KESHAI’NKA KUKESHA!
2023: Mwaka Waseleje Bantu Mityima Kūlu—Le Bible Unena’po Namani?
Binkumenkume byalongekele koku ne koku mu 2023, bilombola’mba bine tudi mu kitatyi kitwa na Bible bu “mafuku a mfulo.” (2 Temote 3:1) Tala bino binkumenkume bilongeka mobikwatañenine na byobya byālailwe na Bible pa bitala ano etu mafuku.
Bible ne binkumenkume bilongeka
“Mavita ne myanda ya mavita.”—Mateo 24:6.
“Mavita a kyonakanya enda avudila’ko mu bifuko bivule ntanda yonso.” a
Tala kishinte “Le I Ani Ukapandija Basivile?” ne kishinte “Madepanse a Kupota Byabulwi bya Basola Ntanda Yonso I Matabuke pa Madolala Midiyala 2000.”
“Kutenkana kwa ntanda kwadi koku kekudi koku.”—Mako 13:8.
“Tamba tushilula mwaka wa 2023, kujokoloka ntanda yonso kwalongekele kutenkana kwa ntanda 13 kupityile pa bukatampe bwa 7. Kino i kintu kyadi kekyalongekele kashā mu mwaka umo kete.” b
Tala kishinte “Kutenkana Kukatampe kwa Ntanda mu Tirki ne mu Siri.”
“Binkumbulu bilenga moyo.”—Luka 21:11.
“Ntanda yonso ibatambe mu kitatyi kya kyanga; ibatwela mu kitatyi kya kyanga kikomo.”—António Guterres, mulembi wa Bumo bwa Mizo. c
Tala kishinte “Kwikalako kwa Kyanga Kikomo Ntanda Yonso mu Bushipo mu 2023.”
“Bimpengele bya nzala.”—Mateo 24:7.
“2023: I mwaka mukwabo wa kyaka kikatampe ku boba badi na makambakano a mwa kusokwela byakudya bya ba mu byabo bisaka.” d
Tala kishinte “Divita ne Mwikadila wa Kūlu Bibatyepeja Byakudya Ntanda Yonso.”
“Bitatyi bya makambakano bikomo ne mwa kulongela.”—2 Temote 3:1.
“Ntanda yonso muntu umo mu bantu mwānda ususukanga na misongo ya kujinwa ñeni.” e
Tala kishinte “Makambakano a Bukomo bwa mu Ñeni ku Bankasampe.”
Le i bika bitutengele mu 2024?
I kutupu muntu ubwanya kwitulombola biketutana mu 2024. Inoko myanda ilongeka ilombola’mba panopano ponka Bulopwe bwa Leza, nansha’mba buludiki bwa momwa mūlu, busa kupingakena pa maludiki a bantu ne kutalula‘ko bintu byonso bisusula bantu ne kwibaseleja mutyima kūlu.—Danyele 2:44; Kusokwelwa 21:4.
Pano’ko bidi shi tubasela mutyima kūlu, tunyemenei kudi Leza, tumulombe Bukwashi. Bible unena’mba:
“Shi nakwatwa moyo, nkukulupilanga.”—Ñimbo ya Mitōto 56:3.
Le i muswelo’ka otubwanya kulombola’mba tukulupile mudi Leza? Tukwita wifundile’ko milao mivule ya mu Bible itala būmi bwa kumeso bwambulwa masusu. Tompa kwifunda netu Bible ku bitupu umone muswelo obwanya kumwena mu milao ya mu Bible pamo na kyobe kisaka.
a Myanda ya Matanda Makwabo, “Ntanda mu Divita: Le i Bika Bileta Mavita a Kyonakanya Ntanda Yonso?” na Emma Beals ne Peter Salisbury, Mafuku 30 Kweji 10, 2023.
b Mapya Atala Kutenkana kwa Ntanda, “Mwaka wa 2023: Buvule bwa Kutenkana Kukatampe kwa Ntanda Bubavudila’ko,” Kweji 5, 2023.
c Bumo bwa Mizo, “Binenwa bya Ntwelelo bya Mulembi Bitala Kukaba kwa Luvula ku Conférence de Presse,” mu Mafuku 27 Kweji 7, 2023.
d Kitango kya Ntanda Kitala Myanda ya Byakudya, “Kusakana kwa Byakudya Ntanda Yonso.”
e Kitango kya Ntanda Kitala Bukomo bwa Ngitu, “Difuku Ditala Kujinwa Ñeni Ntanda Yonso mu 2023,” mu Mafuku 10 Kweji 10, 2023.
Tala'po Bidi ne Bino:
MYANDA MIKWABO
Lukulupilo lwa Bine lwa Būmi Bulumbuluke bwa Kumeso
Le milao idi mu Bible i mishile namani na milao ya bantu ne bintu byobabadikila kunena?
ESSENTIAL BIBLE TEACHINGS
Le Bulopwe bwa Leza I Bika?
Yesu paādi usapula, wāfundije bininge myanda ya Bulopwe bwa Leza kupita’ko myanda mikwabo. Mu tutwa twa myaka, balondi bandi nabo bālombele buno Bulopwe bwiye.
LANGUKAI!
Mwa Kulwila na Kuvutakanibwa Ñeni
Langulukila pa misoñanya imoimo ya kamweno ibwanya kukukwasha ulwe biyampe na kuvutakanibwa ñeni ne kuleka padi kuvutakanibwa’yo bininge.
MYANDA ITUTALA
Lomba Kwifunda Bible
Mwisambilei pa bipangujo bya mu Bible, yukila’ko bivule pa Batumoni ba Yehova.
