Mu makumi a myaka, Batumoni ba Yehova badi bengidija, batampa, ne kwabanya malamuni palapala a Bible. Ino twamwene mvubu ya kulupula bwalamuni bupya bubwanya kukwasha bantu senene befunde “buyuki bwinebwine bwa bubine,” monka musakila Leza. (1 Temote 2:3, 4) O mwanda mu 1950, twashilwile kulupula bipindi bya Bible mu muneneno wa dyalelo, bya Bwalamuni bwa Ntanda Mipya. Uno Bible waalamwinwe mu muswelo wa binebine ne ukulupilwa mu ndimi 160 ne kupita.

Kwadi kusakilwa Bible upēla kwivwana. Ndimi ishintanga mungya kitatyi, kadi malamuni mavule a Bible nao adi na muneneno mukutakane ne wa kala mukomo kwivwana. Kadi, kwasokwelwe bilembwa bya kala bikwatañene na bilembwa bibajinjibajinji, byalengeje twivwanije biyampe Kihebelu, Kialamia, ne Kingidiki kya mu Bible.

Kwadi kusakilwa bwalamuni bulamete ku Kinenwa kya Leza. Balamuni ba Bible bafwaninwe kulamata ku bisonekwa bibajinjibajinji pa kyaba kya kwipa bwanapabo bwa kushinta bilembwa bya Leza bya ku bukomo bwa mushipiditu. Inoko, mu malamuni mavule a Bible, dijina Yehova i ditalulwe mu Bisonekwa Bijila.

Kwadi kusakilwa Bible utumbija Mwine ulembeje’ye. (2 Samwele 23:2) Dijina Yehova i dijokejibwe mu Bwalamuni bwa Ntanda Mipya kintu kya misunsa 7 000 ponso poditanwa mu bilembwa bya kala bininge bya Bible, na mulombwela kifwatulo kidi kunshi’ku. (Ñimbo ya Mitōto 83:18) Pa kupwa kukimbakimba myanda mu bula bwa myaka, twafudile ku kulupula uno Bible usangaja pa kutanga, ulombola patōka milangwe ya Leza. Wikale na Bible Bwalamuni bwa Ntanda Mipya mu lobe ludimi nansha shi kudipo nandi, tukukankamika wikale na kibidiji kiyampe kya kutanga Kinenwa kya Yehova difuku ne difuku.—Yoshua 1:8; Ñimbo ya Mitōto 1:2, 3.

• I bika byalengeje tukimbe’ko bwalamuni bupya bwa Bible?

• Ense usaka kuyuka kiswa-mutyima kya Leza unenwe kwikala na kibidiji’ka kiyampe difuku ne difuku?