Mwendele Mako 4:1-41
4 Washilwile monka kufundija kufula kwa dijiba, kadi kibumbo kikatampe bininge kyebunga pabwipi nandi. Penepo nandi waenda kukekila mu bwato kashikete’mo dya kulampe na ku ntanda, ino kibumbo kyonso kyadi ku ntanda kufula kwa dijiba.+
2 Nandi washilula kwibafundija bintu bivule na byelekejo,+ kadi paadi wibafundija, webanenene amba:+
3 “Ivwanai. Talai! Mukushi wakakushile nkunwa.+
4 Paadi ukusa, nkunwa imo yaponena kufula kwa dishinda, ino toni twaiya twadya’yo.
5 Mikwabo yaponena mu nshi ya mabwe, mwampikwa biloba bingi, ponkapo yamena mwanda kepadipo biloba bingi.+
6 Ino dyuba pa kukanda, yatēma, kadi yafumba mwanda keyadipo na miji.
7 Kadi nkunwa mikwabo yaponene mu miba, ino miba pa kutama yeityinya, keyapelepo bipa.+
8 Ino ingi nayo yaponene pa nshi milumbuluke, yamena ne kutama yatama, yashilula kupa bipa, yapa misunsa 30, 60, ne 100.”+
9 Kupwa wabweja’ko amba: “Yewa wa matwi a kwivwana, evwane.”+
10 Ebiya, paadi kwa bunka, boba badi bamujokolokele, pamo ne Ba Dikumi ne Babidi bashilula kumwipangula myanda ya byelekejo’bya.+
11 Penepo webanena’mba: “Banwe mwi bapebwe kifibwe kikola+ kya Bulopwe bwa Leza, ino ku boba ba panja bintu byonso bidi mu byelekejo,+
12 amba, nansha byobatala, batale ino kumona mpika, nansha byobevwana, bevwane ino kwivwanija buluji bwakyo mpika; kadi kebakalamukapo amba bamone kulekelwa.”+
13 Kupwa, webanena’mba: “Kemuyukilepo kino kyelekejo, penepo le musa kwivwanija namani byelekejo bikwabo byonso?
14 “Mukushi ukusanga mwanda.+
15 Bano’ba nanshi, i yoya ya kufula kwa dishinda kukushilwe mwanda; ino abo pa kwiwivwana’tu, Satana waiya+ wasela mwanda wakushilwe mobadi.+
16 Mo monka bano’ba nabo i yoya ikushilwe mu nshi ya mabwe; abo pa kwivwana’tu mwanda, baitabija’o na nsangaji.+
17 Ino, kebadipo na miji munda mwabo, o mwanda bendelelanga kitatyi kityetye; penepo shi kwatamba byamalwa ne kupangwapangwa pa uno mwanda, bakukala.
18 Kudi mikwabo nayo ikushilwe mu miba. Ino’i bo boba bevwana mwanda,+
19 inoko kuzumbija mutyima+ kwa ino ngikadilo ya bintu* ne kyongo kya bya bupeta+ ne kusakasaka+ bintu bikwabokwabo byaiya byatyinya mwanda, penepo nao wabulwa kupa bipa.
20 Mfulo mfulō, yoya yakushilwe mu nshi milumbuluke, i boba bevwana mwanda beutambula biyampe ne kupa bipa—misunsa 30, 60 ne 100.”+
21 Kadi webanena monka’mba: “Kinanu kekipaikwangapo mwanda wa kwikitūla munshi mwa kilala* nansha munshi mwa butanda, mwene i amo? Mwene kipaikwanga mwanda wa kwikitūla pa kitūlwa-binanu?+
22 Mwanda i kutupu kintu nansha kimo kifibwe kekikasokolwapo; nansha kintu kifye pafīta kekikamwekapo patōka.+
23 Yewa ense udi na matwi a kwivwana, nankyo evwane.”+
24 Webanena monka’mba: “Tai mutyima ku byomwivwana.+ Kipimo kyomupimina’mo, e kyomukapiminwa’mo nenu, bine, mukabwejibwa’ko ne bikwabo.
25 Mwanda yewa ense udi na kintu ukapebwa ne bikwabo,+ ino yewa kadipo na kintu, ne kyokya kyadi nakyo kine kikamuyatwa.”+
26 Ebiya wanena monka’mba: “Mu uno muswelo Bulopwe bwa Leza budi pamo’nka bwa kitatyi kyela muntu umo nkunwa pa nshi.
27 Walāla bufuku kupwa wabūka dyuba, nkunwa nayo yamena ne kutama—aye kuyuka mobilongekela mpika.
28 Nshi ayo mine yalupula bityebitye bipa, dibajinji kakiyombo, kupwa ke kisampo, ku mfulo ke miseke mikomo mu kisampo.
29 Ino bipa pa kwēla’tu, wapityija’mo kikwakwa mwanda kitatyi kya mwangulo kibabwana.”
30 Kadi wanena monka’mba: “Lelo tukadingakanya Bulopwe bwa Leza na bika, ne kadi le tukebushintulula na kyelekejo’ka?
31 Budi pamo bwa luze lwa mutade, polwakuninwe mu nshi lwadi lutyetye bininge kutabuka nkunwa yonso ya pano pa ntanda.+
32 Ino alo pa kukunwa, lwamena ne kubaya bininge kutabuka bimuna byonso bikwabo ne kwala misambo mikatampe, kukokeja ne byoni bya mūlu kwikala mu mutalela wao.”
33 Wadi wibasapwila mwanda mu byelekejo bivule+ bya uno muswelo, mungya mobadi babwaninya kwivwana.
34 Bine, kadipo wisamba nabo pampikwa kyelekejo, ino kufula wadi ushintulwila bandi bana ba bwanga bintu byonso.+
35 Kadi kyolwa pa kōloba mu dyodya difuku, webanena’mba: “Twabukilei bobwa bukila.”+
36 Penepo pobapwile kulundula kibumbo, bamusela mu bwato, enka mwaadi wikadile, kadi kwadi ne mato makwabo pamo nandi.+
37 Ebiya kimpumpu kya luvula kikatampe bya malwa kyatetuka, ne mantanki adi asampukila mu bwato, bwato nabo kebusake kuyula mema.+
38 Ino aye wadi dya ku mutofi wa kunyuma ulēle pa musāmo,* penepa bamulangula kebamunena’mba: “A Mufundiji, le kwakaminwepo amba ketufu?”
39 Ponkapo walanguka wafunina kivula kanena dijiba’mba: “Shhh! Talala nyā!”+ Ne kivula nakyo kyetūkija, ebiya kwatalala’tu nyā.
40 Penepa webanena’mba: “I kika le kyomwakwatyilwa moyo* namino? Le kemwaikele na lwitabijo?”
41 Inoko bakwetwe moyo mukatampe bya mwiko, kebeipangula abo bene na bene amba: “Le bine uno’u i ani? Enka ne kivula ne dijiba dine bimukōkela.”+
Kunshi kwa Dyani
^ Nansha’mba “kino kitatyi.” Tala Nshintulwilo ya Bishima.
^ Nansha’mba “kilala kya kupima nakyo.”
^ Nansha’mba “pa kusāmina mutwe.”
^ Nansha’mba “kyazozela mityima yenu.”
