Yesu, kumeso’tu kwa kufwa, wānenene amba: “Ino myanda miyampe ya Bulopwe ikasapulwa pa ntanda yonso ikelwe na bantu mwanda wa bukamoni ku mizo yonso, ebiya mfulo keiya.” (Mateo 24:14) Ino le uno mwingilo wadi wa kwingilwa namani ntanda yonso? I na kulonda kimfwa kyāshile Yesu kitatyi kyaādi pano pa ntanda.—Luka 8:1.

Tuloñanga bukomo bwa kufikila bantu ku mobo abo. Yesu wāfundije bandi bana ba bwanga kusapula myanda miyampe ku njibo ne njibo. (Mateo 10:11-13; Bilongwa 5:42; 20:20) Bano basapudi ba mu myaka katwa kabajinji bāpelwe myaba miyukane ya kusapula’mo. (Mateo 10:5, 6; 2 Kodinda 10:13) Ne dyalelo nadyo, mwingilo wetu wa busapudi i mulongololwe biyampe, kadi kipwilo ne kipwilo i kipebwe mwaba kampanda wa kusambakanya. Kino kitukwashanga tuvuije musoñanya wa Yesu wa “kusapwila bantu ne kupāna bukamoni ne pa mfulo.”—Bilongwa 10:42.

Tuloñanga bukomo bwa kufikila bantu konso kobatanwa. Yesu wāshile kimfwa na kusapula mu bikwe, ku mankula nansha ku mishimwa kuteka bantu bavule mema. (Mako 4:1; Yoano 4:5-15) Netu tusapwilanga bantu myanda ya mu Bible konso kotubwanya—mu bipito, mu bifuko bya busunga, mu biwanza bya mityi, nansha ke ku telefone. Tusapwilanga kadi ne balondakani, bakwetu ba ku mingilo, bakwetu ba ku masomo ne babutule ponso potumona mukenga muyampe. Buno bukomo bonso bulongelwe i bulengeje midiyo ne midiyo ya bantu ba ntanda yonso bevwane “myanda miyampe ya lupandilo.”—Ñimbo ya Mitōto 96:2.

Ubulwe’po kwikala na muntu okokeja kusapwila myanda miyampe ya Bulopwe bwa Leza ne byobya byobukamulongela kumeso? Kokafya uno mwanda wa lukulupilo. Sapwila’o bantu bakwabo pampikwa kwija!

• “Myanda miyampe” ifwaninwe kusapulwa i myanda’ka?

• Le Batumoni ba Yehova beulanga namani manwa a Yesu a kusapula?