Mukanda wa Yude 1:1-25
1 Ami Yude, umpika wa Yesu Kidishitu, ino mwanabo na Yakoba,+ kudi betyilwe+ bobasenswe kudi Leza Tata kadi bobalamine mwanda wa Yesu Kidishitu:+
2 Lusa ne ndoe ne buswe bivudijibwe komudi.
3 Banwe baswedibwe, nansha byonadi nonga bukomo bonso bwa kwimulembela myanda ya lupandilo lotudi nalo batwe bonso pamo,+ namone amba mfwaninwe kwimulembela mwanda wa kwimukankamika mulwe bulwi bukatampe pa mwanda wa lwitabijo+ lwapelwe bajila dimo kupwididile.
4 Mwanda mwine onemulembela i uno amba bantu bamo abekuja momudi, boba batongēlwe kala buno butyibi na Bisonekwa; i bantu bampikwa bwine Leza balamuna kanye ka ku buntu bitupu ka Leza wetu ke kabepelo ka kwiendeja pampikwa bumvu*+ kadi babepeja bubela yewa umo kete mwine wetupotele* kadi Mfumwetu, Yesu Kidishitu.+
5 Nansha byomuyukile biyampe bino byonso’bi, nsakanga kwimuvuluja’mba Yehova* wāpandije bantu mu ntanda ya Edipito,+ ino kupwa wāonakanya boba kebālombwelepo lwitabijo.+
6 Ne bamwikeulu kebālaminepo kyaba kyabo kibajinji ino bāshiya kīkalo kyabo kine kibafwaninwe,+ i mwibalame na bikutwa bya nyeke mu fukutu bwī mwanda wa butyibi bwa difuku dikatampe.+
7 Mo monka, Sodoma ne Ngomola ne bibundi byādi bijokolokele, nabyo byēpēne mu busekese* bwa mwiko ne kulondalonda bilokoloko bya ngitu+ kebilondapo kipangila. I bitūlwe ku meso etu bu kimfwa kya kudyumukila’po pa kupebwa mfuto ya butyibi bwa mudilo wa nyeke.+
8 Nansha nankyo, bano bantu nabo i bepāne mu bilotwa, basubija ngitu, bafutulula lupusa, ne kutuka bantu ba ntumbo+ mutonko.
9 Ino pādi pepatanya Mikele+ mwikeulu mukatampe+ na Dyabola balwila umbidi wa Mosesa,+ kāsomwenwepo kumutyibila butyibi na bishima bya mutonko,+ ino wāmunenene’tu amba: “Yehova* mwine akufunine.”+
10 Ino bano bantu batukananga pa bintu byokebevwanijepo senene.+ Kadi mu byonso byobevwanija na kitetyima pamo bwa banyema bampikwa ñeni,+ beonanga’mo abo bene.
11 Yō, i kya bulanda, mwanda balondanga kashinda ka Kaini,+ kadi banyemenanga lubilo mu lwendo lubi lwa Balame+ mwanda wa mpalo, kadi abakube mu binenwa bya butomboki+ bya Kola!+
12 Bano bantu i mabwe mafyame mu mema pobadya nenu masobo enu a buswe,+ i bakumbi bedisha abo bene pampikwa moyo;+ i makumbi ampikwa mvula asunkanibwa na kivula+ adi koku keadi koku; i mityi yampikwa bipa ya ku mfulo kwa munoko wa mvula, mifwe dibidi,* mijulwe;
13 i mantanki a pejiba makalabale atambija bifulwe* bya kwibafwija bumvu abo bene;+ i ñenyenye yampikwa dishinda diluji, i babīkilwe nyeke fukutu ifīta fututu.+
14 En-en, Enoke,+ muntu wa busamba-bubidi kushilwila pa Adama, nandi wānenene bupolofeto butala bano bantu paānenene amba: “Talai! Yehova* waiya na tununu makumi* twa bajila bandi+
15 kufikidija butyibi pa bonso,+ ne kutuluja bonso bampikwa bwine Leza pa bilongwa byabo byonso byampikwa bwine Leza byobalongele mu bumpikwa bwine Leza, ne pa bintu byonso bisansa byadi bimunena babipya-mambo bampikwa bwine Leza.”+
16 Bano’ba i bantu ba miuningo,+ batompolatompola pa mwanda wa mwikadilo wa būmi bwabo, balonda bya kusakasaka bya abo bene,+ kadi byakanwa byabo bianyanga bibibibi, koku bafukula bakwabo* mwanda wa kumwena’mo abo bene.+
17 Ino banwe, a baswedibwe, vulukai myanda yesambile* dibajinji batumibwa ba Mfumwetu Yesu Kidishitu,
18 pobadi bemulombola’mba: “Mu mafuku a mfulo kukekalanga bantu basepañana na kibengo, balonda bya kusakasaka bya abo bene mwanda wa bintu byampikwa bwine Leza.”+
19 Bano’ba bo abo baleta nkalañani,+ bantu badi bwa banyema,* kebatelepo mutyima ku bintu bya ku mushipiditu.*
20 Ino banwe, a baswedibwe, mwitamijei banwe bene mu lwitabijo lwenu lujila nakampata, kadi lombelai na mushipiditu ujila,+
21 amba mwilame mu buswe bwa Leza,+ pomwilaija lusa lwa Mfumwetu Yesu Kidishitu pa mwanda wa būmi bwa nyeke.+
22 Kadi, kemwakilekai kufwila lusa+ bantu bamobamo batatana;+
23 mwibapandijei+ na kwibopola mu mudilo. Ino kemwakilekai kufwila bakwenu lusa, mwibafwila’lo na moyo, koku mushikilwe’nka ne kivwalwa kishingwe biko na ngitu.+
24 Shi ke pano, yewa ubwanya kwimulama kutyina mwakakukala ne kwimukwasha mwikale bampikwa kutopekwa+ ku meso a ntumbo yandi* na nsangaji mikatampe,
25 Leza umo kete Umpandiji wetu kupityila kudi Yesu Kidishitu Mfumwetu, apebwe ntumbo, bukatampe, bukomokomo, ne lupusa tamba kalakala kene ne pano ne mafuku onso nyeke ne nyekeke. Amena.
Kunshi kwa Dyani
^ Mu Kingidiki i, aselgeia. Tala Nshintulwilo ya Bishima.
^ Nansha’mba “mfumwetu.”
^ Tala Nshintulwilo ya Bishima.
^ Nansha’mba “mifwe fwē.”
^ Nansha’mba “bifulo; bifulu.”
^ Nansha’mba “makumi a tununu.”
^ Nansha’mba “batendela bantu.”
^ Nansha’mba “bintu byalaile.”
^ Nansha’mba “bantu ba ku ngitu.”
^ Kishima pa kishima i, “bampikwa mushipiditu.”
^ Nansha’mba “kwikala’po kwandi kwa ntumbo.”
