashikata bu mweni mu ntanda* ya Moabu,+ aye ne wandi mukaji ne bandi bana babidi bana-balume.
2 Dijina dya mwana-mulume’wa i Edimeleke,* ne dijina dya wandi mukaji i Naomi,* kadi majina a bandi bana babidi i Malone* ne Kidioni.* Badi bene Efelata ba ku Betelema mu Yuda. Baile ku ntanda ya Moabu bashikata konka.
3 Kitatyi kampanda pa kupita’po, Edimeleke mulumya Naomi wafwa, Naomi washala na bandi bana babidi.
4 Mwenda mafuku bana-balume’ba basonga bana-bakaji bene Moabu, umo wadi witwa bu Olepa, mukwabo nandi wadi witwa bu Luta.+ Bashikete kwine’kwa kintu kya myaka dikumi.
5 Kupwa bana babidi’ba, ba Malone ne Kidioni, nabo bafwa, penepo mwana-mukaji’wa washala pampikwa bandi bana babidi ne mulume mwine.
6 Ebiya wataluka na bandi bako batamba mu ntanda ya Moabu, mwanda waivwene mu Moabu amba Yehova wate bantu bandi mutyima webape byakudya.*
7 Washiya kifuko kwaadi ushikete na bandi bako babidi. Pobadi benda mwishinda bajokela ku ntanda ya Yuda,
8 Naomi wanena bandi bako babidi amba: “Endai, jokelai muntu ne muntu ku njibo ya inandi. Yehova amwekeje buswe bwa ndamatyidile komudi,+ monka momwamwekejeje’bo kudi bana-balume bafwile ne kudi ami.
9 Yehova emukwashe* muntu ne muntu atane ndoe* mu njibo ya wandi mulume.”+ Kupwa webafifya, ebiya kebadila na diwi dikatampe.
10 Ino badi bamunena’nka kumunena’mba: “Aa, tusa kwenda nobe kudi bantu benu.”
11 Ino Naomi wanena’mba: “Jokai, a bami bana. Kyomwendela nami i kika? Lelo nekibwanya monka kubutula bana bana-balume babwanya kukekala benu balume?+
12 Jokai, a bami bana. Endai, mwanda nanunupa bininge pa kusongwa. Nansha shi nadi wa kukulupila kutana mulume kino kyolwa ne kubutula monka bana,
13 le mukebakungila kufika ne byobakatama? Le mukaleka kusongwa monka pa mwanda wabo? Aa, a bami bana, naivwana bululu mpata pangala penu, mwanda kuboko kwa Yehova kubaungalamukila.”+
14 Badila monka na diwi dikatampe, kupwa Olepa wafifya inandi muko wajoka. Ino Luta wamulamata.
15 Ebiya Naomi wanena’mba: “Tala! Mukao nobe wa kishala wajokela ku bantu babo ne baleza babo. Joka na mukao nobe.”
16 Ino Luta wanena’mba: “Kokanzenza amba nkushiye, amba ndeke kwenda nobe; mwanda koenda, e konkenda, kadi kokalāla e konkalāla. Bantu bobe bakekala bantu bami, ne Leza obe ukekala Leza wami.+
17 Kokafwila e konkafwila, kadi e konka konkajīkwa. Yehova anongele monka ne kubweja’ko ekale kintu kikwabo kinsansanye nobe, shi ke’nkapo lufu.”
18 Naomi pa kumona’mba Luta ukimba’nka kwenda nandi, waleka kumunekenya.
19 Abo bonso bubidi baenda enka ne byobafikile ku Betelema.+ Abo’tu pa kufika mu Betelema, kibundi kyonso kyajina pa mwanda wabo, kadi bana-bakaji badi banena’mba: “Lelo i Naomi yeu?”
20 Nandi wadi unena bana-bakaji amba: “Kemwakingitai bu Naomi.* Ngitei bu Mala,* mwanda Mwinē Bukomo Bonso waludija būmi bwami bininge.+
21 Nadi muyulwe ponaendele, ino Yehova wanjokeja makasa. Kyomungityila bu Naomi i kika, aye Yehova nandi ye ulwa nami kadi Mwinē Bukomo Bonso ye waundetela kyamalwa?”+
22 Muno mo mwajokēle Naomi kutamba ku ntanda ya Moabu,+ pamo ne Luta muko wandi mwine Moabu. Bafika ku Betelema ku ngalwilo kwa mwangulo wa mebele a buluba.+
Kunshi kwa Dyani
^ Kishima pa kishima i, “asambija.”
^ Nansha’mba “kipindi kya ntanda.”
^ Ko kushintulula’mba “Leza Wami I Mulopwe.”
^ Ko kushintulula’mba “Kusepelela Kwami.”
^ Padi kitamba ku kishima kya Kihebelu kishintulula’mba “kuzoza; kubela.”
^ Ko kushintulula’mba “Ukankalwa; Ufika ku Mfulo.”
^ Kishima pa kishima i, “mikate.”
^ Kishima pa kishima i, “kifuko kya kukōkolokwa.”
^ Nansha’mba “emupe kyabuntu.”
^ Ko kushintulula’mba “Kusepelela Kwami.”
^ Ko kushintulula’mba “Bululu.”
