Umwene mwanuke udi pa kifwatulo’u. Umweka bu udi bunka kadi wivwene moyo. Le nobe kodi mwiivwane uno muswelo?— Muntu yense wiivwananga namino kyaba kimo. Bible utela balunda na Yehova bēmwene nabo bu badi bunka kadi bāivwene moyo. Mu bano bantu mwādi ne Ediya. Ivwana lusango lwandi.

Ediya wāshikete mu Isalela myaka mivule Yesu kabutwilwe. Ahaba, mulopwe wa Isalela, kādipo utōta Yehova, Leza wa bine. Ahaba ne wandi mukaji Yezebele, bādi batōta Bala, leza wa bubela. Penepa bantu bavule mu Isalela nabo bāshilula kutōta Bala. Yezebele mulopwe mukaji wādi mubi kutabuka, wāsakile kwipaya bantu bonso bādi batōta Yehova, ne Ediya mwine! Le uyukile byālongele Ediya?—

Wānyema kavuku! Wāenda kulampe mu ntanda mutuputupu, wakafyama mu  mutá. Le uyukile kyāmulengeje alonge namino?— I moyo. Ino Ediya bidi kādipo ufwaninwe kwivwana moyo. Mwanda waka? Mwanda wādi uyukile’mba Yehova ubwanya kumukwasha. Dibajinji, Ediya wēmwenine bukomo bwa Yehova. Yehova wālondolwele ku milombelo yandi musunsa mubajinji na kutuma mudilo wātambile mūlu. O mwanda ne pano pene wādi’nka wa kumukwasha!

Ediya paādi mu mutá, Yehova wēsambile nandi ne kumwipangula’mba: ‘Le uloñanga bika kuno?’ Ediya nandi amba: ‘Ke enka ami kasuku ukutōta. Nashala’tu bunka, kadi naivwana moyo mwanda basaka kungipaya.’ Ediya wālangile’mba bantu bakwabo batōta Yehova kebepaibwe bonso. Ino Yehova wāmulombola’mba: ‘Mhm, ke amopo. Kukidi bantu bakwabo bantōta 7 000. Kankamana. Nsaka kukupa mingilo mivule ya kuñingidila!’ Le ulanga Ediya wāsangele pa kwivwana kino?—

Le bintu byāfikīle Ediya bibakufundija bika?— Kokemonapo bu udi bunka nansha kwivwana moyo. Wi mujokolokwe na balunda basenswe Yehova kadi bakusenswe. Kadi Yehova udi na bukomo bwine bwabo ne ukakukwasha nyeke! Le kusangelepo pa kuyuka’mba bine kudipo bunka bobe?—