Batwe bonso twikalanga na byotusenswe mu mwanda utala muvwadilo ne mwidyangwilo. Inoko shi tulonde ino misoñanya mityetye ya mu Bible, ketukalombolapo enka byobya byotusaka, ino tukasangaja Yehova. Lekai nanshi tubandaule’ko misoñanya imo.

1. Le i misoñanya’ka ifwaninwe kwituludika potutonga muvwadilo ne mwidyangwilo?

Tufwaninwe “kuvwala bisandi bifwaninwe, na butūkanye ne ñeni mibwane,” kadi tufwaninwe kumweka biyampe mwa kulombwela’mba twi “bene Leza.” (1 Temote 2:9, 10) Tala ino misoñanya iná: (1) Bivwalwa byetu bifwaninwe kwikala “bifwaninwe.” Monka mokodi mwibimwene potupwila, batwe bantu ba Yehova tudi na bivwalwa bishileshile, inoko nywene ne bivwalwa byetu bilombolanga’mba tulēmekele Leza otutōta. (2) Kuvwala “na butūkanye” kushintulula’mba mumwekelo wetu keufwaninwepo kukolomona bilokoloko bya busekese, nansha kukokela milangwe ya bantu potudi. (3) Tulombolanga’mba tudi na “ñeni mibwane,” potupela kwiula myodele yonso ya muvwadilo ne mwidyangwilo itumbile. (4) Mumwekelo wetu ufwaninwe kulombola nyeke amba twi “bene Leza,” mwanda wa kulombola ku bonso amba tutōtanga Leza wa bine.​—1 Bene Kodinda 10:31.

2. Le mumwekelo wetu ubwanya kwikala na lupusa’ka pa banabetu mu lwitabijo?

Nansha byotudi na bwanapabo bwetu bwa kutonga bya kuvwala, tufwaninwe nyeke kuvuluka ne lupusa lubwanya kwikala na bivwalwa byetu pa bakwabo. Tuloñanga bukomo bwetu bonso bwa kuleka kukukaja muntu nansha umo, ino ‘tusangajanga bakwabo mwanda wa kamweno kabo, mwanda wa kwibatamija.’​—Tangai Bene Loma 15:1, 2.

3. Le mumwekelo wetu ukokeja kukokela namani bantu bakwabo ku butōtyi bwa bine?

Tuloñanga bukomo bwa kuvwala mu muswelo mufwaninwe mu bitatyi byonso, inoko kadi tutanga mutyima bininge ku muvwadilo wetu potwenda ku kupwila ne potutambila mu busapudi. Ketusakangapo kulabika bantu bakomenwe kuteja musapu wa mvubu otwibaselēle. Mumwekelo wetu ubwanya kukokela bantu ku bubine ne “[kunengeja] bufundiji bwa Umpandiji wetu.”​—Tetusa 2:10.

 LANGULUKA BININGE

4. Mumwekelo wetu muyampe ulēmekejanga Yehova

Le i bubinga’ka botudi nabo bwitulengeja tute mutyima ku mumwekelo wetu? Tangai Ñimbo ya Mitōto 47:2, ne kwisambila pa bino bipangujo:

• Byotuyukile amba twimaninanga Yehova, le kino kifwaninwe kwitulengeja tuvwale namani?

• Molangila, kidi’tu bine na mvubu kuta mutyima ku mumwekelo wetu potwenda ku kupwila ne mu busapudi? Mwanda waka ubanena nankyo?

 5. Mwa kutongela muvwadilo muyampe ne mwidyangwilo muyampe

Talai VIDEO.

Bivwalwa byetu byonso, bikale bya lupoto lukande nansha bya lupoto lutyetye, bifwaninwe kwikala bifwaninwe mungya ngikadilo yotwatanwa’mo. Tangai 1 Bene Kodinda 10:24 ne 1 Temote 2:9, 10. Kupwa, kemwisambila pa kine kyotufwaninwe kwepukila bivwalwa . . .

• byampikwa kwitubwana ne biyelayela.

• tulameta, bimwekeja ngitu patōka, ne bikolomona bilokoloko bya busekese.

Nansha Bene Kidishitu byokebakidipo munshi mwa Bijila bya Mosesa, abyo’ko bilombola milangwe ya Yehova. Tangai Kupituluka mu Bijila 22:5, ne kwisambila pa kino kipangujo:

• Mwanda waka tufwaninwe kwepuka bivwalwa bimwekeja bana-balume bwa bana-bakaji, bana-bakaji nabo bwa bana-balume?

Tangai 1 Bene Kodinda 10:32, 33 ne 1 Yoano 2:15, 16, ne kwisambila pa bino bipangujo:

• Mwanda waka tufwaninwe kutala shi mumwekelo wetu ukukajanga bantu mu kibundi ne mu kipwilo?

• Le i muvwadilo ne mwidyangwilo wa muswelo’ka uvudile mu kifuko kyoshikete’mo?

• Molangila mu yayo mivwadilo ne midyangwilo mudi’po imo yampikwa kufwaninwa ku bene Kidishitu? Mwanda waka ubanena nankyo?

 MU KĪPI

Shi tubatonge butongi buyampe pa mumwekelo wetu, nabya tubalēmeka Yehova ne bantu bakwabo.

Pitulukai’mo

• Mwanda waka muvwadilo ne mwidyangwilo wetu bidi na mvubu ku meso a Yehova?

• Le i misoñanya’ka ifwaninwe kukuludika pokwata butyibi bwa bya kuvwala ne mwa kwidyangwila?

• Le mumwekelo wetu ubwanya kushinta namani muswelo umona bantu bakwabo butōtyi bwa bine?