KIFUNDWA 2
Lebeka Wādi Usaka Kusangaja Yehova
Lebeka wādi mwana-mukaji usenswe Yehova. Dijina dya wandi mulume i Izake. Izake nandi wādi usenswe Yehova. Le Lebeka wēmwene namani na Izake? Le wālombwele namani amba wādi usaka kusangaja Yehova? Ivwana lusango lwandi.
Ba Abalahama ne Sala bo bābutwile Izake. Bādi bashikatanga mu ntanda ya Kenani, mu ino ntanda bantu kebādipo batōta Yehova. Ino Abalahama aye, wādi usaka wandi mwana asonge mukaji utōta Yehova. O mwanda wātumine mwingidi wandi, padi i Ediezela, akakimbile Izake mukaji mu kibundi kitwa bu Halane, mwine mwādi mwikala bamwanabo na Abalahama.
Lebeka wadi usangedile kwingila bikomo pa kuteka mema a bangamedia
Ediezela wāendele na bapika bakwabo ba Abalahama. Lwādi lwendo lulampe. Baenda ne na bangamedia dikumi baselele bidibwa ne byabuntu. Le Ediezela wādi wa kuyuka namani amba uno ye mukaji wafwaninwe kutongela Izake? Ediezela ne bapika bakwabo pobāfikile mu Halane, bāimene pa mushimwa mwanda Ediezela wāyukile amba bantu basa kwiya kuteka’po mema. Walomba kudi Yehova amba, ‘Nsongwakaji onkanena’mba: mpeko mema ntome nandi ampe kadi āye ape ne bangamedia bami; nankyo nkayuka amba ye mwana-mukaji owatonga.’
Amba atale nenki, Lebeka awa wiya ku mushimwa. Bible unena amba Lebeka wādi mupopoke. Ediezela kala au umulomba mema a kutoma, Lebeka nandi amba: ‘Biyampe! Nakakutekela kadi ntekele ne bobe bangamedia bene.’ Langa’po bidi! Bangamedia shi badi na kyumwa batomanga mema mangi, ko kunena amba Lebeka wājokēle ku mushimwa misunsa ne misunsa. Le ubamone mwaingidila na bukomo pa kifwatulo’pa?— Ediezela wātulumukile pa kwimwena na meso mwālondolwedile Yehova ku milombelo yandi.
Ediezela wāmupa byabuntu bivule biyampe. Ponka’po Lebeka nandi wāityila ba Ediezela ne bengidi bakwabo kwinjibo. Ediezela wāshintulula kine kyamutumina Abalahama kobadi ne mwalondolwela Yehova ku milombelo yandi. Kisaka kya ba Lebeka kyāitabija Lebeka asongwe na Izake.
Lebeka wenda ku Kenani na Ediezela kupwe wetudaila na Izake
Ino le ulanga’mba Lebeka nandi wāitabije kusongwa na Izake?— Lebeka wādi uyukile amba i Yehova waludikīle Ediezela kwabo. O mwanda pāmwipangwile ba mu kisaka kyabo shi witabija kwenda ku Kenani kukasongwa na Izake, wānenene amba: ‘Bine, ne mwitabije kwenda.’ Penepa bātaluka kebenda na Ediezela. Abo pa kufika mu Kenani, wāsongwa na Izake.
Lebeka byālongele bintu musakila Yehova, Yehova nandi wāmwesele. Myaka mingi pa kupita’po, Yesu wābutwilwa ku kisaka kyandi! Nobe shi usangaje Yehova pamo bwa Lebeka, nandi ukakwesela.
